ខេត្តរតនគរី ៖ លោកគ្រូ អ្នកគ្រូ ប្រមាណជាង200នាក់ ក្នុងទីរួមស្រុកបរកែវ មកជួបជុំគ្នានៅសាលាស្រុក ដើម្បីទទួលស្វាគមន៍យ៉ាងរាកទាក់ពីសំណាក់ក្រុមការងារថ្នាក់ជាតិដែលចុះពង្រឹងមូលដ្ធានរបស់ខ្លួន។ ពិធីសំណេះសំណាលនេះបានធ្វើឡើងនាព្រឹកថ្ងៃទី១៣ខែ ឧសភា ឆ្នាំ ២០១៧ វេលាម៉ោង ៨,៣០នាទី ។
ក្រោមអធិបតីភាពដ៏ខ្ពង់ខ្ពស់ឯកឧត្តម លី ធុជ ទេសរដ្ឋមន្ត្រីទទួលបន្ទុកបេសកកម្មពិសេសនិងជាប្រធានក្រុមការងារថ្នាក់ជាតិ ចុះមូលដ្ធាន ខេត្តរតនគិរី ដោយអមដំណើរ ដោយ ឯកឧត្តម គិតទ្រី អភិបាលរងខេត្តនិងមានការចូលរួមពីអស់លោកមន្ត្រីក្រសួងមន្ទីរជុំវិញខេត្ត ផងដែរ។
មានមតិសំណេះសំណាល ទៅកាន់ លោកគ្រូ អ្នកគ្រូ នាឪកាសនោះ ឯកឧត្តម ទេសរដ្ធមន្ត្រីបានពាំនាំនូវការសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៑ុនសែន និង សម្តេច គតិព្រិទ្ធបណ្ឌិតប៊ុនរ៉ានីដែលជានិច្ចជាកាល សម្តេចតែងគិតគូរ យកចិត្តទុកដាក់ពីសុខទុក្ខនិងជីវភាពរស់នៅបងប្អូនគ្រប់ពេលវេលា ។
ឯកឧត្តមបានបន្តថា ៖ លោកគ្រូ អ្នកគ្រជាមាតាបីតាទីពីររបស់សិស្សានុសិស្សគ្រប់ៗជំនាន់ ចែករំលែកចំណេះដឹង( វិជ្ជាជីវៈ) សិលធម៏ទៅដល់សិស្សគ្រប់ៗរូបជាដើម។ហើយសិស្សានុសិស្សជាទំពាំងស្នងឫស្សីជាសសរទ្រូងនៃប្រទេសជាតិយើងតទៅអនាគត។ ដូច្នេះ លោកគ្រូ អ្នកគ្រូ ត្រូវតែយកចិត្តទុកដាក់អោយបានខ្ពស់ក្នុងការបង្ហាត់បង្រៀនសិស្ស ។ ឯកឧត្តមក៏បានលើកឡើងពីការរីកចម្រើនលើគ្រប់វិស័យជាពិសេសវិស័យអប់រំជាដើម។ ក្រោមការដឹកនាំប្រកបដោយគតិបណ្ឌិតរបស់សម្តេច តេជោ យហ៊ុន សែន បាននិងកំពុងដឹកនាំនាវាកម្ពុជាឈានឆ្ពោះទៅកាន់សុខសន្តិភាពកាន់តែប្រសើរឡើងនិងការអភិវឌ្ឈន៍។
ជាចុងក្រោយ ឯកឧត្តមក៏បានរំលឹកដល់ថ្ងៃទី០៤ខែមិថុនាខាងមុខនេះបានខិតចូលមកដល់សូមលោកគ្រូអ្នកគ្រូ ព្រមទាំងសិស្សានុសិស្សដែលគ្រប់អាយុបោះឆ្នោតនិងបានចុះឈ្មោះហើយនោះសូមអញ្ចើញទៅបោះឆ្នោតអោយបានគ្រប់ៗរូប។បន្ទាប់មកឯកឧត្តមបានទទួលយកនូវសំណើររបស់លោកគ្រូអ្នកគ្រូ រាល់កង្វះខាតផ្សេងៗ ក្នុងស្រុកបរកែវ ដូចជាសាលារៀន បង្គោលរបងជាដើម។
នៅក្នុងថ្ងៃដដែលនេះផងដែរ នារសៀលម៉ោង២,៤៥នាទីឯកឧត្តមទេសរដ្ឋមន្ត្រី រួមដំណើរដោយក្រុមថ្នាក់ខេត្តបានចុះទៅដល់ស្រុក អណ្តូងមាសដើម្បីធ្វើការសំណេះសំណាល ជាមួយលោកគ្រូអ្នកគ្រូនៅទីរួមស្រុកអណ្តូងមាស ៕
ដោយ ៖ ចាប សំអាន
