ខេត្តមណ្ឌលគិរី៖ យុវជនម្នាក់ជាន់អន្ទាក់ឆក់សត្វប្រើដោយចរន្ទអាគុយស្លាប់បាត់បង់ជីវិតភ្លាមៗ ក្នុងចំណោម០៣នាក់
មនុស្សម្នាក់ជាន់អន្ទាក់ឆក់សត្វប្រើដោយចរន្ទអាគុយក្នុងចំណោម៣នាក់ទៀត ដើរចូលព្រៃដើម្បីប្រកបរបររកស៊ី នៅស្រុកកោះញែកបានស្លាប់បាត់បង់ជីវិតភ្លាមៗ។
ហេតុការណ៍នេះបានកើតឡើងនាទៀបភ្លឺថ្ងៃទី១៩ ខែវិច្ឆិកា ឆ្នាំ២០១៤ ត្រង់ចំណុចថងភើច ភូមិជីខ្លប ឃុំសុខសាន្ត ស្រុកកោះញែក ខេត្តមណ្ឌលគិរី ។
តាមការអោយដឹងពីលោកខ្លូត សុឃា អធិការរងនគរបាលស្រុកកោះញែក យុវជនម្នាក់ដែលមានឈ្មោះ ខា ម៉ុង ភេទប្រុស អាយុ២១ឆ្នាំ ជនជាតិខ្មែររស់នៅភូមិសេរីមានរិទ្ធិ ឃុំស្រែសង្គម ស្រុកកោះញែកបានស្លាប់បាត់បង់ជីវិតភ្លាមៗនៅវេលាម៉ោង០៣និង៣០នាទីទៀបភ្លឺថ្ងៃទី១៩ ខែវិច្ឆិកា ដោយសាររូបគេបាននាំគ្នាដើរចូលព្រៃ ដើម្បីប្រកបរបររកស៊ី ប៉ុន្តែជនរងគ្រោះបានដើរជាន់ចំអន្ទាក់សំរាប់ឆក់សត្វប្រើចរន្តអាគុយនៅតាមព្រៃ ។
លោកអធិការរងស្រុកបានបន្តថាគ្នីគ្នារបស់ជនរងគ្រោះចំនួន ២ នាក់ទៀតសំណាងល្អ បាននាំគ្នាលោតរំលងផុតខ្សែឆក់ ដែលជាអន្ទាក់នោះ ពុំដូច្នេះទេ ប្រហែលពួកគេអាចនឹងស្លាប់ទាំង ៣ នាក់ក៏ថាបាន ។
សមត្ថកិច្ចបានអោយដឹងទៀតថា ម្ចាស់ដែលជាអ្នកដាក់អន្ទាក់ឆក់សត្វក្នុងហេតុការណ៍នោះ គឺបានធ្វើការឃាត់ខ្លួនហើយ មានចំនួន ០២ នាក់ ទី១-ឈ្មោះឈុំ ទិត ភេទប្រុស អាយុ៤៩ឆ្នាំ មានស្រុកកំណើតនៅភូមិ ក្រូច ឃុំពុធសស្រុកបាទី ខេត្តតាកែវ បច្ចុប្បន្នរស់នៅស្រុកកោះញែក និងទី២-ឈ្មោះទៀវ បាន ភេទប្រុស អាយុ២៨ឆ្នាំ ជាជនជាតិព្នង រស់នៅភូមិជីខ្លបឃុំសុខសាន្ត ស្រុកកោះញែក ហើយ សមត្ថកិច្ចកំពុងធ្វើការសួរនាំនិងកសាងសំណុំរឿងបញ្ជូនទៅតុលាការ ។ ចំណែកឯសាក សពត្រូវបានក្រុមគ្រួសារយកទៅធ្វើបុណ្យតាមប្រពៃណី ៕ ហ៊ិន សុគន់
