ខេត្តរតនគិរី ៖ គោយន្តដឹកឈើមួយគ្រឿង ត្រូវសមត្ថកិច្ចចាប់ ក្រោយពីបើកចូលកន្លែងឃ្លាំងដំឡូង ហើយត្រូវម្ចាស់ឃ្លាំងដេញចេញ រួចបើកចូលព្រៃចន្ទីខាងក្រោយភូមិ។
គោយន្តដឹកឈើនោះ ត្រូវនគរបាលប្រឆាំងបទល្មើសសេដ្ឋខេត្ត និង កងរាជអាវុធហត្ថខេត្ត ចាប់នៅវេលាមោ់ងប្រមាណ9យប់ ថ្ងៃទី17 ខែមេសានេះ នៅចំណុចភូមិតាអង2 ឃុំតាអង ស្រុកកូនមុំ ខេត្តរតនគិរី។ ឈើទាំងអស់នៅលើគោយន្ត ត្រូវគេឃើញមានចំនួន17កំណាត់ មានវែងនិងខ្លី ដែលសមត្ថកិច្ចប្រាប់ថា ជាប្រភេទឈើសុក្រម។
នៅព្រឹកថ្ងៃទី18 ខែមេសានេះ នគរបាលប្រឆាំងបទល្មើសសេដ្ឋកិច្ច បានប្រគល់ឈើទាំងនោះ អោយសមត្ថកិច្ចជំនាញព្រៃឈើរួចហើយ។
គេសង្កេតឃើញថា ក្រោយពីគោយន្តបានត្រូវគេឃើញបើកចូលឃ្លាំងដំឡូងនោះ កូនម្ចាស់ឃ្លាំងបានព្យាយាម បញ្ជាអោយតៃកុងគោយន្តនោះបើកចេញទៅក្រៅវិញ ទើបតៃកុងគោយន្ត បើកចូលទៅខាងក្រោយភូមិដោយបើកបរបិទភ្លើងផង ទៅសម្ងំពួននៅក្នុងព្រៃចន្ទី រួចគេចខ្លួន បន្សល់វត្ថុតាងចោលទីនោះ។
ប្រភពបានបង្ហាញការសង្ស័យថា ឃ្លាំងដំឡូងដែលគោយន្តដឹកឈើចូល នៅក្បែរទីបង្ក្រាបនោះ ត្រូវគេសង្ស័យថា ជាឃ្លាំងដឹកដំឡូងលួចបង្កប់ឈើ ជាយូរឆ្នាំមកហើយ ប៉ុន្តែមិនដែលមានអ្នកណាដឹងទេ ទើបតែនៅយប់ថ្ងៃទី១៧ ខែមេសានេះ ស្រាប់តែត្រូវគេប្រទះឃើញ ហើយរាយការណ៍ជូនសមត្ថកិច្ចបង្ក្រាបតែម្តងទៅ ៕
ដោយ ៖ យឹម សារិទ្ធិ
