ឧត្តរមានជ័យ ៖ មន្ត្រីកងរាជអាវុធហត្ថស្រុកត្រពាំងប្រាសាទ ចំនួន៣នាក់ត្រូវបានប្រជាពលរដ្ឋ២នាក់ បានចោទប្រកាន់ថា បានចាប់វាយដំទៅលើពួកគាត់ឲ្យរងរបួសបែកមុខបែកមាត់ កាលពីម៉ោង៣រសៀល នាថ្ងៃទី១៨ ខែមេសា ឆ្នាំ២០១៧ពេលកមពុងជិះម៉ូតូឌុបគ្នា នៅចំណុចលើផ្លូវជាតិទល់មុខមណ្ឌលសុខភាពស្រុក ត្រពាំងប្រាសាទ ខេត្តឧត្តរមានជ័យ ។ ជនបង្កទាំង ៣នាក់ រួមមាន ទី១ឈ្មោះ សោម សុផល ទី២ឈ្មោះ ហៀង សុភាព និងទី៣ឈ្មោះ លី ។ អ្នកទាំង៣ ជាមន្ត្រីកងរាជអាវុធហត្ថស្រុកត្រពាំងប្រាសាទ។
ជនរងគ្រោះទី១ឈ្មោះ សន បូរ៉ា ភេទប្រុស អាយុ២៥ឆ្នាំ និងទី២ឈ្មោះ អឿន ស្រីល័ក្ខ ភេទស្រី អាយុ១៩ឆ្នាំ។ អ្នកទាំង២ជាគូដណ្តឹងនឹងគ្នា មានទីលំនៅភូមិឃុំ ស្រុកត្រពាំងប្រាសាទ ខេត្តឧត្តរមានជ័យ។ តាមការរៀបរាប់ពីជនរងគ្រោះទាំងពីរនាក់ថា មុនពេលកើតហេតុ រូបគេទាំង២ បានជិះម៉ូតូចេញពីផ្ទះសំដៅទៅផ្សារ មានទិសដៅពីកើតមកលិច។ លុះដល់ចំណុចកើតហេតុ ស្រាប់តែមានរថយន្តមួយគ្រឿង បំពាក់ស៊ីរ៉ែន និងមានស្លាកសម្គាល់ជាស្ថាប័នកងរាជអាវុធហត្ថស្រុកត្រពាំងប្រាសាទ ជិះមកក្បែរ ហើយចុះមកវាយពួកគេឲ្យរងរបួសបែកមុខមាត់តែម្តង ហើយក៏បើករថយន្តចេញទៅ។
ពាក់ព័ន្ធនឹងការចោទប្រកាន់ខាងលើ លោក គង់ តារា មេបញ្ជាការកងរាជអាវុធហត្ថស្រុកត្រពាំងប្រសាទ បានហាមតាមទូរសព្ទថា រឿងនេះ មិនបាច់ផ្សាយទេ ព្រោះរូបលោកក៏មិនដឹងមូលហេតុច្បាស់លាស់ដែរ ដោយសារលោករវល់នៅក្រុងភ្នំពេញនៅឡើយ។
ជនរងគ្រោះដែលសុខៗត្រូវគេមកវ៉ៃពកមុខមាត់កំពុងដង្ហោយរកយុត្តិធម៌ពីមន្ត្រីមានសមត្ថកិច្ច។ កំពង់ចាំមើលថា តើជនបង្កហេតុអាចគេចខ្លួនពីសំណាញ់ច្បាប់ឬយ៉ាងណា?។
សូមបញ្ជាក់ដែរថា៖មន្ត្រីនៃអង្គភាពប៉េអឹមស្រុកត្រពាំងប្រាសាទខេត្តឧត្តរមានជ័យធ្លាប់កើតមានរឿងអាស្រូវជាំច្រើនករណីយមកហើយដូចជាបាញ់បោះសេរីចាប់វាយដកហូូតសម្ភារៈ របស់អ្នកកាសែតជាដើម។
