ខេត្តរតនគិរី ៖ រង្វង់មូលលោកយាយទូលចេក បានរងនូវការបុកយ៉ាងដំណំជារឿយៗ ដោយសារតែស្ថានភាពរបស់អ្នកបើកបរទូទៅមិនមានការប្រុងប្រយ័ត្ន។ ជាក់ស្តែងករណីគ្រោះថ្នាក់ចរាចរមួយនេះបានកើតឡើង បង្កឡើងដោយរថយន្តមួយគ្រឿងម៉ាក TOYOTA TUNTRA ពណ៌ខ្មៅ ដែលបើកបរទំនងក្នុងល្បឿនលឿន ទើបជ្រុលចង្កូតទៅបុកនឹងរង្វង់មូលលោកយាយទូលចេកដូច្នេះ។
ហេតុការណ៍ ត្រូវគេឃើញបានកើតឡើងនៅវេលាម៉ោង9:45នាទីយប់ថ្ងៃទី30 មិនា ឆ្នាំ2017យប់មិញនេះ ត្រង់ចំណុចរង្វង់មូលយាយទូលចេក សង្កាត់កាចាញ ក្រុងបានលុង ខេត្តរតនគិរី។
ស្ថានភាពនៃការបុកនោះ គឺរថយន្តTUNTRAខាងលើបានបើកបរពីទិសខាងលិច មកទិសកើត ដល់ត្រង់ចំណុចរង្វង់មូលលោកយាយទូលចេក អ្នកបើកបរទំនងជាងងុយដេក ទើបបញ្ជារថយន្តដោយមិនដឹងថា ត្រង់ចំណុចនោះមានរង្វង់មូល ក៏បណ្តាលអោយបើកបុកពេញមួយទំហឹងតែម្តង។
ស្ថានភាពជាក់ស្តែងនៅកន្លែងកើតហេតុ រថយន្តត្រូវគេឃើញខូចខាតផ្នែកខាងមុខ និងមានស្នាមបែកប្រេះស៊ីម៉ង់តិ៍រង្វង់មូលលោកយាយទូលចេកនោះ។ ក្រោយការបុកនេះ គេសង្កេតឃើញនាយប់ប៉ុស្តិ៍នគរបាល ទំនាក់ទំនងរថយន្តស្ទូចរបស់ការិយាល័យនគរបាលចរាចរជើងគោក នាំរថយន្តនោះទៅការិយាល័យនគរបាលសង្កាត់កាចាញ ដើម្បីអនុវត្តច្បាប់ចរាចរ។ ចំណែកអ្នកបើកបរ ដែលឈរលាយឡំជាមួយនិងអ្នកចោមរោមមើលហេតុការណ៍ បានជម្លៀសបន្លំគេចខ្លួនបាត់តែម្តងទៅ។ ប៉ុន្តែសាក្សី លួចខ្សឹបថា ជារថយន្តដឹកកម្មកររបស់អ្នកមានមុខមាត់ម្នាក់ នៅក្រុងបានលុងនេះ។
សូមជម្រាបថា រង្វង់មូលយាយទូលចេកនេះកាលដើមឡើយ ជារង្វង់ដែលគេដាំលំអដោយដើមផ្កា ដែលធ្វើអោយអ្នកបើកបរពិបាកនឹងមើលគ្នា នៅម្ខាងទៀតនៃរង្វង់មូលនោះ ប៉ុន្តែក្រោយមក តាមរយៈនៃការសំណូមពររបស់ប្រជាពលរដ្ឋ ក្នុងវេទិកាសាធារណៈដែលចូលរួមដោយឯកឧត្តម លី ធុជ ប្រធានក្រុមការងារចុះជួយខេត្តរតនគិរី ថាសូមអោយធ្វើយ៉ាងណាអោយមានលក្ខណៈល្អប្រសើរជាងនេះ ទើបក្រោយមកត្រូវបានរៀបចំដោយមិនមានដាំដើមផ្កាទេ ហើយរង្វង់មូលក៏មានកំពស់ទាបជាងមុនទៀតផង ដែលបង្កអោយអ្នកបើកបរអាចមើលគ្នាឃើញទាំងសងខាង ដើម្បីបញ្ចៀសនូវគ្រោះថ្នាក់ចរាចរដូចករណីនេះ៕
ដោយៈ យឹម សារិទ្ធិ
