ខេត្តរតនគិរី៖ ឯកឧត្តម លី ធុជ ប្រធានក្រុមការងាចុះពង្រឹងខេត្តរតនគិរី និងឯកឧត្តមថង សាវុន គណអភិបាលខេត្តនៅថ្ងៃទី៣០ ខែមេសា នេះបានចុះជួបសំណេះសំណាលជាមួយសមាជិក សមាជិកាគណបក្សប្រជាជនក្នុងស្រុកអូរយ៉ាដាវ និងស្រុកលំផាត់ ក្នុងថ្ងៃតែមួយ។
ក្នុងជំនួនជាមួយសមាជិក សមាជិកានោះឯកឧត្តមលី ធុជ និងឯកឧត្តមថង សាវុន អភិបាលខេត្តបានប្រាប់ទៅសមាជិករបស់ខ្លួនឲ្យត្រៀមបោះឆ្នោតជូនគណបក្សប្រជាជន។
ក្នុងជំនួបសំនេះសំណាលសាកសួរសុខទុក្ខលោកគ្រូ អ្នកគ្រូ ដែលជាសមាជិក សមាជិកាគណបក្សប្រជាជនកម្ពុជា ទាំងនៅក្នុងស្រុកអូរយ៉ាដាវ និងស្រុកលំផាត់នោះ ឯកឧត្តមបានប្រាប់ទៅសមាជិកទាំងអស់សូមត្រៀមរៀបចំឯកសារឲ្យបានគ្រប់គ្រាន់ដើម្បីចូលរួមបោះឆ្នោតបានគ្រប់ៗគ្នានាថ្ងៃទី០៤ ខែមិថុនា ឆ្នាំ២០១៧ ខាងមុខនេះ គឺបោះឆ្នោតជូនគណបក្សប្រជាជនកម្ពុជា។ លោកថាការបោះឆ្នោតជូនគណបក្សប្រជាជន គឺដើម្បីបន្តថែរក្សាសន្តិភាពនិងការអភិវឌ្ឍន៍ បោះឆ្នោតអោយគណបក្សប្រជាជនកម្ពុជា គឺបោះឆ្នោតអោយខ្លួនឯង។
ឯកឧត្តមមានប្រសាសន៍បញ្ជាក់ថាសមិទ្ធិផលជាច្រើនបានកើតឡើងក្រោយសង្គ្រាមគឺទទួលបានមកពីការខិតខំប្រឹងប្រែងអភិឌ្ឍន៍ពីបាតដៃទទេរបស់គណបក្សប្រជាជនកម្ពុជាជាពិសេសអភិវឌ្ឍន៍លើធនធានមនុស្ស។ រយៈពេល៣៨ឆ្នាំកម្ពុជាបានអភិវឌ្ឍន៍លើផ្នែកសេដ្ឋកិច្ចនិងនយោបាយហើយនិងបានបញ្ជប់នូវសង្គ្រាមបង្ហូរឈាមដែលធ្វើឲ្យកម្ពុជាប្រែក្លាយទៅជាប្រទេសមួយមានឈ្មោះ មានមុខមាត់នៅលើឆាកអន្តរជាតិ ដោយផ្តើមចេញពីនយោបាយឈ្នះឈ្នះរបស់នាយករដ្ឋមន្ត្រីហ៊ុនសែន។
លោកបានមានប្រសាសន៍ថាកម្ពុជាក្រោមការដឹកនាំរបស់សម្តេចនាយករដ្ឋមន្ត្រីហ៊ុន សែនគឺបាននិងកំពុងយកចិត្តទុកដាក់និងផ្តល់អាទិភាពយ៉ាងខ្លាំងលើវិស័យសុខាភិបាលជាពិសេសគឺវិស័យអប់រំតែម្តង។ ជាមួយគ្នានោះរាជរដ្ឋាភិបាលបានខិតខំប្រឹងប្រែងតាមរយៈការតម្លើងប្រាក់បៀវត្ស ប្រាក់ឧបត្ថម្ភជូនដល់មន្ត្រីរាជការពិសេសលោកគ្រូ អ្នកគ្រូនិងវិស័យសុខាភិបាល។
ឯកឧត្តមបានមានប្រសាសន៍ថា តាមរយៈការផ្តល់ចំណេះដឹងពីលោកគ្រូ អ្នកគ្រូ បានធ្វើឲ្យក្មួញៗដែលជាទំពាំងស្នងឫស្សី ក្លាយទៅជាធនធានមនុស្សយ៉ាងសំខាន់នៅទូទាំងប្រទេស ដែលជាកក្តាធំរុញអោយប្រទេសកាន់តែមានការអភិវឌ្ឍន៍ថែមមួយកំរិតទៀត ហើយធនធានទាំងនោះបាននិងកំពុងប្រែក្លាយខ្លួនជាអ្នកបំរើសង្គមតាមបណ្តាលមន្ទីរ ក្រសួង វិស័យផ្សេងៗ។
ក្នុងឱកាសពិធីសំណេះសំណាលនោះ លោកគ្រូ អ្នកគ្រូ នៅវិទ្យាល័យជ័យឧត្តមក្នុងស្រុកលំផាត់ បានឡើងថ្លែងអំណរគុណដល់សម្តេចនាយករដ្ឋមន្ត្រីហ៊ុន សែន ដែលបានបន្ថែមសាលា និងទីចាត់ការថ្មីសំរាប់ពួកគាត់។
នៅចុងបញ្ចប់ពិធីសំណេះសំណាលក្រុមការងារថ្នាក់ជាតិ និងក្រុមការងារថ្នាក់ខេត្តរួមទាំងថ្នាក់ស្រុកផងនោះបានចែកអំណោយសារុង និងថវិកាមួយចំនួនដល់សមាជិកសមាជិកាផងដេរ៕
យឹម សារិទ្ធ
