រតនគីរី ៖ សកម្មភាពដឹកជញ្ជូនឈើ ត្រូវបានគេមើលសង្កេតឃើញថា មានមេឈ្មួញដុះស្លែមួយចំនួន ដែលមានខ្នងបង្អែកជាអ្នកធំៗនៅក្នុងខេត្តនៅបន្តសកម្មភាពដឹកជញ្ជូនឈើយកទៅលក់នៅប្រទេសវៀតណាម បានដោយរលូន បើទោះជាពេលកន្លងមក សារព័ត៌មានក្នុងស្រុកបានធ្វើការផ្សព្វផ្សាយ ដូចជា ការសែត គេហទំព័រ ទូរទស្សន៍និងទូរទស្សន៍អនឡាញបានបញ្ចេញរូបភាពសកម្មភាពរស់រវើក និងបានបញ្ជាក់ពីចំណុចទីតាំងភូមិ.ឃុំ យ៉ាងច្បាស់ក្រឡែត ងាយស្រួលអោយឲ្យសមត្ថកិច្ចជំនាញកំណត់គោលដៅក្នុងការបង្ក្រាប ។ ប៉ុន្តែផ្ទុយទៅវិញ ឈ្មួញឈើដុះស្លែនៅបន្តដឹកជញ្ជូនបានយ៉ាងរលូនគ្មានការបង្ក្រាបសោះ ប្រជាពលរដ្ឋសង្ស័យថា សមត្ថកិច្ចនិងឈ្មួញឃុបឃិតគ្នាជាប្រពន្ធ័ «ជាក្រុមតែមួយ»។
មេឈ្មួញដុះស្លែរម្នាក់នេះ កន្លងមកអ្នកសារព័ត៌មានបានធ្វើការចុះផ្សាយជាបន្តបន្ទាប់អំពីសកម្មភាពដឹកជញ្ជូនឈើខុសច្បាប់។ ឈ្មួញឈ្មោះទូចនិងប្រពន្ធឈ្មោះណាត នេះបានប្រមូលទិញឈើគ្រប់ប្រភទ ជាពិសេសឈើប្រណិតទិញផ្ដាច់មុខម្នាក់ឯង នៅស្រុកវឿនសៃ ប្រភពបានលើកឡើងថា ដោយមានការបើកភ្លើងខៀវពីអាជ្ញាធរដែនដី និងសមត្ថកិច្ចជាប្រពន្ធ័ទើបថៅកែរដុះស្លែ ម្នាក់នេះ មិនខ្លាចញញើតក្នុងការបង្ក្រាបពីសមត្ថកិច្ចជំនាញ។
ប្រភពដដែលបានបន្តថា ៖ ឈ្មួញឈ្មោះ ទូច ណាត មានរថយន្តចំនួន4គ្រឿងសម្រាប់ដឹកជញ្ជូន គឺរថយន្តបាឡែនពណ៍ទឹកប្រាក់ចំនួន ២ គ្រឿង និងរថយន្តនិងរថយន្តវីហ្គោពណ៍ត្រាវចំនួន ២ គ្រឿង ។ រថយន្ត ៤ គ្រឿងនេះ ដឹកជញ្ជូនឈើជារាងរាល់យប់ ចេញពីចំណុច ភូមិហ្វាំង ឃុំបានប៉ុង ស្រុកវឿនសៃ ឆ្លងកាត់ស្រុកអូរជុំ ឆ្ពោះមកកាន់ឃ្លាំងស្តុបឈើរបស់ខ្លួន នៅភូមិ ថ្មី សង្កាត់ ឡាបានសៀក ក្រុងបានលុង ខេត្តរតនគីរី និងមានរថយន្តសាំយ៉ុង ជាច្រើនគ្រឿង បានមក ដឹកជញ្ជូនឈើ ចេញពីឃ្លាំងលោក ទូច ទៅលក់នៅប្រទេសវៀតណាម តាមផ្លូវជាតិលេខ78Aឆ្លងកាត់ច្រកព្រំដែនអន្តជាតិអូរយ៉ាដាវ ។
ប្រភពបានបញ្ជាក់បន្ថែមថា ពុំដែលឃើញសមត្ថកិច្ចខាងណាចេញមុនបង្ក្រាបមេឈ្មួញនេះបានម្ដងណាឡើយ ។
ប្រជាពលរដ្ឋបានរិះគន់ចំៗ មន្ត្រីជំនាញនិងអាជ្ញាធរខេត្តរតនគីរីអសមត្ថភាពក្នុងការគ្រប់គ្រងធុនធានធម្មជាតិ ឬក៏ត្រូវថ្នាំដុល្លាសណ្ដំ ងងិតភ្នែកអស់ហើយ ទើបបានជាមើលមិនឃើញសកម្មភាពដឹកជញ្ជូនឈើរបស់លោក ទូច ណាត មួយយប់ៗ ចូលក្រុងបានលុងបានដោយសេរីបែបនេះ។
ពាក់ពន្ធ័ករណីមានការចោទប្រកាន់ខាងលើនេះ អ្នកសារព័ត៌មានយើង មិនអាចសុំធ្វើការបំភ្លឺពីថ្នាក់ដឹកនាំក្នុងស្រុកវឿនសៃនិងក្រុងបាលុងបានទេ ដោយគ្មានលេខទូរសព្ទ័ទំនាក់ទំនង ៕
