ខេត្តឧត្តរមានជ័យ៖ រថយន្តកាមរីបាឡែនមួយគ្រឿងដឹកឈើក្រញូងពេញ ដែលប្រជាពលរដ្ឋនិយាយថា៖ របស់មេឈ្មួញវៀតណាមម្នាក់ ខណៈកំពុង បានក្រឡាប់ធ្លាក់ពីលើផ្លូវចាក់ឈើចោលអស់កាល ពីល្ងាចថ្ងៃទី៣០ ខែមេសា ឆ្នាំ២០១៧ ស្ថិតនៅជាប់ផ្លូវយុទ្ធសាស្ត្រព្រំដែន ក្នុងភូមិទំនប់លើ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
ប្រជាពលរដ្ឋដែល ឃើញហេតុការនិយាយថាម្ចាស់រថយន្តនេះខឹងសម្បារយ៉ាងខ្លាំង ឮថាបញ្ជាឲ្យកូនចៅរបស់ខ្លួនដុតរថយន្តចោល តែបំណងចង់បំបាត់ភស្ដុតាងនេះ មិនបានសម្រេចឡើយ ព្រោះត្រូវបានប្រជាពលរដ្ឋនៅកន្លែងកើតហេតុឃាត់។
ប្រជាពលរដ្ឋនៅកន្លែងកើតហេតុបានប្រប់អោយដឹងថា មុនពេលកើតហេតុ គេឃើញរថយន្តដឹកឈើខាងលើ បើកបរយ៉ាងលឿន ក្នុងទិសដៅពីកើតទៅលិច តាមដងផ្លួវគ្រួសក្រហម ស្រាប់មកដល់ផ្លូវបំបែកចូលភូមិ រថយន្តក៏ជ្រុលចង្កូត ក្រឡាប់ចូលទឹករណ្តៅអេស្ការកាយធ្វើផ្លូវ ហើយភ្លាមៗនោះ ក៏មានមនុស្សពីរទៅបីនាក់ បើករថយន្តដឹកតៃកុងរថយន្តកាម៉ារី ចេញទៅបាត់។ មួយសន្ទុះក្រោយមក ក៏មានមនុស្សជាង១០នាក់ ជិះរថយន្តម៉ាកហាយឡែនឌ័រមួយគ្រឿង និងរថយន្តកាម៉ារីឆ្លាមមួយទៀត បានបើករថយន្តមក បំណងប្រុងដុតរថយន្តដឹកឈើគ្រញូងនោះចោល តែត្រូវបានប្រជាពលរដ្ឋ ដែលនៅកន្លែងកើតហេតុឃាត់ទាន់ រួចហើយក៏បើករថយន្តចេញទៅបាត់។
ក្រោយកើតហេតុ រថយន្ត និងវត្ថុតាងឈើគ្រញូង ត្រូវសមត្ថជំនាញរដ្ឋបាលព្រៃឈើនាំយកទៅវាស់វែងនិងរក្សាទុកនៅ ទីស្នាក់ការ។ ប្រភពពីសមត្ថកិច្ចបានឱ្យដឹងថា រថយន្តកាមរីបាឡែន ដឹកឈើគ្រញូង ខាងលើនេះជារបស់ថៅកែឈ្មោះ ខ្វៀង ធីម៉ៃ ហៅយាយម៉ៃ ជាជនជាតិវៀតណាម ដែលជាឈ្មួញរកស៊ីឈើគ្រញូង ដ៏សកម្មប្រចាំស្រុកអន្លង់វែង និងស្រុកត្រពាំងប្រាសាទ។
សូមបញ្ជាក់ផងដែរថា កាលពីថ្ងៃទី២២ ខែមេសាឆ្នាំ២០១៧កន្លងទៅនេះ ក្រុមអ្នកកាសែតប្រចាំនៅខេត្តឧត្តរមានជ័យ ២ទៅ៣នាក់ ត្រូវបានកូនចៅ ថៅកែឈើគ្រញូងជនជាតិវៀតណាមរូបនេះ ដេញវាយព្រមទាំងវាយរថយន្តផងដែរដោយសារក្រុមអ្នកកាសែត បាននាំគ្នាថតយករូបភាពស្តីពីសកម្មភាពជ្រៀកឈើគ្រញូង មួយនៅក្នុងចំការស្វាយចន្ទីមួយកន្លែង នៅភូមិទំនប់លើ ឃុំត្រពាំងប្រីយ៍ស្រុកអន្លង់វែង ខេត្តឧត្តរមានជ័យ។
ក្រុមអ្នកកាសែត ដែលរងគ្រោះដោយការប្ររមាថ ពីក្រុមឈ្មួញឈើគ្រញូង បានដាក់ពាក្យបណ្តឹងទៅតុលាការរួចហើយ តែរហូតមកដល់ពេលនេះ មិនទាន់ដឹងពីចំណាត់ការរបស់តុលាការនៅឡើយទេ។ទោះជាយ៉ាងណា រហូតមកដល់ថ្ងៃនេះផងដែរ យាយម៉ៃនៅតែបន្តដឹកឈើក្រញូងដោយពុំខ្លាចញញើតសមត្ថកិច្ចអ្វីឡើយ! ៕
