ខេត្តព្រះវិហារ ៖ រថយន្តប៉ាកុងដឹកជញ្ជូនឈើហ៊ុប១គ្រឿងមានផ្ទុកឈើមូល ក្នុងចំណោមរថយន្ត២គ្រឿង ដែលគេស្គាល់ថា ជារបស់ក្រុមហ៊ុនដួងស្រួចកាលពីល្ងាចថ្ងៃ២ឧសភា ត្រូវបាន មន្ត្រីអង្គការអភិរក្សព្រៃឈើ និងសត្វព្រៃ (WCF)ឃាត់ចាប់នៅចំណុចផ្លូវបំបែក ភូមិកំពេញ ឃុំយាង ស្រុកជាំក្សាន្ត ខេត្តព្រះវិហារ ។ សេចក្តីរាយការណ៍បានឲ្យដឹងថា រថយន្តដឹកឈើរបស់ក្រុមហ៊ុនឌួងស្រួចនេះ បានដឹកជញ្ជូនឈើចេញពីក្នុងព្រៃសហគមន៍ឈើភ្លើងកោងយ៉ោង និងព្រៃសហគមន៍ព្រះរការ ស្ថិតក្នុងឃុំយាង ស្រុកជាំក្សាន្ត នាំចូលមកក្នុងក្រុមហ៊ុនដួង ស្រួច ដែលមានមូលដ្ឋាន នៅក្នុងដែនដីរដ្ឋបាលស្រុកជាំក្សាន្ត។
មន្ត្រីមូលដ្ឋានបានបង្ហើបឲ្យដឹងថា សុពលភាពក្នុងការប្រើប្រាស់លិខិតអនុញ្ញាតិ ( PC ) ពីរដ្ឋបាលព្រៃឈើរនបស់ក្រុមហ៊ុនដួង ស្រួចនេះ នោះ គឺបានផុតកំណត់ទៅហើយ ។ពេលនេះមេការក្រុមហ៊ុននេះ កំពុងរត់ការបន្ត ( PC )ដើម្បីធ្វើការប្រមូលទិញឈើពីតាមបណ្តាព្រៃសហគមន៍ និងព្រៃការពាររបស់រដ្ឋមួយចំនួន ដឹកជញ្ជូនយកមកទុកនៅក្នុងក្រុមហ៊ុន អារពុះ និងច្រៀកដោយម៉ាស៊ីនរ៉ៃធំៗ ដើម្បីដឹកជញ្ជូនតាមរថយន្តធំៗនៅពេលយប់ យកទៅលក់ឆ្លងខេត្តបានប្រាក់កម្រៃយ៉ាងខ្ពស់។
ទាក់ទងនិងសកម្មភាបកាប់បំផ្លាញព្រៃឈើបង្កឡើងដោយក្រុមហ៊ុនដួងស្រួចនេះសេចក្តីរាយការណ៍បានបន្តទៀតថា មន្ត្រីសហគមន៍ការពារព្រៃឈើទាំងនោះ បានរងការរិះគន់ថា បានឃុបឃិតគ្នាបង្កើតឲ្យមានបទល្មើសព្រៃឈើ ហើយបើកដៃឲ្យឈ្មួញចូលកាប់បំផ្លាញព្រៃឈើ ដោយ១ដើមទទួលបានប្រាក់លាភសក្ការៈចំនួន២ម៉ឺនរៀល ដែលក្នុង១ថ្ងៃៗព្រៃឈើសហគមន៍បានរងការកាប់បំផ្លាញរាប់សិបដើម។
ប្រធានអភិរក្សព្រៃឈើ និងសត្វព្រៃ(WCF) លោកស៊ុន គង់ បានប្រាប់តាមទូរស័ព្ទឲ្យដឹងនៅរសៀលថ្ងៃ៣ឧសភានេះថា កម្លាំងការពារដែនជម្រកសត្វព្រៃ ពិតជាបានចុះឃាត់រថយន្តប៉ាកុងដឹកឈើហ៊ុបបាន១គ្រឿង ក្នុងចំណោម២គ្រឿងនោះមែន កាលពីម៉ោងជាង៥ល្ងាចថ្ងៃ២ឧសភាម្សិលមិញ ត្រង់ចំណុចផ្លូវបំបែក ភូមិកំពេញ ឃុំយាង ស្រុកជាំក្សាន្ត ដោយរថយន្តនោះបានផ្ទុកឈើមូលចំនួន៥ដើម បញ្ជូនមកកាន់ស្នាក់ការអភិរក្សព្រៃឈើ និងសត្វព្រៃ(WCF) ដើម្បីកសាងសំណុំរឿងតាមនីតិវិធី។ លោកថា មូលហេតុដែលមិនបានឃាត់រថយន្តប៉ាងកុង១គ្រឿងទៀត នាំយកមកកាន់ស្នាក់ដែនជម្រកសត្វព្រៃនៅគ្រានោះ ដោយសារតៃកុងរយន្តនោះបានរត់គេចខ្លួន ហើយគ្មានអ្នកបើក ឯកម្លាំងលោកតិច ម្យ៉ាងព្រៃក៏ជ្រៅ មេឃក៏ភ្លៀងខ្លាំង និងយប់ទៅហើយ តាមពិតរយន្តដែលបំរើឲ្យការដឹកជញ្ជូនបទល្មើសព្រៃឈើនោះ លោកត្រូវតែរឹបអូស តែដោយសារជួបឧបសគ្គបែបនេះ។ ចំពោះត្រង់ពាក្យចរចាមរាមថា ក្រុមមន្ត្រីលោកបានចាប់រថយន្តដឹកឈើពីរគ្រឿង ហើយដោះលែង១គ្រឿងជាថ្នូរនឹងប្រាក់៣ពាន់ដុល្លារនោះ គឺជារឿងមិនពិតនោះទេ។
ករណីខាងលើនេះ ប្រធានមន្ទីរបរិស្ថានខេត្តព្រះវិហ៊ារ លោកអ៊ា សុខា បានប្រាប់កាសែតថា ការចុះបង្ក្រាបរថយន្តប៉ាកុងដឹកឈើមូលខាងលើនោះ លោកមិនបានដឹងថា ក្រុមមន្ត្រីអភិរក្សព្រៃឈើ និងសត្វព្រៃ(WCF) ឃាត់បានរថយន្តប៉ុន្មានគ្រឿង និងឈើហ៊ុបប៉ុន្មានដើមច្បាស់លាស់នោះទេ តែលោកគ្រាន់តែដឹងថា នៅល្ងាចថ្ងៃ២ឧសភាម្សិលមិញ ក្រុមមន្ត្រីWCF បានចុះធ្វើការបង្ក្រាបរថយន្ត ដែលកំពុងធ្វើសកម្មភាពដឹកជញ្ជូនឈើមូលនោះ ប៉ុណ្ណោះ។
ទាក់ទិននឹងរឿងកាប់ឈើនៅក្នុងព្រៃសហគន៍ខាងលើនោះដែរ មាន សេចក្តីរាយការណ៍បានឲ្យដឹងថា មានរថយន្តប៉ាកុងដឹកឈើហ៊ុបពីរគ្រឿង ចេញពីព្រៃសហគមន៍ឈើភ្លើងកោងយ៉ោង និងសហគមន៍ព្រៃក្តា ដែលរថយន្តទាំងពីរគ្រឿងនោះ មានម្ចាស់ឈ្មោះ ម៉ាច និងប្អូន ឈ្មោះ អូន ស៊ីឈ្នួលដឹកជញ្ជូនឲ្យមន្ត្រីយោធាមួយរូប នៅក្នុងអង្គភាពកងពលធំអន្តរាគមន៍លេខ៣ ថ្នាក់ឧត្តមសេនីយ៍ត្រីយោធា មានឈ្មោះឈិន វណ្ណនី ។
តាមការកត់សម្គាល់មានសេចក្តីរាយការណ៍ពីប្រជាពលរដ្ឋបានឲ្យដឹងថាៈបច្ចុប្បន្ននេះក្រុមហ៊ុនដួងស្រួចដែលមានខ្នងបង្អែកជាទាហ៊ានបាននិងកំពុងសកម្មក្នុងការកាប់បំផ្លាញព្រៃឈើនៅខេត្តព្រះវិហ៊ារនិងរាលចូលមកខេត្តស្ទឹងត្រែងដើម្បីនាំចេញក្រោមរូបភាពអភិវឌ្ឍន៍ជូនយោធិន! ៕
