ក្រចេះ៖ ឯកឧត្តម ហោ សារុន អនុរដ្ឋលេខាធិការក្រសួងទេសចរណ៍ និងជាប្រធានគណៈកម្មាធិកាប្រយុទ្ធនឹងជំងឺអេដស៍ អញ្ជើញជាគណអធិបតីបើកសិក្ខាសាលាបណ្ដុះបណ្ដាលស្ដីពី ការបង្ការ ទប់ស្កាត់ ការរីករាយដាលនៃជំងឺអេដស៍ក្នុងវិស័យទេសចរណ៍ ជូនដល់ផ្នែកឯកជនដែលបម្រើការនៅក្នុងវិស័យទេសចរណ៍ នាព្រឹកថ្ងៃទី២០ ខែមេសា ឆ្នាំ២០១៧ នៅសណ្ឋាគារ ហ៊រ ប៊ុន្នី ខេត្តក្រចេះ ។
លោក រុន ភារ៉ា ប្រធានមន្ទីរទេសរណ៍ខេត្តក្រចេះ បានឲ្យដឹងថា រាជរដ្ឋាភិបាល បានចាត់ទុកវិស័យទេសចរណ៍ ជាមាសបៃតង និងជាវិស័យអាទិភាពដ៏សំខាន់មួយក្នុងការចូលរួមទ្រទ្រង់កំណើនសេដ្ឋកិច្ច-សង្គម ដោយបាននាំមកនូវចំណូលជូនជាតិ ផ្ដល់ឱកាសការងារ និងចូលរួមកាត់បន្ថយភាពក្រីក្ររបស់ប្រជាពលរដ្ឋ ព្រមទាំងដើរតួនាទីយ៉ាងសំខាន់ចូលរួមទ្រទ្រង់ដល់ការធ្វើសមាហរណកម្មតំបន់ និងឆ្លើយតបនឹងការប្រែប្រួលអាកាសធាតុប្រកបដោយប្រសិទ្ធភាព ។
លោក បានបន្តថា រម្មណីយដ្ឋានទេសចរណ៍សំខាន់ៗក្នុងខេត្តក្រចេះ មានចំនួន ១៧កន្លែងក្នុងនោះ រម្មណីយដ្ឋានធម្មជាតិ ១០កន្លែង រម្មណីយដ្ឋានប្រវត្តិសាស្ត្រ ៦កន្លែង និងរម្មណីយដ្ឋានកែច្នៃមួយកន្លែង សណ្ឋាគារមាន១៣កន្លែង មាន៥៤១បន្ទុប់ ផ្ទះសំណាក់៤៣កន្លែង មាន៣៦០បន្ទុប់ ភោជនីយដ្ឋាន និងអាហារដ្ឋានមានចំនួន៣៩កន្លែង ម៉ាស្សាសុខភាពមាន ៨កន្លង ។
លោក រុន ភារ៉ា បានបន្ថែមថា នៅក្នុងអំឡុងពេលបុណ្យចូលឆ្នាំប្រពៃណីជាតិខ្មែររយៈពេលប៉ុន្មានថ្ងៃនេះ មានភ្ញៀវទេសចរជាតិ និងអន្តរជាតិ មានសរុបចំនួន១០៤៨៩០នាក់ ប្រៀបធៀប និងឆ្នាំមុន២០១៦ មានចំនួន១០៣៥៣៣នាក់ កើនឡើងចំនួន១៣៥៧នាក់ ស្មើរនិង១.៣១% ។
មានប្រសាសន៍នៅក្នុងពិធីបើកវគ្គសិក្ខាសាលាឯកឧត្តម ហោ សារុន អនុរដ្ឋលេខាធិការ បានថ្លែងឲ្យដឹងថា អេដស៍ជាបញ្ហាប្រឈមមួយ ក្នុងចំណោមបញ្ហាប្រឈមនានា ដែលធ្វើឲ្យរាជរដ្ឋាភិបាលត្រូវប្តេជ្ញាចិត្តខ្ពស់ក្នុងការលុបបំបាត់ជំងឺនេះឲ្យបានតាមរយៈការកំណត់នៅគោលដៅសូន្យបី គឺ គ្មានការឆ្លងជំងឺអេដស៍ថ្មី គ្មានការរើសអើងទៅលើអ្នកផ្ទុកមេរោគអេដស៍និងអ្នកជំងឺអេដស៍ និងគ្មានការស្លាប់ដោយសារអេដស៍ នៅត្រឹមឆ្នាំ២០២៥ ដោយត្រៀមនៅគោលដៅ ៩០-៩០-៩០ នៅឆ្នាំ២០២០ និងគោលដៅ៩៥-៩៥-៩៥ នៅឆ្នាំ២០២៥ ។
ឯកឧត្តម មានសង្ឃឹមយ៉ាងមុតមាំថា ការចូលរួមក្នុងសិក្ខាសាលាបណ្ដុះបណ្ដាលពីសំណាក់លោក លោកស្រីជាប្រតិបត្តិករ និងលោក លោកស្រីដែលជាអ្នកធ្វើការក្នុងសេវាកម្មកម្សាន្តទេសចរណ៍ នាពេលនេះ គឺជាកម្លាំងចលករដ៏មានប្រសិទ្ធិភាពមួយបន្ថែមទៀត ក្នុងការចូលរួមចំណែកធ្វើឲ្យសម្រេចបាននូវគោលដៅរបស់រាជរដ្ឋាភិបាល ៕