ខេត្តរតនគិរីៈ បន្ទាប់ពីសមត្ថកិច្ចជំនាញ បានចុះស្រាវជ្រាវ ករណីគ្រូបង្រៀនម្នាក់បានស្លាប់ ដោយសារកាំបិតបន្ទួស ចាក់ធ្លាយគូថស្លាប់ ក្នុងអំពើហឹង្សា លើគ្រួសារ កាលពីយប់ថ្ងៃទី២៩ ខែមិនា ឆ្នាំ២០១៧ និងបានចម្លើយសារភាព របស់ស្ត្រីជាប្រពន្ធ ។ អធិការនគរបាលក្រុងបានលុង បានកសាងសំណុំរឿង បញ្ជូនខ្លួនស្ត្រីជាជនសង្ស័យ ទៅតុលាការខេត្តរតនគិរី នៅរសៀលម៉ោង២.០០នាទី ថ្ងៃទី៣១ ខែមិនា ឆ្នាំ២០១៧ នេះហើយ។
លោកអធិការនគរបាលក្រុងបានលុង ហួត បូរី បានឲ្យដឹងថា បន្ទាប់ពីគ្រូបង្រៀនឈ្មោះ យ៉ុន ប៊ុនថា បានស្លាប់នៅមន្ទីរពេទ្យបង្អែកខេត្តរតនគិរី កាលពីយប់ថ្ងៃទី២៩ ខែមិនា ឆ្នាំ២០១៧ ដោយសារកាំបិតចាក់ត្រូវកំប៉េះគូថនោះ។ នគរបាលការិល័យព្រហ្មទណ្ឌកំរិតធ្ងន់ស្នងការរដ្ឋានខេត្ត សហការណ៍ជាមួយនគរបាលអធិការក្រុងបានលុង បានចុះស្រាវជ្រាវដល់កន្លែងកើតហេតុ ក្នងភូមិ តាផ្លឺន សង្កាត់កាចាញ ដើម្បីរកការពិតដែលជនសង្ស័យស្ត្រីជាប្រពន្ធថា ប្ដីរបស់ខ្លួនដួលអុកគូថលើកាំបិតបន្ទួស នៅពេលប្រតាយប្រតប់គ្នានោះ លោកអធិការថា គ្រាន់តែជាពាក្យឆ្លើយដោះសារតែប៉ុណ្ណោះ ។ លោកអធិការបន្តថា បើតាមការស្រាវជ្រាវ សពលោកគ្រូ យ៉ុន ប៊ុនថា ស្លាប់ដោយសារគេចាក់នឹងកាំបិតបន្ទួសបណ្ដាលឲ្យស្លាប់ ។ បន្ទាប់ពីការស្រាវជ្រាវ ស្ត្រីជនសង្ស័យជាប្រពន្ធជនរង្គ្រោះ ក៏បានសារភាពថា នាងបានចាក់សម្លាប់ប្ដីនាងមែន ដោយសារប្ដីនាងរករឿងប្រចាន់នាងនឹង មិត្តប្រុសចាស់។
ស្ត្រីជនសង្ស័យជាប្រពន្ធ ឈ្មោះ ឆ្មិច ណាងកិ បានសារភាពរាបរាប់ហេតុការណ៍ថា នៅយប់ថ្ងៃកើតហេតុ គាត់និងប្ដីបានទៅផឹកស្រា នៅផ្ទះឈ្មោះ ឡុង ដែលទើបតែទិញម៉ូតូថ្មី ពេលនោះប្ដីគាត់ផឹកអស់១កំប៉ុង ហើយក៏ត្រឡប់មកផ្ទះមុន ដើម្បីរៀបចំឥវ៉ាន់ឈប់លក់ដូរ ចំណែកគាត់នៅផឹកទីនោះបន្តមួយសន្ទុះក៏ទៅតាមក្រោយ ពេលមកដល់ផ្ទះប្ដីគាត់រករឿងឈ្លោះប្រចាន់ជាមួយមិត្តប្រុសចាស់។ ស្ត្រីជាប្រពន្ធនិយាយថា បើរស់នៅជាមួយគ្នាមិនបានលែងគ្នាទៅ ប្ដីគាត់តបវិញថា បើលែងគ្នាទាល់តែអញងាប់ នៅពេលដែលគាត់ឃើញប្ដីបែបនេះ ស្ត្រីជាប្រពន្ធបំរុងឡើងទៅដេកនៅផ្ទះធំ តែត្រូវប្ដីចាប់ដៃជាប់ ហើយយកកាំបិតបន្ទួសមកភ្ជង់ក ពេលនោះគាត់បានទះកាំបិតនោះធ្លាក់ទៅដី ហើយស្ត្រីជាប្រពន្ធក៏ស្ទុះទៅរើសកាំបិតក្នុងគោលបំណងយកទៅទុក តែត្រូវប្ដីគាត់ស្ទុះមកច្របាច់ក ស្ទើរដាច់ខ្យល់គាត់ក៏សម្រេចចិត្ត យកកាំបិតដែលកាន់នៅដៃចាក់ទៅលើប្ដីគាត់ក្រោមចង្កេះតែម្ដងទៅ។
គួររំលឹកថា អំពើហឹង្សានេះកើតឡើងកាលពីវេលាម៉ោង១១យប់ថ្ងៃទី២៩ មិនា ឆ្នាំ២០១៧ នៅចំណុចភូមិ តាផ្លឺន សង្កាត់កាចាញ ក្រុងបានលុង ខេត្តរតនគិរី។ ជនរងគ្រោះជាប្ដីឈ្មោះ យ៉ុន ប៊ុនថា បុខរបរជាគ្រូបង្រៀន ក្រោយពីបានមុតនឹងកាំបិទបន្ទួសចំគូថ ត្រូវបានដឹកយកទៅសង្គ្រោះនៅមន្ទីរពេទ្យបង្អែកខេត្ត ដោយរបួសធ្ងន់ធ្ងរពេក គាត់ក៏បានស្លាប់បាត់បង់ជីវិត នៅវេលាម៉ោង១១និង៣០នាទីយប់ថ្ងៃដដែល ហើយសាកសព ត្រូវក្រុមគ្រួសារដឹកមកធ្វើបុណ្យនៅគេហដ្ឋានវិញ។ នាង ឆ្មិច ណាងកិ ជាប្រពន្ធសព បានប្រាប់សមត្ថកិច្ចជំហានដំបូងថា គាត់និងប្តីបានមានជម្លោះនឹងគ្នា។ ក្នុងជម្លោះនោះប្តីគាត់បានកាន់កាំបិទបន្ទួស យកមកគំរាមសម្លាប់ តែនៅពេលមានការប្រតាយប្រតប់គ្នាកាំបិទបានធ្លាក់ចូលកៀបក្នុងប្រហោងរនាប បន្ទះឬស្សី (ផ្លែកាំបិទឡើងលើ ដងធ្លាក់ចុះក្រោម) ប្តីគាត់បានដួលអុកគូថលើកាំបិទ នៅក្រោយពេលមានការរុញច្រានគ្នាទៅវិញទៅមក៕
ដោយ: យឹម សារិទ្ធិ
