ខេត្តរតនគិរី៖ ក្រុមហ៊ុនអភិវឌ្ឍន៍ដំណាំកៅស៊ូឈ្មោះហ្ស៊ូមវ៉ាង ត្រូវអភិបាលខេត្តរតនគិរីបញ្ឈប់លែងឲ្យមានការប្រមូលឈើចូលទៅក្នុងក្រុមហ៊ុនបណ្តោះអាសន្នដរាបណាក្រុមហ៊ុននេះមិនទាន់បានបំពេញសំណុំបែបបទទៅក្រសួងកសិកម្មនោះទេ។
បទបញ្ជារបស់អភិបាលនេះគឺបានធ្វើឡើងកាលពីថ្ងៃទី០៧ ខែឧសភា ម្សិលមិញនេះក្រោយពីកងរាជអាវុធហត្ថស្រុកអូរយ៉ាដាវដឹកនាំដោយលោកសុខ មីន មេបញ្ជាការអាវុធហត្ថស្រុកឃាត់សួររកលិខិតដឹកឈើចូលទៅក្នុងក្រុមហ៊ុនោះ។
លោកសុខ មីន មេបញ្ជាការកងរាជអាវុធហត្ថស្រុកអូរយ៉ាដាវមានប្រសាសន៍កាលពីម្សិលមិញថា អភិបាលខេត្តបញ្ជាឲ្យក្រុមហ៊ុនផ្អាកការប្រមូលឈើចូលក្នុងក្រុមហ៊ុនបណ្តោះអាសន្នសិន ដរាបណាក្រុមហ៊ុនមិនទាន់បានបំពេញបែបបទទៅក្រសួងពាក់ព័ន្ធជាមុននោះទេ។
តំណាងក្រុមហ៊ុនហ្ស៊ូវ៉ាង មួយរូបសុំមិនបញ្ចេញឈ្មោះបានថ្លែងថាក្រុមហ៊ុនកំពុងតែធ្វើសំណុំឯកសារទៅថ្នាក់ខេត្តដើម្បីប្រមូលឈើទាំងនោះដាក់ចូលទៅក្នុងក្រុមហ៊ុនបង់ព័ន្ធជូនរដ្ឋ។
ប្រភពបញ្ជាក់ថាឈើមូលដែលក្រុមហ៊ុនប្រមូលនោះត្រូវក្រុមហ៊ុនអះអាងថាជាឈើដែលត្រូវគេលួចកាប់ក្នុងដែនវិនិយោគរបស់ខ្លួន ហេតុដូច្នេះហើយទើបតម្រូវឲ្យក្រុមហ៊ុនធ្វើលិខិត ឫបែបបទទៅថ្នាក់ខេត្តដើម្បីមានលទ្ធភាពប្រមូលឈើចូលក្រុមហ៊ុនដើម្បីបង់ពន្ធ។
ចំណែកនាយខណ្ឌរដ្ឋបាលព្រៃឈើលោកកែប កត់ ថ្លែងបញ្ជាក់នៅថ្ងៃទី០៨ ខែឧសភា នេះថា ឈើអស់នេះយើងបានបញ្ជាទៅមន្ត្រីមានផ្នែកនិងសង្កាត់រដ្ឋបាលព្រៃឈើ សហការជាមួយក្រហ៊ុនដើម្បីប្រមូលឈើដាក់ក្នុងក្រុមហ៊ុន ហើយសុំគោលការណ៍ទៅថ្នាក់លើ ថាតើឈើអស់នេះនិងត្រូវពិន័យឫតម្រូវអោយបង់ពន្ធ។ លោកថា យ៉ាងណាក៏ដោយក្រុមហ៊ុននិងត្រូវបន្តការប្រមូលនោះទៀត តែត្រូវរងចាំលិខិតពីថ្នាក់ខេត្តសិន។
គេកំពុងធ្ងល់ថាពេលមានគេលួចកាប់ឈើក្នុងដែន ហេតុអ្វីក្រុមហ៊ុនមិនប្តឹងមកស្ថាប័នពាក់ព័ន្ធ ឫស្ថាប័នតុលាការដើម្បីគណកម្មការមួយចុះពិនិត្យវាស់វែងវាយតម្លៃ ហើយដាក់ឲ្យបង់ពន្ធ ឫដេញថ្លៃនោះ បែរជាដឹកបញ្ចូលក្នុងក្រុមហ៊ុនរហូតអភិបាលខេត្តចេញបទបញ្ជាផ្អាកការដឹកបែបនេះ?៕
យឹម សារិទ្ធ