ខេត្តស្ទឹងត្រែង ៖ ហ្វេសប៊ុកនិងគេហទំព័ររបស់អគ្គស្នងការនគរបាលជាតិកាលពីថ្ងៃទី១៦ ខែឧសភា ឆ្នាំ២០១៧ បានចេញផ្សាយអត្ថបទទាក់ទងករណីបទល្មើសព្រៃឈើនៅទំនប់សេសាន២ដោយបានដកស្រង់ប្រភពពីពលរដ្ឋ និងអង្គការក្រៅរដ្ឋាភិបាលថាឈ្មោះ សេង និងប្រពន្ធ ដែលជាមេការក្រុមហ៊ុន [Royal Group] របស់លោកឧកញ៉ា គិតម៉េងបាននិងកំពុងតែកៀង គរ ពលរដ្ឋឲ្យចូលកាប់ឈើក្នុងព្រៃសហគមន៍ហើយដឹកជញ្ជូនចូលទៅក្នុងតំបន់បាតអាង ដើម្បីប្រែក្លាយឈើទាំងនោះឲ្យទៅជាឈើស្របច្បាប់វិញ។
ក្រៅពីនោះមានឈ្មោះ សាន ចយ និង ហឿន ប៊ុនជឿន ក៏កំពុងតែបំផុសឲ្យពលរដ្ឋកាប់ និងប្រមូលឈើរហូតដល់ស្រុកសៀមប៉ាងទៀតផងដើម្បីយកមកបញ្ចូលឲ្យក្លាយជាឈើស្របច្បាប់ក្រោមរូបភាពអាជ្ញាបណ្ណ័ស្តារបាតអាង។
ចំណែកឈើនៅក្នុងតំបន់បាតអាងវិញគឺត្រូវបានប្រគល់ឲ្យទៅឧកញ៉ាម្នាក់ឈ្មោះ ជ័យ មើលការខុសត្រូវហើយកូនចៅឧកញ៉ា ជ័យ មានឈ្មោះ ទឹម ប៊ុនលីន និង សាន ចយ ជាអ្នកមើលការខុសត្រូវក្នុងការដឹកឈើយកទៅលក់នៅប្រទេសវៀតណាមទាំងថ្ងៃទាំងយប់។គេហទំព័រអគ្គស្នងការនគរបាលជាតិបានបញ្ជាក់ថា៖ នឹងចាត់វិធានការណ៍ចំពោះក្រុមអ្នកកាប់ឈើល្មើសច្បាប់ទាំងនោះដែលបានឃុបឃិតគ្នាលួចកាប់និងដឹកជញ្ជូនឈើព្រៃសហគមន៍នៅខាក្រៅហើយដឹកចូលក្នុងបាតអាងដើម្បីបន្លំធ្វើជាឈើស្របច្បាប់។ល។
ប្រភពពីប្រជាពលរដ្ឋអ្នករកស៊ីទិញឈើពីតំបន់អាងទឹកវារីអគ្គីសនីសេសានក្រោម២ យកទៅលក់ចែកចាយនៅតាមដេប៉ូឬស្តង់លក់ឈើតាមបណ្ដាខេត្តនានា បានអោយដឹងថាក្រុមអ្នករកស៊ីលួចកាប់ឈើព្រៃសហគមន៍បន្លំដឹកចូលបាតអាងនោះសុទ្ធសឹងជាក្រុមឧកញ្ញា រកស៊ីកាប់បំផ្លាញព្រៃឈើ ប្រព្រឹត្តអំពើពុករលួយដោយពួកគេលួចលាក់រកស៊ីតែក្រុមឧកញ្ញាៗគ្នាគេ ដែលមានដូចជាឧកញ្ញា ថែ ឧកញ្ញាជ័យ និងឧកញ្ញាៗមួយចំនួនទៀត។សកម្មភាពពួកគេអាចប្រព្រឹកទៅបានយ៉ាងរលូននោះគឺគ្រាន់តែបង់លុយអោយសមត្ថកិច្ចជំនាញនៅតំបន់នោះដែលមានមេព្រៃជានាយសង្កាត់ នាយផ្នែក និងនាយខ័ណ្ឌជាការស្រេច។
នៅពេលដឹកឈើចេញពីបាតអាងម្ចាស់ឈើត្រូវបង់លុយអោយទៅខាងក្រុមហ៊ុនរបស់ឧកញ្ញាជ័យដែលជានាយទាហ៊ានក្នុងមួយរថយន្តចំនួន៣០០ដុល្លារអាមេរិកដែលមួយថ្ងៃៗឈើដែលដឹកចេញពីអាងទឹកវារីអគ្គីសនីសេសានក្រោម២នោះមានចំនួនរាប់សិបឡាន យីឌុបផ្លូវ៥ទាំអស់។
ទាក់ទងនិងករណីកាប់បំផ្លាញព្រៃឈើនៅភូមិភាគឥសាន្តប្រទេសនេះដែរ យោងតាមការចុះផ្សាយលើគេហទំព័រមួយបានចេញផ្សាយ នៅថ្ងៃទី១៦ឧសភាឆ្នាំ២០១៧ ថាទីភ្នាក់ងារស៊ើបអង្កេតផ្នែកបរិស្ថាន ក៏បានប្រកាសផ្ដល់ឯកសារ និងភស្ដុតាងបន្ថែម ដើម្បីឲ្យអាជ្ញាធរកម្ពុជាស៊ើបអង្កេតករណីលួចនាំឈើខុសច្បាប់ពីខេត្តរតនគីរីទៅប្រទេសវៀតណាម បន្ទាប់ របាយការណ៍មួយកាលពីលើកមុន ត្រូវបានក្រសួងបរិស្ថានប្រកាសថានឹងធ្វើការស៊ើបអង្កេតលើករណីនេះ។
ឯកសាររបស់អង្គការបរិស្ថានអន្ដរជាតិនេះបានរាប់បញ្ចូល រូបភាពពីផ្កាយរណបដែលបង្ហាញពីទីតាំងស្ដុកឈើធំៗក្នុងតំបន់ជាប់ព្រំដែនគ្រប់គ្រងដោយយោធាវៀតណាម ឯកសារពន្ធគយនៃការនាំចេញឈើខុសច្បាប់រាប់ពាន់ម៉ែត្រគូប ឯកសារផ្ដល់អាជ្ញាប័ណ្ណខុសច្បាប់របស់រដ្ឋាភិបាលវៀតណាមដល់ក្រុមហ៊ុនចំនួន១៦ ដែលគិតជាទំហំឈើចំនួន២៣ម៉ឺនម៉ែត្រគូប រួមទាំងវិក័យបត្រនាំចេញនាំចូលឈើពីកម្ពុជាទៅវៀតណាម មានទឹកប្រាក់ជាង៣០០លានដុល្លារ (បីរយលានដុល្លារអាមេរិក) តាំងពីខែមករាឆ្នាំ២០១៦។
ក្រៅពីនេះ ទីភ្នាក់ងារស៊ើបអង្កេតផ្នែកបរិស្ថានរកឃើញថា មានក្រុមហ៊ុនកម្ពុជាចំនួន៤បានចូលរួមក្នុងជំនួញលួចនាំឈើនេះ ដូចជា ក្រុមហ៊ុន Nam Thanh Co Wood Innovation ក្រុមហ៊ន Phat Sok Chea Trading ក្រុមហ៊ុន Pich Rithsey និងក្រុមហ៊ុន Wood Innovation Log List។អ្នកនាំពាក្យក្រសួងបរិស្ថានលោក សៅ សុភាព ឲ្យ VOD ដឹងនៅថ្ងៃពុធនេះថា លោកស្វាគមន៍ បើសិនអង្គការបរិស្ថានអន្ដរជាតិមួយនេះពិតជាចង់ជួយអាជ្ញាធរកម្ពុជាក្នុងការស៊ើបអង្កេតករណីនាំឈើខុសច្បាប់មែន។
លោកមានប្រសាសន៍ថា បច្ចុប្បន្ន អាជ្ញាធរកម្ពុជាកំពុងពិនិត្យលើរបាយការណ៍ទាំងនោះ និងថា រដ្ឋាភិបាលក៏កំពុងផ្ដោតលើការពង្រឹងការអនុវត្ត និងអភិរក្សជាក់ស្ដែង ដើម្បីដោះស្រាយបញ្ហានេះ។នៅពេលសួរថាតើរដ្ឋាភិបាលនឹងមានចំណាត់ការយ៉ាងណាចំពោះក្រុមហ៊ុននាំឈើខុសច្បាប់ទាំងនោះ លោក សៅ សុភាព ហាក់មិនបានឆ្លើយចំសំណួរទេ ប៉ុន្ដែលោកគ្រាន់តែថា គណៈកម្មាការជាតិទប់ស្កាត់ និងបង្ក្រាបបទល្មើសធនធានធម្មជាតិ ជាអ្នកចេញវិធានការជាក់ស្ដែង។
កាលពីសប្ដាហ៍មុន ទីភ្នាក់ងារស៊ើបអង្កេតផ្នែកបរិស្ថាន ដែលមានមូលដ្ឋាននៅទីក្រុងឡុងដ៍ បានចេញរបាយការណ៍មួយ ក្រោមចំណងជើងថា «ជនល្មើសមុខដដែល៖ ជំនួញឈើខុសច្បាប់របស់វៀតណាម»។ក្នុងរបាយការណ៍នោះ រកឃើញថា នៅចន្លោះខែវិច្ឆិកាឆ្នាំ២០១៦ ដល់ខែមិនាឆ្នាំ២០១៧ ទំហំឈើប្រមាណ៣០ម៉ឺនមែត្រគូបត្រូវបានលួចលាក់នាំចេញនិងធ្វើឲ្យស្របច្បាប់ពីកម្ពុជាទៅវៀតណាម ខណៈដែលកម្ពុជាបានហាមឃាត់ការនាំចេញឈើក្នុងតំបន់ការពារទៅក្រៅប្រទេស (បានសេចក្តីថា ក្រោយពីក្រុមចំរុះបង្ក្រាបបទល្មើសព្រៃ ឈើដឹកនាំដោយលោកនាយឧត្តមសេនីយ៍ សៅ សុខា ដែលបង្កើតនៅថ្ងៃទី១៥ មករា ឆ្នាំ២០១៦ បញ្ចប់បេសកកម្មបង្ក្រាបបន្ទាប់ពីរកឃើញឈើល្មើស៧ម៉ឺនម៉ែតគូបតែគ្មានអ្នកទទួល ខុសត្រូវ ។
អង្គការនេះថា ចាប់ពីដើមខែវិច្ឆិកាឆ្នាំ២០១៦ សកម្មភាពលួចកាប់ឈើខុសច្បាប់បានកើតឡើងខ្លាំងនៅតំបន់ការពារក្នុងខេត្តរតនគីរី ដូចជា តំបន់ការពារសហគមន៍ក្នុងឧទ្យានវីរជ័យ ឧទ្យានជាតិអូយ៉ាដាវ និងតំបន់ជម្រកសត្វព្រៃលំផាត់ ហើយបើគិតជាប្រាក់សំណូកគឺលើសពី១៣លានដុល្លារអាមេរិក។បើតាមរបាយការណ៍ សកម្មភាពលួចកាប់ និងនាំចូលឈើនេះ គឺដោយសារការឃុបឃិតគ្នា និងសូកប៉ាន់រវាងអាជ្ញាធរប្រទេសទាំងពីរ ដោយអង្គការនេះអះអាងថា ឈ្មួញវៀតណាមបានសូកប៉ាន់មន្ដ្រីខ្មែររាប់លាន់ដុល្លារ ដើម្បីចូលកាប់ឈើក្នុងតំបន់អភិរក្ស និងតំបន់ការពារក្នុងទឹកដីកម្ពុជា៕