ភ្នំពេញ ៖ ក្រសួងមហាផ្ទៃបានសម្រេចបង្កើតឲ្យមានសំបុត្រកំណោះតដោយឡែកសម្រាប់កូនចនបរទេសដែលកើតនៅស្រុកខ្មែរ។នេះបើតាមលោកឧត្តមសេនីយ៍សុខផលអគ្គនាយកដ្ឋានអន្តោប្រវេសន៍ឲ្យដឹងក្រោយពីបញ្ចប់សន្និបាតបូកសរុបការងារអន្តោប្រវេសន៍ នាល្ងាចថ្ងៃទី៣១ ខែមីនា ឆ្នាំ២០១៧។នាយឧត្តមសេនីយ៍ សុខ ផល បានបញ្ជាក់ថា លោកបានស្នើជូនចំពោះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយផ្ទាល់មាត់ ដើម្បីសុំការអនុញ្ញាតឲ្យមានសំបុត្រកំណើតប្រភេទថ្មីដោយឡែក ប្រើសម្រាប់កូនជនអន្តោប្រវេសន៍។ពាក់ព័ន្ធនឹងបញ្ហានេះ សម្ដេចក្រឡាហោម ក៏បានយល់ព្រមអនុញ្ញាតរួចហើយដែរ ហើយលោក សុខ ផល ក៏នឹងធ្វើលិខិតជាលាយលក្ខណ៍អក្សរជាផ្លូវការមួយ ដាក់ជូនសម្ដេចក្រឡាហោម ស ខេង នាពេលឆាប់ៗខាងមុខ។
ឧត្តមសេនីយ៍សុខផលបញ្ជាក់ថា «កន្លងមកនេះ យើងមិនដែលបែងចែកទេ កូនរបស់ជនអន្តោប្រវេសន៍កើតមកដាក់សញ្ជាតិខ្មែរតែម្តង បានន័យថា មេឃុំចេញសំបុត្រកំណើតហ្នឹង គាត់ចូលសញ្ជាតិនៅនឹងនោះហ្មង ដែលមិនអាចធ្វើអញ្ចឹងទៀតទៅរួចទេ»។ កំហុងឆ្គងទាំងនេះ ត្រូវបាននាយឧត្តមសេនីយ៍ សុខ ផល បញ្ជាក់ថា អនុវត្តអស់៣៥ឆ្នាំមកហើយ។
ចំពោះកូនជនអន្តោប្រវេសន៍ដែលបានចុះក្នុងបញ្ជីសំបុត្រកំណើតសញ្ជាតិខ្មែររួចហើយនោះ ក្រុមការងារអន្តរក្រសួង នឹងចេញប្រតិបត្តិការស្រាវជ្រាវឡើងវិញ បើសិនជារកឃើញថា សំបុត្រកំណើតរបស់ពួកគាត់មិនមានភាពស្របច្បាប់ទេនោះ ក្រុមការងារនឹងប្រើសំបុត្រប្រភេទថ្មីនោះ (កំពុងស្នើ) ចុះបញ្ជីជំនួសសំបុត្រកំណើតធម្មតាវិញ ពោលឲ្យពួកគាត់ត្រឡប់មកស្ថានភាពជនអន្តោប្រវេសន៍វិញ។ ដល់ពេលពួកគាត់អនុវត្តនីតិវិធីសុំចូលសញ្ជាតិ និងទទួលបានសញ្ជាតិខ្មែរស្របច្បាប់ហើយ ក្រុមការងារនឹងបញ្ចូលឈ្មោះពួកគាត់ ទៅក្នុងបញ្ជីសំបុត្រកំណើតសញ្ជាតិខ្មែរធម្មតាវិញដែរ។
អគ្គនាយកនគរបាលអន្តោប្រវេសន៍បានបញ្ជាក់ថា៖ គិតត្រឹមឆ្នាំ២០១៦ ជនអន្តោប្រវេសន៍ដែលកាន់អត្តសញ្ញាណបណ្ណសញ្ជាតិខ្មែរ មានជាង៦,០០០នាក់ ក្នុងចំណោមជនអន្តោប្រវេសន៍ ជាង១៣,០០០នាក់ (ភាគច្រើនជាជនជាតិវៀតណាម ប្រមាណ ១០,០០០នាក់)៕
