ខេត្តរតនគិរី ៖ ម្ចាស់ភោជនីយដ្ឋានម្លិះ៧៧ ដែលមានទីតាំងនៅក្នុងក្រុងបានលុង ខេត្តរតនគិរីកំពុងតែល្បីថា គឺជាអ្នកជំនួញឈើប្រណិតដ៍ល្បីល្បាញម្នាក់ទៅកាន់ប្រទេសវៀតណាម ដែលសមត្ថកិច្ចមិនហានបង្ក្រាប ។ ជាក់ស្តែងរថយន្តម៉ាកសាំយ៉ុង ពណ៌ស ពាក់ស្លាកលេខភ្នំពេញ2S-3178 ដែលតែងតែដឹកបទល្មើសឈើប្រណិតចេញពីចំណុចអូរល្វាក់ដែនជម្រកសត្វព្រៃលំផាត់ ឆ្លងកាត់ស្រុកលំផាត់ឆ្ពោះទៅកាន់ប្រទេសវៀតណាមនោះ គឺជារថយន្តម្ចាស់ភោជនីយដ្ឋានម្លិះ៧៧ ។
សមត្ថកិច្ចឈរជើងនៅតាមដងផ្លូវជាតិ78A បានប្រាប់អ្នកសារព័ត៌មានតាមទូរស័ព្ទឲ្យដឹងថា ស្ត្រីវ័យក្មេងស្រស់ស្អាត ឈ្មោះ ស្រីពេជ្រ ជាមេឈ្មួញឈើប្រណិតដ៍ធំនៅក្នុងខេត្តរតនគិរីនេះ។
បច្ចុប្បន្ន មេឈ្មួញឈ្មោះ ស្រីពេជ្រ កំពុងតែឋិតនៅក្នុងជំនួញព្រៃឈើយ៉ាងសកម្ម ដែលសមត្ថកិច្ចមូលដ្ឋានប្រាប់ថា រថយន្តសាំយ៉ុងរបស់នាង តែងដឹកឈើប្រណិតក្នុងមួយថ្ងៃពីរដង ចេញពីស្រុកលំផាត់ទៅកាន់ច្រកទ្វារអន្តអូរយ៉ាដាវ ។
សមត្ថកិច្ចប្រាប់បន្តទៀតថា ឈ្មោះ ស្រីពេជ្រ គឺជាមេឈ្មួញឈើប្រណិតរយះពេលជិតពីរឆ្នាំកន្លងមកហើយ។ មិនតែប៉ុណ្ណោះនាងគឺជាម្ចាស់ភោជនីយដ្ឋានដ៍ធំមួយប្រចាំក្រុងបានលុង ខេត្តរតនគិរី មាន(យីហោ)ឈ្មោះ«ម្លិះ77»ផងទៀត ។
ជាក់ស្តែងនៅព្រឹកថ្ងៃទី26 ខែមិនា ឆ្នាំ2017នេះ រថយន្តសាំយ៉ុងពណ៌ស ដឹកឈើរបស់នាង ក៍នៅតែត្រូវគេឃើញ កំពុងដឹកឈើទៅកាន់ប្រទេសវៀតណាម តាមច្រកទ្វារអន្តជាតិអូរយ៉ាដាវ ដដែល មិនមានស្ថាប័នណាហានក្អកជាមួយនាងទេរាប់ទាំងមេនគរបាលច្រកលោកអ៊ីចំរើនផងដែរ។
ការដឹកជញ្ជូនបទល្មើសឈើប្រណិតរបស់ស្រីពេជ្រ បានដោយរលូនបែបនេះ គឺត្រូវគេសង្ស័យថា នាងពិតជាមានខ្នងបង្អែកយ៉ាងធំនៅពីក្រោយបទល្មើសនេះហើយ បើមិនដូច្នោះទេ ជំនួញបទល្មើសព្រៃឈើរបស់នាង មិនអាចដំណើរការបានទេ។
គេរង់ចាំមើលថា ស្ថាប័ននៅតាមដងផ្លូវជាតិលេខ៧៨ ពីក្រុងបានលុងទៅកាន់ច្រកទ្វារអន្តជាតិអូរយ៉ាដាវ ដែលសមត្ថកិច្ចខ្សឹបប្រាប់ថាមានចំនួន៦០ ស្ថាប័ននោះ តើស្ថាប័នមួយណា ហានចេញមុខបង្ក្រាប ឬចាប់បទល្មើសព្រៃឈើរបស់ស្រីពេជ្រនេះ។
អ្នកសារព័ត៌មាន នឹងរង់ចាំផ្សព្វផ្សាយព័ត៌មាននេះ ខណៈពេលដែល មន្ត្រីសមត្ថកិច្ចផ្តល់ដំណឹងអំពីការរត់ពន្ធឈើប្រណិតរបស់ឈ្មោះ ស្រីពេជ្រ នោះបន្តទៀត ។
ជុំវិញបញ្ហាចោទប្រកាន់ខាងលើនេះ ឈ្មោះ ស្រីពេជ្រ អ្នកសារព័ត៌មាន មិនអាចសុំការបំភ្លឺបានទេនៅរសៀលថ្ងៃទី២៦ខែមិនានេះថាតើហេតុអីបានជានាងហ៊ានម្លេះ? ៕
ដោយៈ យឹម សារិទ្ធិ
