ខេត្តពោធិ៍សាត់ ៖ ប្រធានគណបក្សសង្គ្រោះជាតិខេត្តពោធិ៍សាត់ លោក យ៉ាន់ សេងហ៊ត នៅព្រឹកថ្ងៃទី២៩ ខែឧសភា ឆ្នាំ២០១៧នេះ ត្រូវបានកម្លាំងនគរបាលបញ្ជូនទៅកាន់តុលាការចាត់ការតាមច្បាប់ បន្ទាប់ពីសាកសួរអស់ពីរថ្ងៃ ពាក់ព័ន្ធករណីបើករថយន្ត បុកក្មេងប្រុសអាយុ៦ឆ្នាំ ហើយបើកគេចខ្លួន មិនឈប់ទទួលខុសត្រូវ។
អធិការនគរបាលស្រុកវាលវែង វរសេនីយ៍ត្រី ធាង ឡេង បានអះអាងនៅក្នុងរបាយការណ៍កំណត់ហេតុថា ប្រធានគណបក្ស CNRP ខេត្តពោធិ៍សាត់ លោក យ៉ាន់ សេងហ៊ត ពិតជាបានបើករថយន្តក្នុងល្បឿនលឿន បុកក្មេងប្រុសអាយុ៦ឆ្នាំ ខ្ទាតជាង១២ម៉ែត្រ ហើយបន្ថែមល្បឿនបើកគេចខ្លួនមិនទទួលខុសត្រូវ។
កុមារារងគ្រោះឈ្មោះ ណាត សុវណ្ណឌី អាយុទើបតែ៦ឆ្នាំ កំពុងស្ថិតក្រោមការជួយសង្គ្រោះនៅមន្ទីរគន្ធបុប្ផា ខេត្តសៀមរាប ពោលនៅបន្តសន្លប់នៅឡើយទេ។ ឪពុកក្មេងរងគ្រោះ បានប្រាប់អធិការនគរបាលស្រុកវាលវែង តាមទូរស័ព្ទនាថ្ងៃនេះថា កូនប្រុសរបស់លោក នៅសន្លប់លើគ្រែពេទ្យនៅឡើយទេ ហើយស្ថានភាពក៏មិនទាន់ធូរស្រាលផងដែរ ដោយក្រុមគ្រូពេទ្យកំពុងជួយសង្គ្រោះ។
យោងរបាយការណ៍នគរបាលបានឲ្យដឹងថា កាលពីថ្ងៃទី២៧ ខែឧសភា ឆ្នាំ២០១៧ វេលាម៉ោង១៥ និង៣០នាទីរសៀលមានគ្រោះថ្នាក់ចរាចរណ៍មួយនៅចំណុចភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ បង្កឡើងដោយឈ្មោះ យ៉ាន់ សេងហ៊ត ភេទប្រុស អាយុ៤៨ឆ្នាំ បានបើកបររថយន្ត ម៉ាកប៉ាស៊ីរ៉ូ ពណ៌ស ស្លាកលេខ 2C-1466 ភ.ព ពីទិសខាងលិចទៅទិសខាងកើត លុះមកដល់ចំណុចកើតហេតុខាងលើ បានបុកក្មេងប្រុសឈ្មោះ ណាតត សុវណ្ណឌី ភេទប្រុស អាយុ៦ឆ្នាំ ដើរឆ្លងផ្លូវពីទិសខាងជើង ទៅទិសខាងត្បូងបណ្តាលឲ្យរងរបួសធ្ងន់ធ្ងរ មូលហតុដោយសារល្បឿនលឿន ហើយជនបង្កបានបើក រថយន្តទៅទិសខាងកើតគេចខ្លួន រហូតទៅដល់ភូមិព្រែក១ ឃុំសំរោង ទើបកម្លាំងនគរបាលស្រុកភ្នំក្រវ៉ាញ ស្កាត់ឃាត់ចាប់បាន៕