ខេត្តរតនគិរី ៖ ការចុះបង្ក្រាប និងរឹបអូសឈើប្រណិត នៅក្នុងផ្ទះស្ត្រីមេឈ្មួញម្នាក់ ដែលមានប្តីជាមន្ត្រីជលផល របស់សមត្ថកិច្ចចម្រុះខេត្តនោះ បានប្រព្រឹត្តទៅនៅម៉ោង១០ និង២០នាទីព្រឹកថ្ងៃ៧មេសា ឆ្នាំ២០១៧នេះ។ ក្រោមការដឹកនាំបញ្ជាពីស្ថាប័នអយ្យការ អមសាលាដំបូងខេត្តរតនគិរី ស្ថិតនៅភូមិអភិវឌ្ឍន៍ សង្កាត់ឡាបានសៀក ក្រុងបានលុង។ ហើយឈើដែលរឹបអូសបាននោះ ត្រូវគេនិយាថា គឺជាឈើគ្មានច្បាប់នោះទេ ជាប្រភេទឈើធ្នុង ។
សមត្ថកិច្ចនៅក្នុងការបង្ក្រាបបានបង្ហើបឲ្យដឹងថា ម្ចាស់ផ្ទះស្តុកឈើនោះ ត្រូវគេស្គាល់ឈ្មោះ ចែ ព្រលិត ជាមេឈ្មួញរកស៊ីជួញឈើល្មើសច្បាប់ជាយូរយារមកហើយ និងមានប្តីជាមន្ត្រីរដ្ឋបាលជលផលខេត្តរតនគិរី ឈ្មោះ ខៀវ លុច ។ លោកថា មុនពេលឆែកឆេរផ្ទះស្ត្រីមេឈ្មួញម្នាក់នេះ សមត្ថកិច្ចចម្រុះសណ្តាប់ធ្នាប់ ក្រុង និងខេត្តក្រោមបញ្ជាផ្ទាល់ដោយលោក ហាក់ ហ៊ាន់ ព្រះរាជអាជ្ញារង អមសាលាដំបូងខេត្តរតនគិរី បានបើកការឡោមព័ទ្ធអស់រយះជិត៣ម៉ោង ដោយរង់ចាំការសហការណ៍ពីម្ចាស់ផ្ទះនេះ ប៉ុន្តែគេមិនបានឃើញយាយព្រលិត ចេញមកសហការណ៍ជាមួយសមត្ថកិច្ចនោះទេ ហើយរហូតមកទល់នឹងម៉ោងជាង១២ថ្ងៃត្រង់ថ្ងៃនេះ ទើបមានការសំរេចពីស្ថាប័នអយ្យការ បញ្ជាឲ្យកម្លាំងចូលឆែកឆេរ ព្រមទាំងបានរកឃើញឈើធ្នង់រាប់សិបដុំ ក៏ឈានទៅធ្វើការរឹបអូសបានឈើចំនួនបីរឺម៉កធំៗខ្នាតយក្ស ។
សមត្ថកិច្ចបង្ហើបឲ្យដឹងទៀតថា ៖ ខណៈនេះសមត្ថកិច្ចកំពុងបន្តធ្វើការឆែកឆេរ រឹបអូស និងដឹកជញ្ជូនឈើ នាំយកជាបន្តបន្ទាប់មកកាន់ខណ្ឌរដ្ឋបាលព្រៃឈើខេត្តដើម្បី ចាត់ការបន្ត។ ចំណែក ម្ចាស់ផ្ទះនេះ មិនទាន់បានធ្វើការឃាត់ខ្លួននៅឡើយទេ។
សមត្ថកិច្ចបាននិយាយថា៖ ចែ ព្រលិតនេះ គឺជាមេឈ្មួញដុះស្លែ ប្រមូលទិញឈើស្ទើរតែនៅគ្រប់ស្រុក ក្នុងខេត្តរតនគិរី ដោយធ្វើការដឹកជញ្ជូនតាមរថយន្ត ប្រភេទសាំយ៉ុង នាំយកមកស្តុកទុក រួចដឹកជញ្ជូនបន្តយកទៅលក់នៅប្រទេសវៀតណាម ឆ្លងកាត់តាមច្រកទ្វារអន្តរជាតិអូរយ៉ាដាវ និងច្រករបៀងផ្សេងទៀតផងដែរ។ គេនៅមិនទាន់ដឹងថា តើអយ្យការខេត្តរតនគិរី នឹងចាត់ការយ៉ាងណា ចំពោះមេឈ្មួញរូបនេះឡើយ។
ដោយ ៖ ចាប សំអាន