រតនគិរី ៖ ឈើប្រណីតដ៏ច្រើនសន្ធឹកសន្ធាប់ បានត្រូវព្រះរាជអាជ្ញារង ក្រោមបញ្ជាពីព្រះរាជអាជ្ញាអមសាលាដំបូងខេត្ត ដឹកនាំកម្លាំងចំរុះ ចុះបង្ក្រាបដល់ទីតាំងលាក់ទុក មានចំនួន2កន្លែងក្នុងក្រុងបានលុង។
ហេតុការណ៍ចុះបង្ក្រាបនេះ ធ្វើឡើងនៅវេលាម៉ោង៩និង៣០នាទីព្រឹក ថ្ងៃទី១៩ ខែមេសា ឆ្នាំ២០១៧ នៅចំណុចភូមិអូរកន្សែង សង្កាត់បឹងកន្សែង និងមួយកន្លែងទៀត នៅក្នុងភូមិអូររមៀត សង្កាត់ឡាបានសៀក ។
ការចុះបង្ក្រាបនោះដែរគេឃើញមាន កម្លាំងអធិការក្រុងបានលុង កងរាជអាវុធហត្ថក្រុង ប៉ូលិសប៉ុស្តិ៍បឹងកន្សែង និងខណ្ឌរដ្ឋបាលព្រៃឈើ ដែលដឹកនាំដោយលោករ៉ា បូរ៉ានឌី ព្រះរាជអាជ្ញារងអមសាលាដំបូងខេត្តរតនគិរី។ ចំណែកទីតាំងបង្ក្រាបមួយកន្លែងទៀត ដឹកនាំដោយព្រះរាជអាជ្ញារង ហាក់ ហ៊ន និងក្រុមកំលាំងប្រអាវុធ និងស្ថាប័នពាក់ព័ន្ធដូចគ្នាផងដែរ។
បើតាមសមត្ថិច្ចចុះបង្ក្រាបនេះបានអោយអ្នកសារពត៌មានដឹងថា ដោយមានការបញ្ជាពីព្រះរាជអាជ្ញាសាលាដំបូងខេត្ត និងកម្លាំងស៊ើបអង្កេតផ្ទះស្តុកឈើនេះជាយូរមកហើយ ទើបព្រឹកថ្ងៃនេះកម្លាំងចម្រុះបានចុះឡោមព័ទ្ធ និងឆែកឆេរប្រទះឃើញឈើប្រណិតជាច្រើនដុំនៅដីឡូត៍ផ្ទះនោះតែម្តង តែមិនឃើញម្ចាស់ឈើ និងម្ចាស់ផ្ទះនោះទេ ឃើញតែកម្មករ៣-៤នាក់ប៉ុណ្ណោះកំពុងតែអារជ្រៀកឈើក្រញ៉ូង បេង និងនាងនួន ដែលបំរុងលើកដាក់លើឡានសាំយ៉ុង លុច្សស៊ីស ត្រៀមដឹកយកទៅលក់នៅប្រទេសវៀតណាម។
សមត្ថកិច្ចបានបន្ថែមទៀតថា កម្លាំងរបស់លោកបានរឹបអូសឡាន៣គ្រឿង លុច្សស៊ីស សាំយ៉ុង និងតាកូម៉ាមួយបាំងកន្លះ និងមនុស្ស៤នាក់ ព្រមទាំងឈើប្រណិតជាច្រើនរឺម៉កម៉ូតូ។
វត្ថុតាងទាំងនេះបានដឹកជញ្ជូនមករក្សាទុកនៅខណ្ឌរដ្ឋបាលព្រៃឈើខេត្ត រងចាំម្ចាស់ផ្ទះ ឫក៏ម្ចាស់ឈើចូលខ្លួនមកដោះស្រាយតាមច្បាប់ព្រៃឈើ ។
ការចុះបង្ក្រាបឈើប្រណីតនេះ គឺចាត់ថាជាកាដូសំរាប់ឆ្នាំថ្មី ដែលវាជាសញ្ញាប្រាប់ថា អ្នកជំនួញបទល្មើសព្រៃឈើត្រូវតែបញ្ឈប់រាល់ការរត់ពន្ធឈើឆ្លងដែនដោយខុសច្បាប់តទៅទៀត ហើយនៅពេលដែលសមត្ថកិច្ចវែកមុខម្ចាស់បទល្មើសនោះ ក៏នឹងត្រូវរងនូវការផាកពិន័យ ឬអាចឈានដល់ជាប់ពន្ធនាគារផងទៀត៕
ដោយៈ យឹម សារិទ្ធិ