ខេត្តរតនគិរី ៖ ជនជាតិវៀតណាម7នាក់ ត្រូវនគរបាលនាំមកស្នងការដ្ឋាន ដើម្បីអនុវត្តច្បាប់អន្តោប្រវេសន៍ ខណៈពួកគេបានឆ្លងចូលមកកម្ពុជា ប្រព្រឹត្តបទល្មើសព្រៃឈើដោយខុសច្បាប់។
វៀតណាមទាំង7នាក់នោះ ត្រូវនគរបាលអន្តោប្រវេសន៍សហការជាមួយនគរបាលស្រុកលំផាត់ និងកំលាំងបរិស្ថានផងដែរ បានចាប់ខ្លួនជាមួយនិងមធ្យោបាយរណាយន្តសំរាប់បំផ្លាញព្រៃឈើចំនួន08គ្រឿង ខណៈពួកគេកំពុងធ្វើសកម្មភាពកាត់ឈើនៅចំណុចឃុំសេដា ស្រុកលំផាត់ ជាប់ព្រំប្រទល់ជាមួយស្រុកអូរយ៉ាដាវ ខេត្តរតនគិរីនោះ។ ពួកគេត្រូវនគរបាលឃាត់ខ្លួននៅវេលាម៉ោង3រសៀលថ្ងៃទី27 ខែមិនាម្សិលមិញនេះ ហើយបាននាំខ្លួនមកកាន់ស្នងការដ្ឋាននគរបាលខេត្ត ដែលតាមរបាយការណ៍នគរបាលអោយដឹងថា ពួកគេនិងវត្ថុតាងនឹងត្រូវចាត់វិធានការតាមនីតិវិធីច្បាប់។
នេះជាលើកទីពីរហើយ ដែលកាលពីថ្ងៃទី18 មិនាកន្លងទៅ វៀតណាមចំនួន7នាក់ក៏ត្រូវនគរបាលចាប់ខ្លួនដូចគ្នានេះផងដែរ ខណៈពួកគេចូលមកកម្ពុជា ប្រដាប់ដោយរណាយន្ត និងត្រាក់ទ័រសំរាប់អូសឈើ ហើយបំផ្លាញព្រៃឈើដោយខុសច្បាប់ផងទៀត នៅចំណុចព្រំប្រទល់ចំនួន3ស្រុកគឺ ស្រុកអូរយ៉ាដាវ ស្រុកបរកែវ និងស្រុកអណ្តូងមាស នោះ ។
ស្នងការរងទទួលបន្ទុកអន្តោប្រវេសន៍ លោក ជា ប៊ុនធឿន នៅរសៀលថ្ងៃទី28 ខែមិនានេះ អ្នកកាសែតមិនអាចស្វែងរកព័ត៌មានលំអិតជុំវិញ ថាតើនឹងមានចំណាត់តាមនីតិវិធីច្បាប់ដូចម្តេច ចំពោះវៀតណាមទាំង7នាក់នោះ៕
ដោយៈ យឹម សារិទ្ធិ
