មណ្ឌលគិរី៖កាលពី វេលាថ្ងៃត្រង់ថ្ងៃ៥មេសានេះនៅចំណុចវារីអគ្គីសនីអូររមីស ស្ថិតក្នុងភូមិពូតាំងសង្កាត់រម្យនា ក្រុងសែនមនោរម្យ ខេត្តមណ្ឌលគិរី បុរសម្នាក់ដែលជាហ្ម៉រដំរីត្រូវបានស្លាប់ ដោយសារតែដំរីរបស់ព្រេជ។ជនរងគ្រោះដែលដំរីជាន់ស្លាប់មានឈ្មោះជើង ទៀម ភេទប្រុសអាយុ៤៥ឆ្នាំ ជនជាតិព្នង មានទីលំនៅភូមិឃុំកើតហេតុខាងលើ។
សត្វដំរីសម្លាប់ម្ចាស់ឯងមានឈ្មោះតកដែលជាដំរីចិញ្ចឹមបម្រើដល់វិស័យទេសចរណ៍ក្នុងខេត្តមណ្ឌលគិរី ។
សមត្ថកិច្ចសន្និដ្ឋានជំហ៊ានដំបូងថា ដំរីឈ្មោះតក នេះអាចនឹងចុះប្រេង ទើបជាន់សម្លាប់ម្ចាស់ឯង។បច្ចុប្បន្នសមត្ថកិច្ចកំពុងតែដុតដៃដុតជើង កាពារសត្វដំរីខាងលើមិនឲ្យរត់ចូលព្រៃនោះទេ រងចាំក្រុមជំនាញមកដល់ មានវិធានការបន្ត។
គួររំលឹកថានេះ ជាករណីទី២ហើយសម្រាប់ខេត្តមណ្ឌលគិរីដែលមានដំរីមួយមានឈ្មោះអាម៉ៃអាយុ២៨ឆ្នាំបានជាន់សម្លាប់ហ្ម៉ររបស់ឡើយ នៅចំណុចក្បែរអូរទេរ ក្នុងភូមិពូក្រូច ស្ថិតនៅឃុំស្រែអំពូម ស្រុក ពេជ្រាដា ខេត្តមណ្ឌលគិរី តាមបណ្ដោយផ្លូវឆ្ពោះទៅរមណីដ្ឋានទឹកជ្រោះប៊ូស្រា ។
សត្វដំរីឈ្មោលនោះឈ្មោះអាម៉ៃ ត្រូវចាប់បានមកវិញកាលពីថ្ងៃទី០២ ធ្នូ ២០១៦នេះ ត្រង់ចំណុចអង់តែន០១២ ស្ថិតក្នុងភូមិពូក្រូច ឃុំស្រែអំពូម ស្រុកពេជ្រាដា ខេត្ត មណ្ឌលគិរីដោយអ្នកជំនាញបានប្រើវិធីយកសត្វដំរីញី០៥ក្បាល មកធ្វើជាធ្នាក់ហៅសត្វដំរីចុះប្រេ ងនោះ បន្ទាប់មកគេបានបាញ់ថ្នាំសណ្ដំ០២ម្ជុលទៅលើវា ទើបអាចចាប់វាបាន ។
លោក ពុក នៅ ជាជនជាតិភាគតិចព្នង និងជាគ្រួសារម្ចាស់សត្វដំរីឈ្មោះអាម៉ៃនេះបានឲ្យដឹងថា មូលហេតុដែល ធ្វើឲ្យសត្វដំរីនេះមានចរិតកាចសាហាវ និងព្រិចសម្លាប់ហ្ម៉ររបស់វា កាលពីពេលកន្លងទៅ គឺអាចបណ្ដាលមកពីមានដែក គោលមួយដើមមុតជាប់នៅប្រម៉ោយរបស់វា ហើយក្រោយពីបានរកឃើញដែកគោលនោះ និងបានដកវាចេញពីប្រម៉ោយ របស់អាម៉ៃ អាម៉ៃបានប្រែចរិតមកស្លូតបូតចាប់តាំងពីពេលនោះមកម្លេះ ។ទោះជាយ៉ាងណាករណីដំរីឈ្មោះតកនេះសម្លាប់ម្ចាស់គេនៅមិនទាន់ដឹងពីមូលហេតុពិតប្រាកដឡើយ។
