ខេត្តរតនគិរី ៖ ឈើមូលដែលកម្លាំងកងរាជអាវុធហត្ថបង្ក្រាបបាន ហើយអូសប្រមូលបានជាង២០០កំណាត់ កាលពីខែកម្ភៈ កន្លងទៅ ត្រូវលោកមេបញ្ជាការកងរាជអាវុធហត្ថខេត្តរតនគិរី ដឹកនាំកម្លាំងចំរុះ ចុះរុករកឃើញបន្ថែមជាង១០០កំណាត់ទៀត ហើយជួលរថយន្តអូសប្រមូលយកមករក្សាទុក។
ឈើមូល៤០៣កំណាត់ ត្រូវលោកឧត្ដមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្ត ដឹកនាំកម្លាំងចំរុះ ចុះត្រួតពិនិត្យ និងរុករកឃើញបន្ថែម ក្នុងព្រៃ ដែនជម្រកសត្វព្រៃលំផាត់ ស្ថិតក្នុងភូមិប៉ាតត់ ឃុំសេដា ស្រុកលំផាត់ ខេត្តរតនគិរី ត្រង់ចំណុចអូរជីព ដែលក្រុមឈ្មួញលួចកាត់គល់រំលំ កាត់ចុង ពាស់ពេញព្រៃ។
បើយោងតាមការឲ្យដឹងពីលោកមេបញ្ជាការ កងរាជអាវុធហត្ថខេត្តរតនគិរី គឹម រស្មី ថា ឈើមូលជាង២០០កំណាត់ ត្រូវលោកដឹកនាំកម្លាំងចុះបង្ក្រាបកាលពីថ្ងៃទី១៨ .១៩ ខែកម្ភៈ ឆ្នាំ២០១៧ ហើយជួលរថយន្តអូសប្រមូលមកគរទុក។ តែត្រូវអ្នកសារព័ត៌មានមួយចំនួន មកថតឈើនេះ ហើយផ្សាយថា ជាឈើរបស់ក្រុមឈ្មួញដឹកយកមកលាក់ទុកជាង៥០០កំណាត់ទៅវិញ។
ទើបនៅព្រឹកថ្ងៃទី១១ ខែមេសា ឆ្នាំ២០១៧នេះ លោកដឹកនាំកម្លាំងចំរុះ ចុះត្រួតពិនិត្យ និងរុករកបន្ថែមជាក់ស្ដែង ទើបសរុបឈើចាស់និងឈើរុករកឃើញថ្មី សរុប៤០៣កំណាត់ ដែលលោកបានជួលរថយន្តអូសប្រមូលយកមកគរក្សាទុកចំនួន៨ទីតាំង ស្ថិតក្នុងភូមិសាស្ត្រខាងលើ ចំណែកចំនួនមែត្រគូបនៅមិនទាន់ចំនួននៅឡើយទេ។
គួរបញ្ជាក់ថា ឈើមូលនេះ ជាប្រភេទឈើលេខ២ មានឈើផ្ចឹក ផ្ដៀក ឈ្លីក ឈើទៀល ។ល។ ដែលក្រុមឈ្មួញលួចកាប់ ក្នុងព្រៃដែនជម្រកសត្វព្រៃ ស្រុកលំផាត់ ហើយព្រៃនេះ ក្រោមការគ្រប់គ្រង ដោយមន្ត្រីបរិស្ថាន។ ចំណែកឈើដែលបង្ក្រាបបាននេះ ត្រូវប្រគល់ឲ្យមន្ត្រីបរិស្ថានជាអ្នកវាស់វែង និងថែរក្សា៕
