រតនគិរី ៖ ឈើខុសច្បាប់រាប់សិបម៉ែតត្រីគុណ ត្រូវគេលួចដឹកយ៉ាងលាក់កំបាំងបំផុតជាច្រើនខែឆ្នាំមកហើយតាមច្រកភ្នំក្រហមចេញទៅស្រុកយួនដោយមានការឃុបឃឹតជាមួយសមត្តកិច្ចការពារព្រំដែន ។ ឈើប្រណីតខុសច្បាប់ទាំងនោះ ត្រូវបានដឹកតាមផ្លូវមួយខ្សែកាត់ព្រៃកៅស៊ូ កាត់អូរ តាក់ជ្រលងភ្នំ ដែលកន្លងមកសកម្មភាពដឹកជញ្ជូនបទល្មើសបែបនេះ ពុំធ្លាប់បានត្រូវគេជួបប្រទះនិងបង្ក្រាបនោះឡើយ។
ជាក់ស្តែង នៅវេលាម៉ោងប្រមាណ៥និង៣០នាទី ព្រឹកថ្ងៃទី៥ ខែឧសភា នេះយើងឃើញមាន រថយន្តដឹកឈើប្រណិតតម្រៀបគ្នាមួយខ្សែកំពុងធ្វើដំណើរដោយសេរីនៅក្នុងព្រៃចំការកៅស៊ូរបស់ក្រុមហ៊ុន៧៤ ក្បែរចំណុចច្រករបៀងភ្នំក្រហម ដែលជាច្រកទទួលខុសត្រូវដោយវរៈសេនាតូចនគរបាលការពារព្រំដែនគោកលេខ៦០១ចំណុះអោយវរៈសេនាធំនគរបាលការពារព្រំដែនគោកលេខ៦២៣។ក្បួនឡានដឹកឈើប្រណីតខុសច្បាប់នេះត្រូវបានកងរាជអាវុធហត្ថស្រុកអូរយ៉ាដាវ និងអាវុធហត្ថខេត្តរតនៈគីរីចាប់បង្ក្រាបបានទាន់ពេលវេលា ក្រោយពីមានបញ្ជាពីលោកឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្តរតនគិរី ។
រថយន្តដឹកឈើដែលឃាត់បាននៅក្នុងប្រតិបត្តិការបង្ក្រាបនេះ មានចំនួន៤គ្រឿង សុទ្ធតែជាប្រភេទរថយន្តឡង់គ្រិះស័រកែច្នៃ ។ចំណែក១គ្រឿងទៀត ត្រូវគេរាយការណ៍ថា បានទម្លាក់ឈើចេញ ហើយបានបើកគេចខ្លួនផុតពីប្រតិបត្តិការបង្ក្រាបនោះដោយសា ម្ចាស់រថយន្ត១គ្រឿងនោះបានដឹងអំពីការចុះបង្ក្រាបដែលរាយការណ៍ដោយអ្នកកាសែតនេះ។ មិនទាន់មានទិន្ន័យច្បាស់លាស់ ថាតើឈើដែលចាប់ទាំងនោះមានប៉ុន្មានម៉ែត្រត្រីគុណទេ។
តែបើតាមការសន្និដ្ឋានថា មិនក្រោមពី៣០ម៉ែត្រត្រីគុណនោះឡើយ។ នៅវេលាម៉ោងជាង១រសៀលថ្ងៃទី៥ឧសភាដដែលនេះ ឈើទាំងនោះ នៅមិនទាន់យកចេញអោយផុតពីចំការកៅស៊ូក្រុមហ៊ុន៧៤នោះនៅឡើយទេ ដោយសារតែផ្លូវដែលត្រូវយកវត្ថុតាងទៅកាន់ទីរួមស្រុកអូរយ៉ាដាវនោះ មានស្ថានភាពខូចខាតនិងលំបាកធ្វើដំណើរខ្លាំងពេក។
មេបញ្ជាការកងរាជអាវុធហត្ថស្រុកអូរយ៉ាដាវ លោក សុខ មីន នៅក្នុងប្រតិបត្តិការនោះបានអោយដឹងថា វត្ថុតាងទាំងនេះនឹងត្រូវដឹកទៅកាន់បញ្ជាការដ្ឋានកងរាជអាវុធហត្ថស្រុក ដើម្បីកសាងនីតិវិធី មុននឹងបញ្ជូនអោយទៅស្ថាប័នជំនាញផ្សេងទៀតនោះ។
លោក សុខ មីន បន្តថា ក្រោមបញ្ជាពីឧត្តមសេនីយ៍ត្រី គឹម រស្មី កំលាំងរបស់បានខិតខំទប់ស្កាត់លើជំនួញព្រៃឈើនេះយ៉ាងសកម្ម តាមរយៈសេចក្តីរាយការណ៍ របស់ភ្នាក់ងារសម្ងាត់ដែលផ្តល់ជូនសមត្ថកិច្ចរបស់លោក និងការចុះតាមដានដោយផ្ទាល់ផងនោះទៀត។លោកបានបញ្ជាក់ថា ឈើមួយចំនួន គឺក្រុមឈ្មួញបានទិញពីអ្នកដឹកឈើតាមម៉ូតូ។ ជាក់ស្តែង កំណាត់ឈើខ្លីៗនេះ គឺជាប្រភេទឈើដែលដឹកតាមម៉ូតូ។
សូមជម្រាបថា រយៈពេលប្រមាណជាង3ខែមកហើយ នៅចំណុចវរៈនគរបាលការពារព្រំដែនគោកលេខ៦០១ច្រករបៀងភ្នំក្រហមនេះ បានលេចឮព័ត៌មានថា មានការលួចលាក់ធ្វើជំនួញឈើខុសច្បាប់ តាមច្រករបៀងភ្នំក្រហមនេះយូរណាស់មកហើយ ដោយសារតែមានការបើកដៃពីមេប៉ុស្តិ៍ច្រករបៀងភ្នំក្រហមឈ្មោះ យ៉ាត ។ ប្រភពបាននិយាយថា រាល់ជំនួញឈើខុសច្បាប់ទៅប្រទេសវៀតណាម មិនត្រឹមតែចេញតាមច្រកភ្នំក្រហមនេះទេ គឺនៅមានច្រកមួយទៀត ហៅថា ច្រករបៀងសង្កេតការណ៍ភូមិឡំ ។
ជុំវិញការចោទប្រកាន់ប៉ុស្តិ៍សង្កេតការណ៍ទាំងពីរក្រោយពីចាប់បានភសត្តុតាងជាក់ស្តែងនេះ លោក យ៉ាត មេប៉ុស្តិ៍សង្កេតការណ៍ច្រករបៀងភ្នំក្រហម មិនអាចស្វែងរកការបំភ្លឺតាមប្រព័ន្ធទូរស័ព្ទបានទេ ដោយសារតែទូរសព្ទចូលគ្មានអ្នកលើក។ ដោយឡែក ច្រករបៀងសង្កេតការណ៍ភូមិឡំក៏ មិនអាចស្វែងរកការទំនាក់ទំនងបានឡើយ។ ប៉ុន្តែនៅមុននេះបន្តិច មេប៉ុស្តិ៍ច្រករបៀងភ្នំក្រហម លោក យ៉ាត បានប្រាប់កាសែតថា មូលហេតុមានការចាប់បទល្មើសនេះ ដោយសារតែ នៅរាត្រីនោះ ឈ្មួញសុំចេញតែលោកមិនអោយចេញទេថ្ងៃនេះ?? ។
ទាក់ទងនិងការចាប់បង្ក្រាបបាបទល្មើសដឹកឈើប្រណិតចេញទៅស្រយកយួនតាមតំបន់ដែលទទួលខុសត្រូវដោយអង្គភាពវរៈសេនាធំនគរបាលការពារព្រំដែនលេខ៦២៣នេះលោក ងួន សុវណ្ណា ហៅ អូនធំ ដែលជាមេបញ្ជាការ បានអោយដឹងនៅរសៀលថ្ងៃដដែលនេះថា សកម្មភាពបទល្មើសនេះគឺតិចតួចទេ បើចង់ចាប់សូមចាប់តាមផ្លូវលេខ១៩ គឺមានច្រើនជាងនេះ(កន្លែងលោកទទួលខុសត្រូវ)ទៅទៀត៕
ដោយៈ យឹម សារិទ្ធិ