ខេត្តរតនគិរី ៖ ក្រុមគណះកម្មាការថ្នាក់ជាតិបានចុះមកដល់ទីតាំងកំពុងរក្សាទុកវត្ថុតាងបទល្មើសព្រៃឈើដែលរឹបអូសទុកជាសម្បត្តិរដ្ឋតាមដីកាសម្រេចក្នុងដែនសមត្ថកិច្ចខណ្ឌរដ្ឋបាលព្រៃឈើរតនគិរីដោយប្រមូលពីទីតាំងដើមទីដើម្បីដឹកជញ្ជូនទៅទីតាំងចុងទី។
នាព្រឹកថ្ងៃទី២៤ ខែឧសភា ឆ្នាំ២០១៧នេះទីតាំងចំនួន៥កន្លែងរួមមាន៖
១. ខណ្ឌរដ្ឋបាលព្រៃឈើ ២.ផ្នែករដ្ឋបាលព្រៃឈើស្រុកបរកែវ ៣.បញ្ជាការដ្ឋានសឹករងស្រុកអូរយ៉ាដាវ ៤.អធិការនគរបាលស្រុកអូរយ៉ាដាវ និងទី៥ ទីស្នាក់ការកងរាជអាវុធហត្ថស្រុកអូរយ៉ាដាវត្រូវបានក្រុមគណះកម្មាការថ្នាក់ជាតិកំពុងប្រម៉ែប្រមូលឈើនិងដឹកជញ្ជូនចេញពីខេត្តរតនគិរីដែលជាទីតាំងដើមឆ្ពោះទៅកាន់ទីតាំងចុងទីដែលស្ថិតក្នុងខេត្តក្រចេះនោះ ដើម្បីដាក់អោយដេញថ្លៃជាមួយក្រុមហ៊ុន។
លោក កែប កត់ នាយខណ្ឌរដ្ឋបាលព្រៃឈើខេត្តរតនគិរីបញ្ជាក់អោយភ្នាក់ងារសារព័ត៌មានដឹងនៅរសៀលថ្ងៃទី២៤ ខែឧសភា ឆ្នាំ២០១៧នេះ អំពីតួរលេខចំនួនឈើដែលគណះកម្មាការថ្នាក់ជាតិនិងថ្នាក់ខេត្តបង្ក្រាបមករក្សាទុកមានចំនួន៧ទីតាំងស្មើនិង៩០០កំណាត់ប៉ុន្តែបច្ចុប្បន្នការប្រមូលឈើចេញបានតែ៥ទីតាំងទេរីឯ២ទីតាំងទៀតរួមមាន:ក្រុមហ៊ុនហ៊ងអានអូរយ៉ាដាវនិងក្រុមហ៊ុន ផ្នែករដ្ឋបាលព្រៃឈើបរកែវ ដែល ប្រឈមនិងផ្លូវលំបាកចូលប្រមូលពុំរួច ។
លោកបន្តទៀតថា ចំនួនម៉ែត្រគូបនៃឈើទាំងអស់នោះ ក៏ពុំទាន់បានធ្វើការវាស់វែងអោយជាក់លាក់នោះឡើយ រង់ចាំដឹកជញ្ជូនទៅដល់ទីតាំងចុងទី ទើបវាស់វែង ហើយប្រគល់អោយក្រុមហ៊ុនដេញថ្លៃក្រោមការត្រួតពិនិត្យ ពីគណៈកម្មាការថ្នាក់ជាតិ៕
ដោយ ៖ ចាប សំអាន