ខេត្តមណ្ឌលគិរី ៖ មន្ត្រីរាជការ និងប្រជាពលរដ្ឋក្នុងខេត្តមណ្ឌលគិរីបាននាំគ្នាអំពាវនាវឲ្យលោក ស៊ុយ សែម រដ្ឋមន្ត្រីក្រសួងរ៉ែ និងថាមពលគួរពិនិត្យមើលភាពអសកម្មរបស់លោក សាន់ ដារិទ្ធ ដែលជាប្រធានមន្ទីររ៉ែ និង ថាមពលខេត្តមណ្ឌលគិរីខ្លះផង ក្នុងខណៈដែលអាជីវកម្មរ៉ែមាសខុសច្បាប់ជាច្រើនកំពុងកើតឡើង យ៉ាងពេញបន្ទុក។
ប្រភពពីមន្ត្រីតូចតាចនៅក្នុងផ្នែកមន្ទីររ៉ែ និងថាមពលខេត្តមណ្ឌលគិរីបានបង្ហើបឲ្យដឹងថា ឈ្មួញជនជាតិយួន និងជនជាតិចិនដែលកំពុងធ្វើអាជីវកម្មរ៉ែមាសខុសច្បាប់នៅឃុំចុងផ្លាស់ ស្រុកកែវសីមា សុទ្ធ តែមានទំនាក់ទំនងស្និទ្ធស្នាល់ជាមួយលោក សាន់ ដារិទ្ធ ទើបអ្វីៗអាចប្រព្រឹត្តទៅដោយរលូន។ រីឯ ប្រជាពលរដ្ឋដែលធ្វើអាជីវកម្មរ៉ែមាសបែបជាលក្ខណ គ្រួសារ ត្រូវប្រឈមនឹងលំបាកយ៉ាងខ្លាំង ដោយសារតែរងការគាបសង្កត់ស៊ីសំណូកសូកប៉ាន់សព្វបែបយ៉ាង។
តាមការអះអាងរបស់បងប្អូនប្រជាពលរដ្ឋដែលរស់នៅ ឃុំចុងផ្លាស់ ស្រុកកែវសីមាបានឲ្យដឹងថា ម្ចាស់ ការដ្ឋានជាជនជាតិយួន និងជនជាតិចិនអាចប្រើប្រាស់ឧបករណ៍ទំនើបៗ និងគ្រឿងចក្រធំៗ ធ្វើអាជីវកម្មរ៉ែមាសបំពានលើច្បាប់អនុញ្ញាតរបស់ក្រសួងរ៉ែ និងថាមពល។ ប៉ុន្តែលោក សាន់ ដារិទ្ធ មិនដែលចាត់វិធានការត្រួតពិនិត្យឲ្យបានដិតដល់នោះទេ ហើយបណ្ដោយឲ្យម្ចាស់ការដ្ឋានជនជាតិចិន និងជនជាតិយួនជាច្រើននាក់ទៀតជីករណ្ដៅរ៉ែជម្រៅរាប់រយម៉ែត្រ។
ប្រភពពីមន្ត្រី នៅក្នុងមន្ទីររ៉ែ និងថាមពលបានបង្ហើបឲដឹងថា លោក សាន់ ដារិទ្ធ គិតតែពីរឿង ផលប្រយោជន៍ប៉ុណ្ណោះ ទើបបណ្ដោយឲ្យម្ចាស់ការដ្ឋានជនជាតិចិន និងជនជាតិយួនធ្វើអាជីវកម្មរ៉ែ មាសខុសច្បាប់យ៉ាងអនាធិបតេយ្យដូចសព្វថ្ងៃនេះ។
ប្រជាសហគមន៍ភូមិពូទុង ឃុំចុងផ្លាស់ ស្រុកកែវសីមាបានលើកឡើងថា បច្ចុប្បន្ននេះពួកគាត់អាចជីករណ្ដៅរ៉ែអាជីវកម្មលក្ខណ គ្រួសារលើផ្ទៃដីរាបជម្រៅត្រឹមតែ២០ម៉ែត្រ ប៉ុណ្ណោះ។ ចំណែកម្ចាស់ការដ្ឋាន ជនជាតិយួន និងជនជាតិចិនប្រើឧបករណ៍ទំនើបៗ ជីករណ្ដៅដីជម្រៅរាប់រយម៉ែត្រ ហើយយករ៉ែមាស បានយ៉ាងច្រើនសន្ធឹកសន្ធាប់ ព្រោះមានការឃុបឃិតជាមួយមន្ត្រីពុករលួយ ក្នុងនោះលោក សាន់ ដារិទ្ធ ជាអ្នកទទួលបានផលប្រយោជន៍ច្រើនជាងគេ ។ ដូច្នេះលោក ស៊ុយ សែម រដ្ឋមន្ត្រីក្រសួងរ៉ែ និង ថាមពលគួរតែពិនិត្យមើលភាពមិនប្រក្រតីទាំងនេះផង ព្រោះតាមប្រភពខ្លះបានឲ្យដឹងថា ក្នុងមួយខែៗ លោក សាន់ ដារិទ្ធ អាចប្រមូលលុយបានរាប់ម៉ឺនដុល្លារពីការបណ្ដែតបណ្ដោយឲ្យជនជាតិយួន និងជនជាតិចិនធ្វើអាជីវកម្មរ៉ែមាសខុសច្បាប់ក្នុងឃុំចុងផ្លាស់។
ទន្ទឹមនឹងនេះអង្គភាពប្រឆាំងអំពើពុករលួយ ដែលមានលោក ឱម យ៉ិនទៀង ជាប្រធានគួរតែពិនិត្យមើលភាពមិនប្រក្រតីនៃការធ្វើអាជីវកម្មរ៉ែមាស ខុសច្បាប់យ៉ាងអនាធិបតេយ្យក្នុងឃុំចុងផ្លាស់ ស្រុកកែវសីមាផងដែរ ព្រោះបញ្ហានេះជាប់ពាក់ព័ន្ធអំពើពុករលួយយ៉ាងធ្ងន់ធ្ងរ៕