ក្រចេះ ៖ ក្រុមអាជីវករលក់ដូរទំនិញ ឥវ៉ាន់ចាប់ហួយ គ្រប់មុខ នៅក្នុងផ្សារ និងនៅតាមផ្ទះលក់រាយ បោះដុំ បានយល់ច្បាស់ពីបញ្ហាប្រឈមនានាជាពិសេសការលក់ដូរទំនិញខូចគុណភាព ឲ្យទៅអ្នកប្រើប្រាស់ ដែលជាហេតុនាំឲ្យមានផលប៉ះពាល់សុខភាពសាធារណៈ ក្នុងនោះពួកគាត់ក៏បានសាទរចំពោះសកម្មភាពចុះត្រួតពិនិត្យទំនិញតាមទីផ្សារ ផ្ទះលក់ឥវ៉ាន់លក់រាយ បោះដុំ របស់មន្ត្រីកាំកុងត្រូលជាប្រចាំ ជាកត្តាធ្វើឲ្យអ្នកលក់ដូរ និងអ្នកប្រើប្រាស់កាន់តែដឹងច្បាស់បន្ថែមទៀត ក្នុងការជ្រើសរើសផលិតផលដែលមានគុណភាពល្អ។
ជាមួយនិងការសាទរនោះ ក្រុមអាជីវករក៏បានបញ្ជាក់ចំពោះមុខមន្ត្រីនៃសាខាកាំកុងត្រូលដែលដឹកនាំដោយលោក យាង បាក់ អនុប្រធានសាខា សហការជាមួយមន្ទីរពាណិជ្ជកម្មខេត្ត ចុះទៅពិនិត្យទំនិញនៅស្រុកឆ្លូង នាព្រឹកថ្ងៃទី08 ខែ ឧសភា ឆ្នាំ 2017 ដោយអះអាងថា ការលក់ដូរមុខរបរនេះសព្វថ្ងៃត្រូវមានភាពស្មោះត្រង់ទាំងតម្លៃ និងគុណភាព ដោយមិនអាចភូតភរកុហកអតិថិជនបានឡើយ កាលណាយើងនិយាយប្រាប់គេមិនពិតស្មោះត្រង់ នោះអ្នកប្រើនឹងឈប់មករកទិញយើងលើកក្រោយទៀតហើយ ជាពិសេសអារឿងទំនិញហួសដឺឡេ និងខូចគុណភាពតែម្តង ព្រោះឥឡូវអ្នកប្រើគេឆ្លាតណាស់ មុនទិញប្រើគេសុទ្ធតែពិនិត្យពិច្ច័យច្បាស់លាស់ទើបសម្រេចចិត្តយកទៅ។
ក្រុមអ្នកលក់ក៏បាននិយាយបន្ថែមដែថាកុំថាឡើយមនុស្សធំ សូម្បីតែកូនក្មេងតូចៗ ក៏ពួកគេពិនិត្យមើលកាលបរិច្ចេទ និងលេខកូដប្រភពនាំចូលដែរ បើពួកគេមើលទៅហួស គេមិនយកទេ ហើយចំណែកអ្នកលក់ក៏មិនអាចយករបស់ដែលហួសដឺឡេ ឬ ខូចគុណភាព ទុកលក់ឲ្យបន្តដែរ សុខចិត្តយករបស់ហួសទាំងនោះដុតចោលកម្ទិចចោលប្រសើរលក់ទៅវាខាត់បង់ច្រើន។
ជាមួយនឹងការលើកឡើងដោយការយល់ដឹងច្រើនពីសំណាក់ក្រុមអាជីវករខាងលើនោះដែរ មន្ត្រីសាខាកាំកុងត្រូលបានកោតសរសើដល់បងប្អូនអាជីវករក្នុងផ្សារឆ្លូងទាំងមូលថា ពួកគាត់យល់ច្បាស់ពីផលវិបាកនៃការក់ដូរផលិតផលខូចគុណភាព ជាពិសេសបានដឹងច្បាស់ពីរបៀបនៃការមើលកាលដឺឡេចំពោះទំនិញដែលមានកាលបរិច្ឆេទត្រឹមត្រូវ តែពួកគាត់នៅពុំសូវយល់ច្បាស់នៅចំនុចតូចតាចតិចតួចដូចជាការស្តុកនិងដាក់ទំនិញខ្វះស្តង់ដារ ដោយមានទំនិញប្រភេទវេចខ្ចប់ដបផ្លាស្ទិកខ្លះនៅដាក់ប៉ះពន្លឺថ្ងៃខ្លាំងជាដើម។
តែទោះជាបែបនោះក្តី មន្ត្រីនៃសាខាកាំកុងត្រូលនិងមន្ត្រីមន្ទីរពាណិជ្ជកម្មខេត្ត បានណែនាំពួកគាត់ឲ្យយល់ដឹងពីផលប៉ះពាល់ចំពោះផលិតផលជាមួយនិងកំដៅថ្ងៃខ្លាំង ដែលអាចប៉ះពាល់គុណភាពផលិតផល រួមទាំងអ្នកប្រើប្រាស់។
ជារួមបន្ទាប់ពីសកម្មភាពនៃការចុះត្រួតពិនិត្យតាមទីផ្សារអស់រយៈពេលពេញមួយព្រឹក ដែលមានការសម្របសម្រួលដោយអាជ្ញាធរស្រុក និងទទួលបានការសហការល្អពីមន្ទីរពាណិជ្ជកម្មខេត្ត និងបានចុះពិនិត្យតាមផ្ទះ តូប ឃ្លាំងស្តុក បានជាច្រើនកន្លែង កម្លាំងជំនាញបានដកហូតបានម្សៅស៊ុបរួមទាំងទឹកដោះគោហួសដឺឡេបានមួយចំនួនតូចប្រមាណជាង4គីឡូក្រាមដើម្បីដុតកំទិចចោល ។ លទ្ធផលនេះបញ្ជាក់ថា ពលរដ្ឋនិងអាជីវករស្រុកឆ្លូងពិតជាបានយល់ជ្រាប់ច្បាស់ពីផលប៉ះពាល់នៃការលក់និងប្រើប្រាស់ផលិតផលខូចគុណភាព ហើយមន្ត្រីជំនាញនៅតែបន្តចុះត្រួតពិនិត្យទំនិញតាមទីផ្សារនៃខេត្តក្រចេះតាមកាលវិភាគក្នុងមួយខែម្តង តាមបណ្តាផ្សារនីមួយៗ៕