ខេត្តត្បូងឃ្មុំ ៖ គេនៅចាំបានថា សម្តេច ហ៊ុន សែន នាយករដ្ឋមន្ត្រីប្រកាសឲ្យដឹងថាការបើឲ្យមានកាស៊ីណូនៅតាមព្រុំដែនគឺដើម្បីអភិវឌ្ឈន៍និងការពារព្រុំដែនគឺមិនមែនបើឲ្យខ្មែរចូលលេងទេនោះទេ។កិច្ចសន្យាបើកកាស៊ីណូក៏កំណត់មិនឲ្យខ្មែរចូលលេងដែរ។ជាងនេះទៅទៀតគោលនយោបាយភូមិឃុំមានសុវត្ថិភាពក៏ហាមផងដែរមិនឲ្យមានល្បែងស៊ីសងឡើយ។
តែបទបញ្ជារហាមខ្មែរមិនឲ្យចូលលេងល្បែងស៊ីសងនិងគោលនយោបាយភូមិឃុំមានសុវត្ថិភាពនោះបើគេពិនិត្យទៅវាគ្មានប្រសិទ្ធីភាពអ្វីឡើយ។ ជាក់ស្ដែងដូចជា កាស៊ីណូមួយស្ថិត នៅក្រោយសណ្ឋាគារភូមិយើងនៅភូមិ អន្លុងជ្រៃ ឃុំគក់ ស្រុកពញ្ញាក្រែក ខេត្តត្បូងឃុំ ជាដើម គឺមានបើកលេងល្បែងស៊ីសងគ្រប់ប្រភេទបៀរឡុកឡាក់ ប្រជល់មាន់ ជាដើម។ល។ ហើយការលេងល្បែងទាំងនោះគឺមានភ្នាល់ចាក់លុយរាប់សិបលានរៀលខ្លះចាញ់ខ្លះឈ្នះក្នុងមួយថ្ងៃៗមិនតិចនាក់នោះទេគឺមនុស្សចូលលេងយ៉ាងច្រើនកុះករទាំងខ្មែរនិងយួន។
ប្រភពពីអ្នកមកលេងល្បែងម្នាក់បានឲ្យដឹងថា៖ បនល្បែងកាស៊ីណូនេះ មានល្បែងគ្រប់ប្រភេទ ឡុកឡាក់ បៀរ មាន់ជល់ ដែលក្នុងមួយគូរៗមានជល់ចាក់ចាប់ពី១លានរៀល ដល់៤០លានរៀលឯណោះ។ សម្រាប់ថ្ងៃធម្មតា ហើយបើមានគូរពិសេសគឺក្នុងគូរចាក់ចាប់ពី៥០០០ដុល្លារអាមេរិកទៅ២ម៉ឺនដុល្លារក៏មានដែរ ។តាមការសង្កេតអ្នកដែលដែលមកលេងក្នុងកាស៊ីណូនេះភាគច្រើនគឺមកពីឆ្ងាយ ហើយសុទ្ធតែខ្មែរយើង បើជនជាតិបរទេសមិនសូវមានទេ ។
ពលរដ្ឋ ដែលរស់នៅជិតទីនោះបានឲ្យដឹងថា៖ កាស៊ីណូនេះទើបនិងបើកលេង មិនទាន់បានពីខែស្រួលបួលទេ តែភ្ញៀវមកលេងវិញច្រើន កុះករ សឹងតែគ្មានកន្លែងដាក់រថយន្តផង ។
ពលរដ្ឋនៅតំបន់នោះសង្ឃឹមថា អាជ្ញាធរពាក់ពន្ធ័ ជាពិសេសមន្ត្រីថ្នាក់ជាតិ និងមានវិធានការចំពោះ កាស៊ីណូ ដែលបើកឲ្យខ្មែរចូលលេងដោយសិរីនេះផង កុំអោយដូចពាក្យចាស់ពោលថា កោកសឹកមាត់ត្រដោកឆ្អែតពោះក្របីនោះ ៕