ថ្ងៃនេះពិតជាថ្ងៃដ៏មហាឡារិក អធិកអធម និងពោរពេញទៅដោយក្តីសោមនស្សរីករាយជៅអនេក ដែលយើងទាំងអស់គ្នា បានមកជួបជុំ ប្រារព្វធ្វើកិច្ចអបអរខួបអនុស្សាវរីយ៍លើកទី៣៦ ទិវាកំណើតរណសិស្ស ២ធ្នូ ជាប្រវត្តិសាស្ត្រដែលបានរំដោះ និងសង្គ្រោះជាតិមាតុភូមិ និងប្រជាជនកម្ពុជាឱ្យរស់រានមានជីវិតឡើងវិញ រួចចាកផុតលើគ្រោះមហន្តរាយ និងការកាប់សម្លាប់ នៃ របប កម្ពុជាប្រជាធិបតេយ្យរបស់ពួក ប៉ុល ពល។
នេះជាសុន្ទរកថាសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា ប្រធានរដ្ឋសភា និងជា ប្រធានក្រុមប្រឹក្សាជាតិ រណសិស្សសាមគ្គី អភិវឌ្ឍន៍មាតុភូមិកម្ពុជា អានដោយឯកឧត្តម ច័ន្ទ សុផល អភិបាលនៃគណអភិបាលខេត្ត មានក្នុងពិធីខួបអនុស្សាវរីយ៍ លើកទី៣៦ ទិវាកំណើត រណសិស្សសាមគ្គីអភិវឌ្ឍន៍មាតុភូមិកម្ពុជា កាលពីថ្ងៃទី ខែធ្នូ នៅមហោស្របស្ទឹង សង្កែ ក្រោមការនិមន្ត និងអញ្ជើញចូលរួមពីព្រះសង្ឃមន្ត្រីរាជការកងកម្លាំងប្រដាប់អាវុធលោកគ្រូអ្នកគ្រូ សិស្សានុសិស្ស និង ប្រជាពលរដ្ឋយ៉ាងច្រើនកុះករ ។
ឯកឧត្តមបានបន្តទៀតថា ផ្អែកលើមូលដ្ឋាននេះហើយ ដែលធ្វើឱ្យប្រជាជនកម្ពុជាយើង នៅចងចាំ បានថា រណសិស្ស២ធ្នូ គឺជៅបុព្វការី ដ៏មានមហាគុណូបក្តារៈចំពោះជាតិ និងប្រជាជនកម្ពុជា ស្របនិងទិសស្លោកជាសច្ចធម៌ ប្រវត្តិសាស្ត្រថាមានថ្ងៃ២ធ្នូ ទើបមានថ្ងៃ៧មករា មានថ្ងៃ៧មករា ទើបមានអ្វីៗដូចសព្វថ្ងៃនេះ។ យើងទាំងអស់គ្នាសូមប្រកាសជា ឱឡារិកបន្ថែមទៀតថា រណសិស្ស២ធ្នូ មិនត្រឹមតែសង្គ្រោះយើងទាំងអស់គ្នាឱ្យផុតពីគ្រោះមហន្តរាយនៃរបបប្រល័យពូជសាសន៍ប៉ុណ្ណោះទេ ប៉ុន្តែរណសិស្ស២ធ្នូ នៅបានជួយសង្គ្រោះកសាង និងអភិវឌ្ឍន៍សង្គមជាតិ នៅគ្រប់ទិសទី ធ្វើឱ្យមាតុភូមិកម្ពុជា មានការ កែប្រែ មុខមាត់ថ្មីជាបន្តបន្ទាប់ ។
ថ្ងៃ២ធ្នូ ឆ្នាំ១៩៧៨ រណសិស្សសង្គ្រោះជាតិកម្ពុជា បច្ចុប្បន្នដូរឈ្មោះថា រណសិស្សសាមគ្គី អភវិឌ្ឍន៍មាតុភូមិកម្ពុជា ដែលជា អង្គការចាត់តាំងមហាជនមួយឈានមុខ របស់គណបក្សប្រជាជនកម្ពុជា បានបដិសទ្ធិឡើងក្នុងតំបន់រំដោះ នាភូមិជើងឃ្លូ ស្រុកស្នួល ខេត្តក្រចេះ ប្រជាជនគ្រប់ទិសទីបានក្រោកឈររួមគ្នាជាកំលាំង មហាសាមគ្គីជាតិ វាយផ្តួលរំលំរបបកម្ពុជាប្រជាធិបតេយ្យ រហូតបានជ័យជំនះ ៧ មករា ១៩៧៩ ។
បច្ចុប្បន្នប្រជាជនកម្ពុជា រស់នៅយ៉ាងសុខុដុមរមនា ក្នុងសន្តិភាព សេរីភាព និងសន្តិសុខ ដ៏ប្រសើរហើយកំពង់រួមសាមគ្គីឈានទៅមុខ លើមាគា៍នៃការអភិវឌ្ឍន៍ ដោយផ្អែកលើមូលដ្ឋាននៃសមិទ្ធិផលនានា ដែលសម្រេចបានកន្លងមក។ ពិសេសជោគជ័យលើគ្រប់វិស័យក្នុងឆ្នាំ២០១៤នេះ បានពង្រឹងថែមទៀតនូវមូលដ្ឋានគ្រឹះ សម្រាប់បន្តការអភិវឌ្ឍន៍សេដ្ឋកិច្ច និងកាត់បន្ថយភាពក្រីក្ររបស់ប្រជាជន។ ជោគជ័យនិងក្តីសប្បាយរីករាយ ដែលយើងទទួលបាននៅថ្ងៃនេះ គឺមានប្រភពពីស្មារតី២ធ្នូ និងជ័យជំនះ ៧មករា ដែលបានបំភ្លឺបង្ហាញផ្លូវយើងជានិច្ច ក្នុងរយៈពេល ៣៦ឆ្នាំកន្លងមក។ បច្ចុប្បន្នយើងអាចមើលឃើញផ្ទាល់ភ្នែកនូវសមិទ្ធិផលលើគ្រប់ វិស័យដ៏ច្រើនស្អេកស្កះ នៅគ្រប់វិស័យទីដែលកើតចេញពីការប្រឹងប្រែងរបស់យើងទាំងអស់គ្នានេះ ៕