រតនៈគីរី៖ វេលាម៉ោង៧និង៤០នាទីព្រឹក ថ្ងៃទី០៧ ខែមាសា ឆ្នាំ២០១៧ នេះមានសេចក្តីរាយការណ៍ថា អ្នកកាសែតជាង២០នាក់ ត្រូវបានប៉ូលីសអន្តោប្រវេសច្រកអូយ៉ាដាវ ខេត្តរតនគីរីតាមបញ្ជារលោកលោក សុខ សំអាន ប្រធានប៉ុស្តិស្តីទី ឃាត់ខ្លួន ខណៈពេលដែលពួកគេកំពុងថតរូបរថយន្តសាន់យ៉ុងជាច្រើនគ្រឿងដឹកឈើយកទៅលក់ឯប្រទេសយួនដោយខុសច្បាប់តាមច្រកទ្វារព្រុំដែនដោយគ្មានការអនុញ្ញាត។
លោក សុខ សំអាន បានប្រាប់កាសែត ថា «ពួកគេបានមកថតរូបនៅកន្លែងរបស់យើង គ្មានការអនុញ្ញាត ចឹងខ្ញុំបានឲ្យកម្លាំងអញ្ជើញ ពួកគាត់មកសួរនាំ ធ្វើការណែនាំ និងអប់រំ រួចក៏ឲ្យទៅវិញផងដែរ»។
ប្រភពពីអ្នកយកព័ត៌មានបាននិយាយថា ពួកគេមិនបានធ្វើអ្វីដែលខុសនិងវិជ្ជាជីវៈ ក្រមសីលធម៌ជាអ្នកសារព័ត៌មាននោះទេ គ្រាន់តែទៅថតរូបរថយន្តសាន់យ៉ុងដឹកឈើពីស្រុកខ្មែរទៅលក់នៅប្រទេសវៀតណាមតាមច្រកអូយ៉ាដាវតែប៉ុណ្ណោះ តែបែជាប៉ូលីសអន្តោប្រវេសច្រកនេះនាំ គ្នាមកឃាត់ខ្លួនរបស់ពួកគេ ដោយមិនដឹងពីមូលហេតុ និងគោលបំណងយ៉ាងណានោះទេ។
នាយស្តីទីប៉ុស្តិ៍ច្រកទ្វារអន្តរជាតិមួយនេះ បានលើកហេតុផលថា តាមសេចក្តីប្រកាសរបស់ក្រសួងមហាផ្ទៃ គឺក្នុងជំរៅដីប្រមាណ៥០០ម៉ែត្រ អ្នកគ្មានការអនុញ្ញាត គ្មានភារកិច្ច គឹហាមថត ហាមបើកបរ និងហាមធ្វើអ្វីផ្សេងទៀត ដោយមិនបានយល់ព្រមពីសមត្ថកិច្ច ។ ទោះជាយ៉ាងណាមានភ្នាក់កាសែតមួយបានចេញមុខការពារការឃាត់ក្រុមអ្នកាសែតដោយប៉ូលិសរបស់លោកអ៊ីចំរើនថាគេមិនបានឃាត់ទេគឺហៅទៅឲ្យថ្លៃបាយនិងសាំង! ។
សូមបញ្ជាក់ដែរថា បើយោងតាមព័ត៌មានពីគេហទំព័រនៅក្នុងស្រុកជាច្រើនបានសរសេររិះគន់ជារៀងរាល់ថ្ងៃអំពីសកម្មភាពរថយន្តដឹកឈើពីខេត្តរតនគីរីតាមច្រកអូយ៉ាវដាវទៅប្រទេសវៀតណាម តែគ្មានសមត្ថកិច្ចណាធ្វើការបង្ក្រាបនោះឡើយដែលគេជឿថាមានការឃុបឃឺតគ្នាដើម្បីចែកលាភសក្ការៈ។
តាមប្រជាពលរដ្ឋ ដែលរស់នៅខេត្តរតនគិរី និងអ្នកសារព័ត៌ប្រចាំការនៅទីនោះបាននិយាយថា៖ដោយមានការបើកដៃពីលោក អ៊ី ចំរើន ប្រធានប៉ុស្តិនគរបាលអន្តោប្រវេសន៍ច្រកអូរយ៉ាដាវបានឃុបឃិតបើកដៃអោយពួកឈ្មួញខិលខូចបានយកឈើប្រណីតៗខុសច្បាប់ ដាក់ពីក្រោមកសិផលដូចជាសណ្ដែងសៀង ដំឡូងមី ដឹកជញ្ជូនតាមរថយន្តធំៗ យកទៅស្ដុកទុកនៅឃ្លាំងក្នុងទឹកដីវៀតណាមស្ទើរតែរាល់យប់ថ្ងៃ ។
ករណីចឹងយូរៗរាប់ខែ ទើបឃើញសមត្ថកិច្ចធ្វើជាចាប់បានម្ដង ។ រយៈពេលកន្លងទៅលោក ថងសាវុនអភិបាលខេត្តរតនគិរីធ្លាប់ចេញបញ្ជាឲ្យគេចាប់រថយន្តធុនធំបង្កប់ឈើក្រោមកសិផលដឹកចេញទៅវៀតណាម តែបទបញ្ជានេះហាក់ដូចជាស្ពិនភ្នែករាជរដ្ឋាភិបាលតែប៉ុណ្ណោះ ។
សេចក្តីរាយការណ៍បានអោយដឹងថា ៖ ក្នុងតំណែងជាប្រធានប៉ុស្តិ៍ច្រកទ្វារអន្តរជាតិអូរយ៉ាដាវឡើងថ្មីជំនួសលោក ឡុង រុក្ខា គឺលោក អ៊ី ចំរើន បាននិងកំពុងបំពេញការងារតាមរបៀបជិះសេះលែងដៃដើម្បីប្រមូលដើមដែលចំណាយទិញប៉ុស្តិ៍ ។
ប្រភពចំណូលជាច្រើនដែលលោក អ៊ី ចំរើន ទទួលបាន ទារលុយពីប្រជាពលរដ្ឋដែលដឹកជញ្ជូនកសិផលទៅលក់នៅវៀតណាមរួមទាំងការឃុបឃិតអោយក្រុមឈ្មួញធំៗដឹកជញ្ជូនឈើខុសច្បាប់ចេញតាមច្រករបៀងភូមិភិនិងច្រករបៀងភូមិឡំនិងច្រកទ្វារអន្តរជាតិអូរយ៉ាដាវ ។
សេចក្តីរាយការណ៍ពីប្រជាពលរដ្ឋបានឲ្យដឹងថា ៖ ពួកគាត់ជាប្រជាពលរដ្ឋបាននាំគ្នាដឹកជញ្ជូនកសិផលមានដំឡូងមីជាដើមចេញទៅលក់នៅវៀតណាម ត្រូវកូនចៅលោក អ៊ី ចំរើន គាបជំរិតឲ្យបង់ប្រាក់ ក្នុងឡានធំ២០ម៉ឺនរៀល ទៅ២៥ម៉ឺនរៀល ។ ឡានតូចកែឆ្នៃ១០ម៉ឺនរៀល ទៅ១៥ម៉ឺនរៀលព្រមទាំងមានដែកចាក់រាវរកឈើរំខានការរកស៊ីជាច្រើនម៉ោង ហើយការអនុវត្តន៍ចំពោះរថយន្តដឹកឈើខុសច្បាប់វិញ មិនមានការចាក់អ្វីនោះទេ ព្រោះមេការឈ្មួញឈើបានរត់ការរួចអស់ទៅហើយ។
លើសនេះទៀត ចំពោះពលរដ្ឋឆ្លងដែនទៅប្រទេសវៀតណាម មានប៉ាស្ពែរចេញបង់៥ដុល្លាចូលបង់៥ដុល្លារសរុប១០ដុល្លារ ចំពោះពលរដ្ឋគ្មានប៉ាស្ព័របង់២០ដុល្លា ។ ចំពោះការយកលុយនេះមន្ត្រីក្រោមបង្គាប់បានប្រាប់ប្រជាពលរដ្ឋថា ប្រាក់ចំណូលទាំងអស់ គឺមិនរំលងឬកេងប្រវញ្ច័១រៀលលុយខ្មែរទេ គឺយកជូនលោក អ៊ី ចំរើន ទាំងអស់ ។
ប្រជាពលរដ្ឋបានអះអាងថា ជាគោលការណ៍ការដឹកជញ្ជូនកសិផលមិនតម្រូវឲ្យមានការបង់ពន្ធឬបង់ថ្លៃផ្លូវឲ្យក្រុមកុងត្រូលជជុះនោះទេ ប៉ុន្តែលោកអ៊ីចំរើនបានចាត់តាំងមន្ត្រីរបស់គាត់ឲ្យចុះប្រមូលលុយពីរថយន្តដឹកកសិផលយ៉ាងអនាធិបតេយ្យ ដើម្បីប្រមុលលុយស្រង់ដើមក្នុងការទិញប៉ុស្តិ៍និងអភិវឌ្ឍន៍មុខតំណែងយ៉ាងរលូនល្អ។
និយាយពីក្រុមឈ្មួញដឹកជញ្ជូនឈើខុសច្បាប់ឈ្មួញឈ្មោះ ចាន់ ធី ឈ្មោះស្រីល័ក្ខណ៍ ឈ្មោះស្រីម៉ីឈ្មោះណូ បានដឹកជញ្ជូនឈើឆ្លងទៅវៀតណាមរាល់យប់ថ្ងៃ មិនដឹងចំណាយលុយជូនលោក អ៊ី ចំរើនប៉ុន្មានដុល្លានោះទេ ?
សូមបញ្ជាក់ថា ពីមុនលោក អ៊ី ចំរើន ជានាយរងប៉ុស្តិ៍នគរបាលច្រកទ្វារព្រំដែនអន្តរជាតិត្រពាំងផ្លុងក្រោយមកមិនដឹងជាគាត់ពូកែរត់ការយ៉ាងម៉េច ក៏ស្រាប់តែថ្នាក់លើតែងតាំងតំឡើងតំណែងគាត់ ទៅជានាយប៉ុស្តិ៍នគរបាលច្រកទ្វារព្រំដែនអន្តរជាតិអូរយ៉ាដាវ នៃនាយកដ្ឋានច្រកទ្វារទី២ ដោយមានឯកឧត្តមឧត្តមសេនីយ៍ទោសារិន សារីណូ ប្រធាននាយកដ្ឋានច្រកទ្វារទី២ នៃអគ្គនាយកដ្ឋានអន្តោប្រវេសន៍តំណាងដ៏ខ្ពង់ខ្ពស់ ឯកឧត្តមនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ និងលោក កង សារឿន ប្រធានស្នាក់ការច្រកទ្វារអន្តជាតិអូរយ៉ាដាវ ព្រមទាំងលោកឧត្តមសេនីយ៍ត្រី ងួន គឿន ស្នងការនគរបាលខេត្តរតនគិរី ចូលរួមក្នុងពិធីប្រកាសតែងតាំងនោះ ដែរ ។ ប្រជាពលរដ្ឋទាមទារថ្នាក់លើកោះហៅលោក អ៊ី ចំរើនទៅសួរនាំផង? ជាពិសេសអង្គភាពប្រឆាំងអំពើពុករលួយ៕
