ឯកឧត្តម វង សូត រដ្ឋមន្ត្រីក្រសួងសង្គមកិច្ចអតីតយុទ្ធជន និងយុវនិតិសម្បទា បានអញ្ជើញចុះសួរសុខទុក្ខ សំណេះ សំណាលជនរងគ្រោះដោយសារគ្រឿងញៀន កាលពីពេលកន្លងទៅថ្មីៗនេះ នៅបញ្ជាការដ្ឋានកងរាជអាវុធហត្ថខេត្តបាត់ដំបង។
ក្នុងរបាយការណ៍ពីបញ្ជាការដ្ឋានកងរាជអាវុធហត្ថខេត្ត បានឱ្យដឹងថាបញ្ជាការដ្ឋានកងរាជអាវុធហត្ថខេត្តបាត់ដំបង បានចាប់ផ្តើមទទួលយកយុវជនញៀន គ្រឿងញៀនមកអប់រំ ពីថ្ងៃទី០១ ខែតុលា ឆ្នាំ២០០៤ ដោយមានការសុំយ៉ាងទទូចពី អាណាព្យាបាល ហើយត្រូវបានពួកគាត់យកកូនចៅ មកប្រគល់ជូនឱ្យជួយអប់រំ បន្សាបសារធារញៀន កន្លងមកពួកគាត់ធ្លាប់ បានបំផ្លិចបំផ្លាញទ្រព្យសម្បត្តិ និងប្រើប្រាស់អំពើហឹង្សាក្នុងគ្រួសារ ហើយអាណាព្យាបាលគាត់ពុំមានលទ្ធភាព ក្នុងការអប់រំបាន ឡើយ ។ ពេលដែលយើងទទួលជនរងគ្រោះដំបូង ជនរងគ្រោះភាគច្រើន មានអាការៈស្គមស្លេកស្លាំង កាយសប្បទានមិនគ្រប់គ្រាន់ វង្វេងស្មារតីមិនស្គាល់ខុសត្រូវ ហើយមួយចំនួនទៀត មានជម្ងឺប្រចាំកាយទៀតផង។
រហូតដល់ថ្ងៃទី៨ ខែមេសា ឆ្នាំ២០០៦ បញ្ជាការដ្ឋានកងរាជអាវុធហត្ថខេត្តបាត់ដំបង បានទទួលថវិការដ៏ថ្លៃថ្លា ជា អំណោចផ្ទាល់របស់ សម្តេចក្តិតិព្រឹទ្ធបណ្ឌិត ប៊ុន រ៉ានីហុនសែន តាមរយៈឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស នូវទឹកប្រាក់ចំនួន ប្រាំម៉ឺនដុល្លារ សម្រាប់ សាងសង់អាគារមួយខ្នង ២ ជាន់ ធ្វើពីបេតុងប្រក់ក្បឿង ២៩ម x ៩ម សម្រាប់ឱ្យយុវជន ដែលរងគ្រោះដោយសារគ្រឿងញៀន ស្នាក់នៅ ព្រមទាំងជួយឧបត្ថម្ភថវិការ ៥ លានរៀលក្នុង១ខែ សម្រាប់ការហូបចុក របស់យុវជនមកអប់រំ មានចំនួន ២,៦៧២ ន ជាសះស្បើយមានចំនួន ២,៥៦៣ ន បានត្រឡប់ទៅលំនៅដ្ឋានវិញ ហើយបច្ចុប្បន្នកំពង់អប់រំបន្តមានចំនួន ១០៩នាក់។
ក្នុងប្រសាសន៍សំណេះសំណាលឯកឧត្តម វង សូត បានសំដែងការកោតសរសើរ និងវាយតម្លៃខ្ពស់ចំពោះការខិតខំ របស់ កងរាជអាវុធហត្ថខេត្ត ដែលបានបង្កើតកន្លែងអប់រំជនរងគ្រោះដោយថ្នាំញៀននាពេលនេះ។ ឯកឧត្តមក៏បានសំដែងការអាណិត អាសូរ ដល់យុវជនរងគ្រោះទាំងអស់ដោយបញ្ជាក់ថា ជនរងគ្រោះទាំងអស់មិនស្ថិតនៅឯកោទេ បច្ចុប្បន្នរាជរដ្ឋាភិបាលបាន ផ្តោតការយកចិត្តទុកដាក់យ៉ាងខ្លាំងចំពោះបញ្ហានេះ។ ឯកឧត្តមបានអំពាវនាវដល់យុវជនទាំងអស់ដែលជាកម្លាំងស្នូលរបស់ជាតិ ត្រូវឱ្យឆ្ងាយពីគ្រឿងញៀន និងខិតខំរៀបសូត្រដើម្បីក្លាយខ្លួនទៅជាមនុស្សមានប្រយោជន៍ចំពោះជាតិនាពេលខាងមុខ ៕