ក្រចេះ ៖ បុរសម្នាក់ ជាជនល្មោភកាម ក្រោយពីបានធ្វើសកម្មភាពប៉ុនប៉ងចាប់រំលោភទៅលើស្ដ្រីម្នាក់ ដែលជាអភិបាលរងក្រុងក្រចេះ ប៉ុន្តែមិនបានសម្រេច ត្រូវបានកម្លាំងអធិការដ្ឋានស្រុកចិត្របុរី ចាប់ឃាតខ្លួននិងបញ្ជូនទៅតុលាកាខេត្តក្រចេះ នៅរសៀលថ្ងៃទី១៣ ខែមេសា ឆ្នាំ២០១៧នេះ ។
សមត្ថកិច្ច បានឲ្យដឹងថា ជនសង្ស័យមានឈ្មោះ ជួប ថៃ អាយុ ២៩ឆ្នាំ ជាតិខ្មែរ រស់នៅភូមិតាលុស ឃុំបុសលាវ ស្រុកចិត្របុរី ខេត្តក្រចេះ មានមុខរបរមិនពិតប្រាកដ ។
សមត្ថកិច្ចបន្តថា មុនពេលកើតហេតុ ជនសង្ស័យបានធ្វើសកម្មភាពលួចឡើងលើផ្ទះស្ដ្រីរងគ្រោះ នៅវេលាម៉ោងរំលងអធ្រាតឈានចូលថ្ងៃទី១៣ ខែមេសាឆ្នាំ២០១៧ នៅចំណុចនៅភូមិតាលុស ឃុំបុសលាវ ស្រុកចិត្របុរី ដោយជនសង្ស័យដៃមានកាន់កាំបិត ហើយរុញទ្វារបន្ទប់ បំរុងចូលដេកជាមួយជនរងគ្រោះ ។ ប៉ុន្តែត្រូវបានជនរងគ្រោះឃើញទាន់ក៏នាំកូនរត់ចុះមកដី ហើយក៏ស្រែកហៅអ្នកស្រុកអោយជួយ និងតេទូរសព្ទ័ប្ដឹងនគរបាលប៉ុស្តិ៍រដ្ឋបាលបុសលាវ នគរបាលប៉ុស្តិ៍ក៏ចុះទៅដល់កន្លែងកើតហេតុ និងបានធ្វើការឃាត់ខ្លួនជនសង្ស័យបណ្តោះអាសន្ននៅប៉ុស្តិ៍ រួចនាំមកកាន់អធិការដ្ឋាននគរបាលស្រុក ចិត្របុរី ដើម្បីធ្វើការសាកសួរឆ្លើយ និងកសាងកំណត់ហេតុ ។
ក្រោយពេលសមត្ថកិច្ចសួរចម្លើយ ជនសង្ស័យឈ្មោះ ជួប ថៃ បានសារភាពថា ខ្លួនពិតជាមានបំណង់ចាប់រំលោភស្ដ្រីរងគ្រោះនោះពិតមែន ។
សមត្ថកិច្ចក៏បានកសាងសំនុំរឿងបញ្ជូនខ្លួនជនសង្ស័យទៅសាលាដំបូងខេត្តក្រចេះ កាត់ទោសទៅតាមច្បាប់
