រតនគីរី ៖ អ្នកទោសចំនួន៥នាក់ បានហែកគុករត់ចេញពីពន្ធនាគារភ្នំស្វាយកាលពីវេលាម៉ោង២៖៣០នាទី រំលងអធ្រាត្រឈានចូលថ្ងៃទី២៦ ខែឧសភា ឆ្នាំ២០១៧តែចាប់បាន១ម្នាក់មកវិញ ។គុកភ្នំស្វាយនេះស្ថិតនៅភូមិភ្នំស្វាយ សង្កាត់ឡាបានសៀក ក្រុងបានលុង ខេត្តរតនគិរី។មន្ដ្រីពន្ធនាគារម្នាក់ បានលួចបង្ហើបឲ្យដឹងថា ទណ្ឌិតចំនួន៥នាក់ ដែលលួចរត់ចេញពីពន្ធនាគារនេះ គឺជាប់ឃុំឃាំងពីបទចែកចាយ និងប្រើប្រាស់គ្រឿងញៀន ហើយតុលាការបានជំនុំជម្រះរួចឲ្យជាប់ពន្ធនាគារយៈពេល២ឆ្នាំ។ករណីអ្នកទោសហែកគុករត់ចេញនេះរហូតមកដល់វេលាល្ងាច ថ្ងៃទី២៦ ខែឧសភានេះ កម្លាំងអនុរក្សពន្ធនាគារ សហការជាមួយកម្លាំងអធិការដ្ឋាននគរបាលក្រុងបានលុង ឡោមព័ទ្ធក្បែរជើងភ្នំស្វាយ ដើម្បីរុករកនៅតែរកមិនឃើញអ្នកទោស៤នាក់ទៀតនោះទេ។
សូមបញ្ជាក់ថាអ្នកទោសម្នាក់ដែលចាប់បានមកវិញនោះគឺដោយសារថ្លោះជើងរត់មិនរួចទើបអ្នកយាមគុកចាប់បាននៅក្នុងបរិវេណគុគ ហើយយកទៅដាក់ក្នុងបន្ទប់ឃុំឃាំងវិញ។
លោក ទិន សុវណ្ណនី ប្រធានពន្ធនាគារភ្នំស្វាយសំងំឈឹង អ្នកសារពត៌មាន មិនអាចសុំការបំភ្លឺបានទេ នៅព្រឹកថ្ងៃទី២៦ ខែឧសភា ដោយទូរស័ព្ទចូលមិនមានអ្នកទទួល។
មានសេចក្តីរាយការណ៍ថាក្នុងរជ្ជកាលដែលលោកទិន សុវណ្ណនីដែលធ្វើជា មេគុកភ្នំស្វាយនេះមានអ្នកទោសរត់ចេញពីគុកចំនួន៣ដងមកហើយ ។ក្រៅពីនេះនៅមានរឿងអាស្រូវផ្ទាល់ខ្លួនរបស់មេគុកនោះទៀតផង ធ្វើឲ្យប្រជាពលរដ្ឋនៅក្នុងក្រុងបានលុងរិះគន់ថា ប្រធានពន្ធនាគារបណ្ដែតបណ្ដោយឲ្យកើតមានករណីអ្នកទោសលួចរត់ចេញជាញឹកញាប់។
មន្ត្រីពន្ធនាគារដដែលបានបន្តថាគុកនេះគ្មានជញ្ចាំង ឫគ្មានអ្នកយាម នេះជាកំហុសរបស់ប្រធានពន្ធនាគារភ្នំស្វាយ ដែលការគ្រប់គ្រងមានភាពចន្លោះប្រហោង និងមិនយកចិត្តទុកដាក់លើការងារឲ្យបានល្អ។ ទណ្ឌិតទាំង៥នាក់រួមមាន៖ ទី១-ឈ្មោះ កែវ ឆក ជាប់ចោទពីបទរក្សាទុក និងប្រើប្រាស់ដោយខុសច្បាប់ នូវសារធាតុញៀន ហើយឃុំតាមដីកាសម្រេចឃុំខ្លួនលេខ៧៣ ចុះថ្ងៃទី៣ ខែមេសា ឆ្នាំ២០១៧ ទី២- ឈ្មោះ កែវ ចាន់ ជាប់ចោទពីបទរក្សាទុក និងប្រើប្រាស់ដោយខុសច្បាប់នូវសារធាតុញៀន ហើយឃុំខ្លួនតាមដីកាសម្រេចឃុំខ្លួនលេខ៧៤ ចុះថ្ងៃទី៣ ខែមេសា ឆ្នាំ២០១៧ ទី៣- ឈ្មោះ សុខ នី ហៅ ហឿ ឃឿនជាប់ចោទពីបទ ដឹកជញ្ជូន និងប្រមូលផល អនុផលព្រៃឈើ ហើយឃុំខ្លួនតាមដីកាសម្រេចឃុំខ្លួនលេខ១១០ ចុះថ្ងៃទី១៥ ខែឧសភា ឆ្នាំ២០១៧ ។
ទី៤- ឈ្មោះ សូម ហាក់ ជាប់ចោទពីបទ អំពើផ្តល់មធ្យោបាយលួចរត់ ហើយឃុំខ្លួនតាមដីកាសម្រេចឃុំខ្លួនលេខ៣៩ ចុះថ្ងៃទី៦ ខែមីនា ឆ្នាំ២០១៧ និងទី៥- ឈ្មោះ នង វណ្ណា ជាប់ចោទពីបទរក្សាទុក ដោយខុសច្បាប់នូវសារធាតុញៀន ហើយឃុំខ្លួនតាមដីកាសម្រេចឃុំខ្លួនលេខ១០៤ ចុះថ្ងៃទី៣ ខែឧសភា ឆ្នាំ២០១៧។
អ្នកទោសទាំង៥នាក់នេះ បានធ្វើសកម្មភាពហែកគុកលួចរត់ចេញពីបន្ទប់លេខ៧ ក្នុងអគារA ហើយពួកគេបានហែកដែករបងលូនតាមលូទឹកស្អុយ និងបានឡើងតាមរបង លួស ដើម្បីហក់ចេញពីរបងពន្ធនាគារដោយឈ្មោះ កែវ ឆក, ឈ្មោះ កែវ ចន្ទ, ឈ្មោះសូម ហាក់, ឈ្មោះ សុខ នី បានហក់ចេញពីរបងពន្ធាគាររួច។ ចំណែក ឈ្មោះ នង វណ្ណា ក៍បានហក់ចេញទៅដែរប៉ុន្តែហក់ខុសបច្ចេកទេស ទើបបណ្តាល ឲ្យបាក់ជើងម្ខាង រត់មិនរួច ក៍ត្រូវអនុរក្សពន្ធនាគារចាប់បានមកវិញ ៕
