ខេត្ដរតនគិរី ៖សមាជិកគណបក្សហ្វ៊ុនស៊ិនប៉ិច និងសង្គ្រោះជាតិចំនួន ១២រូប នៅសង្កាត់យក្សឡោម បានចុះចូលមករួបរួមជាមួយគណបក្សប្រជាជនកម្ពុជា ក្រោយពីពួកគាត់លែងមានជំនឿលើថ្នាក់ដឹកនាំតទៅទៀត។ ការចុះចូលរបស់សមាជិកគណបក្សទាំងពីនេះ គឺត្រូវបានគណបក្សប្រជាជនធ្វើពិធីទទួលនៅព្រឹកថ្ងៃទី ២០ មេសានេះ នៅក្រោមម្លប់ឈើដ៏ត្រជាក់ក្នុងរមណីយដ្ឋានបឹងយក្សឡោម ក្នុងសង្កាត់យក្សឡោម ក្រុងបានលុង ខេត្ដរតនគិរី ។ ការចុះចូលសមាជិកថ្មីចំនួន ១២ រូបនេះ គឺនៅបន្ទាប់ពីពលរដ្ឋជិត ២០០០ នាក់ស្មើនឹងជាង ៤០០ គ្រួសារនៅភូមិគងធំ ឃុំប៉ាតេ ស្រុកអូរយ៉ាដាវ បានចូលមកគណបក្សប្រជាជនដូចគ្នានេះដែរ កាលពីថ្ងៃទី ០៨ ខែមេសា កន្លងទៅនេះ។ សមាជិកទាំង ១២ រូបនោះ គឺ ១០ រូបមកពីគណបក្សហ្វ៊ុនហ្វ៊ុនស៊ិនប៉ិច និង 2 រូបទៀត មកពីគណបក្សសង្គ្រោះជាតិ។
នៅក្នុងពិធីទទួលនោះ ពួកគេបានសម្ដែងការខកចិត្តចំពោះគណបក្សដែលគេបានចូលដែលការចូលគណបក្សប្រជាជននេះ បានសំអាងថា ជាគណបក្សដែលសន្យាហើយធ្វើ មិនដូចគណបក្សដែលពួកគាត់ លង់ខ្លួន គឺមិនមានកាអភិវឌ្ឍន៍អ្វីទាល់តែសោះ ។
អនុប្រធានគណបក្សប្រជាជនខេត្តរតនគិរី ឯកឧត្ដម ណាប់ ប៊ុនហេង មានប្រសាសន៍ថា រាជរដ្ឋាភិបាលក្រោមការដឹកនាំរបស់សម្ដេចនាយយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា បាននិងកំពុងខិតខំខ្លាំងអំពីការថែរក្សាសន្តិភាព ដែលបានមកពីការលំបាក។ សន្តិភាពពេញលេញនៅកម្ពុជា ទើបតែកើតមាន១៩៩៨ ដែលុបបំបាត់ចោលបានទាំងស្រុងនូវរបបយោធា និងនយោបាយរបស់ខ្មែរក្រហម ហើយបានធ្វើសមាហរណកម្ម ក្នុងសមាគមន៍ជាតិ មានមុខមាត់ស្មើភាព ដោយមិនចាត់ទុកជាសត្រូវទេ ហើយបច្ចុប្បន្នក៏ដូចគ្នាដែរ គ្រប់គណបក្សទាំងអស់ មិនត្រូវប្រកាន់និន្នាការគណបក្សណាទេ ឲ្យតែចូលមករួបរួមជាមួយសមាជិកគណបក្សប្រជាជនកម្ពុជាដោយស្មោះស្ម័គ្រ រឺមិនប្រឆាំងដោយបិទភ្នែកតទៅទៀត គឺខិតខំទាំងអស់គ្នាអភិវឌ្ឍន៍ភូមិ ឃុំ តាមគោលនយោបាយអភិវឌ្ឍន៍របស់គណបក្សកម្ពុជាដែលមានស្រាប់។
កម្ពុជាមកដល់ពេលនេះ គឺត្រូវគេឃើញថាប្រជាជននៅទូទាំងប្រទេសបានទទួលស្គាល់ថា ការដឹកនាំរបស់នាយយករដ្ឋមន្ត្រី ហ៊ុន សែន គឺបានធ្វើឲ្យប្រទេសបានសុខសាន្ត សប្បាយរីករាយ ការរីកចម្រើនកាន់តែខ្លាំងឡើងគ្រប់វិស័យជាមួយនិងមាននូវទំនើបភាវូបនីយកម្ម ។ល។
ជាក់ស្ដែងក្នុងឱកាសបុណ្យចូលឆ្នាំនេះ ក្រុមយវុជន ស្ថាប័នប្រដាប់អាវុធ ជាពិសេស ប្រជាពលរដ្ឋបានគាំទ្រសម្ដេចតាមរយៈភាពសប្បាយរីករាយដែលមានមនុស្សរាប់សែននាក់ចូលរួមជាមួយសម្ដេចនោះ៕
យឹម សារិទ្ធិ