ភ្នំពេញ ៖ សន្តិសុខខណ្ឌដូនពេញដឹកនាំដោយលោក ចាប ឌីណា នាយករងរដ្ឋបាលសាលាខណ្ឌនៅព្រឹកថ្ងៃទី២៨ខែឧសភានេះ បានចុះទៅកាត់ និងដកស្លាក ស្ទឹកគ័រ របស់គណបក្ស សង្គ្រោះជាតិបិទនៅតាមដើមឈើ និងបង្គោលភ្លើងដោយចាត់ទុកថា បានបំពានច្បាប់របស់គណៈកម្មាធិការជាតិរៀបចំការបោះឆ្នោត (គ.ជ.ប) ។
លោក ចាប ឌីណា បានឲ្យដឹងថា មុនកម្លាំងគណៈបញ្ជាការឯកភាពខណ្ឌចុះទៅបក និងដកហូតស្លាកគណបក្សសង្គ្រោះជាតិនេះគឺ បានជូនដំណឹងទៅគណៈកម្មាធិការជាតិរៀបចំការបោះឆ្នោតរយៈពេល៣ថ្ងៃមកហើយ ដែលយុទ្ធនាការនេះ មិនមែនផ្ដោតសំខាន់តែទៅលើ ស្លាកគណបក្សនយោបាយនោះទេ ពោលគឺបកទាំងអស់នូវស្លាកផ្សព្វផ្សាយពាណិជ្ជកម្មផ្សេងៗ ហើយកិច្ចការនេះធ្វើឡើងតាមបញ្ជាលោក សុខ ពេញវុធ អភិបាលខណ្ឌដូនពេញ ។
គួរបញ្ជាក់ផងដែរថា កាលពីប៉ុន្មានថ្ងៃមុននេះ អាជ្ញាធរខណ្ឌច្បារអំពៅ ក៏បានចុះទៅកាត់ និងដកស្លាក ស្ទឹកគ័រ របស់គណបក្សសង្គ្រោះជាតិ ដែលបិទនៅតាមបង្គោលភ្លើង និងដើមឈើ ។ ការចុះដកស្លាកឡូហ្គោគណបក្សនេះ សកម្មជនបក្សប្រឆាំងបានបញ្ចេញសារតាមរយៈបណ្តាញសង្គមហ្វេសប៊ុកចាត់ទុក ទង្វើអាជ្ញាធរខណ្ឌដូនពេញថា ជ្រុលជ្រួសពេក ត្រង់បក្ស cpp ដាក់ស្លាកបាន ៕