រាជធានីភ្នំពេញ ៖ ប្រភពពីមន្ត្រីគយមួយចំនួននៅក្នុងអគ្គនាយកដ្ឋានគយនិងរដ្ឋាករកម្ពុជា បានឲ្យដឹងថា បច្ចុប្បន្នមានសេចក្តីរាយការណ៍ថា លោកជំទាវភរិយាលោក គុណ ញឹម អគ្គនាយកគយនិងរដ្ឋាករ បាននិងកំពុងដើរតួនាទីយ៉ាងសំខាន់ ក្នុងការចាត់ចែងការងាររបស់ប្តី (ទាំងការងាររដ្ឋបាល និងការងារបច្ចេកទេសក្នុងស្ថាប័នគយ) ស្ថិតនៅក្នុងកណ្តាប់ដៃលោកជំទាវអគ្គនាយកទាំងអស់
ខុសប្លែកពីសម័យលោកប៉ែនស៊ីម៉នជាអគ្គនាយក ។ មិនដឹងថាតើ បញ្ហាប្តីសក្តិបីប្រពន្ធសក្តិបួននៅទីចាត់ការគយចឹងសម្តេចនាយករដ្ឋមន្ត្រី ហ៊ុន សែន និងលោក ទេសរដ្ឋមន្ត្រីអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដឹងដែរឬអត់នោះទេ? តើមានលិខិតជាសមេចក្តីប្រកាសឬអនុក្រឹតតែងតាំងដែរឬអត់នោះទេ។ទោះជាយ៉ាងណាលោកគួរពិនិត្យមើលខ្លះផងព្រោះបើតាមសម្តីមន្ត្រីគយតូចតាចអំពើពុករលួយក្នុងស្ថាប័នគយរាលដាលកាន់តែខ្លាំង ឡើងៗហើយ។
ប្រភពដែលស្និទ្ធនឹងលោកជំទាវអគ្គនាយកក៏បានបង្ហើបឲ្យដឹងដែរថា ការងាររដ្ឋបាល ការងារបច្ចេកទេសរបស់លោក គុណ ញឹម ត្រូវបានលោកជំទាវជាប្រពន្ធយកទៅធ្វើនៅផ្ទះ ដោយជួលក្មេងស្រីៗមួយក្រុមឲ្យពិនិត្យឯកសារទាំងនោះនៅផ្ទះតែម្តង។ បញ្ហានេះធ្វើឲ្យអគ្គ នាយករងនៃអគ្គនាយកដ្ឋានគយនិងរដ្ឋាករជាច្រើននាក់គ្មានការងារធ្វើហើយក៏ទម្លាយរឿងអា ស្រូវរបស់ជំទាវអគ្គនាយកជាបន្តបន្ទាប់ ។
ករណីលោកជំទាវក្លាយជានាយខុទ្ទការល័យឲ្យលោកគុណញឹមអគ្គនាយកគយនេះ(មិនដឹងថាមានលិខិតតែងតាំងឬអត់)ប្រភពពីមន្ត្រីគយតូចតាចបានឲ្យដឹងថា៖ បើប្រៀបធៀបកាលពីសម័យលោក ប៉ែន ស៊ីម៉ន ធ្វើជាមេ គយ គឺបច្ចុប្បន្ន អំពើពុករលួយក្នុងស្ថាប័នគយកើនឡើងជាងមុន៣ដង។
មន្ត្រីគយជាច្រើនដាក់រហស្សនាមលោកជំទាវគុណញឹមថា៖ « ជំទាវត្រូវប៉ាន់ គ្មានត្រាប្រណី»ព្រោះលោកជំទាវអាចប្រមូលលុយបានយ៉ាងច្រើនដោយសារលោកជំទាវចេះចាត់ចែងធ្វើការងារជំនួសប្តី ។
ជាងនេះទៅទៀត បើមន្ត្រីគយណាចង់ផ្លាស់ប្តូរប៉ុស្តិ៍ ឬចង់ឡើងតំណែងត្រូវមានទំនាក់ទំនង ជាមួយលោកជំទាវអគ្គនាយក ទើបអាចទទួលបានលទ្ធផលទាន់ចិត្ត ។ ថា វាសនាពួកគេកំពុងតែស្ថិតក្នុងកណ្តាប់ដៃជំទាវអគ្គនាយកគយ ដែលមានរហស្ស នាម « ជំទាវត្រូវប៉ាន់ គ្មានត្រាប្រណី» ទាំងស្រុងតែម្តង។ ដោយហេតុថា ការផ្លាស់ប្តូរកន្លែង ការងារ ការឡើងតំណែង និងតួនាទីរបស់មន្ត្រីគយរាប់ពាន់នាក់នៅពេលនេះមិនមែនស្ថិត នៅក្រោមការចាត់ចែងពីលោក គុណ ញឹម ជាអគ្គនាយកគយនោះទេ គឺជាសេចក្តីសម្រេច របស់លោកជំទាវអគ្គនាយកទៅវិញ។ ប្រភពខ្លះបានឲ្យដឹងថា មន្ត្រីគយយខ្លះដែលចេះអែប អបលោកជំទាវ ឬភរិយាពួកគេចេញចូលផ្ទះលោកជំទាវញឹកញាប់គឺអាចឡើងតួនាទីក្នុងមួយ ឆ្នាំ២ដង និងបានឈរជើងនៅប៉ុស្តិ៍ត្រូវប៉ាន់រហូត ។
បើតាមសេចក្តីរាយការណ៍ មន្ត្រីគយខ្លះដែលចង់ដូរប៉ុស្តិ៍ឈរជើងសុខចិត្តលក់ផ្ទះសម្បែងដើម្បីបានចូលជួប លោកជំទាវអគ្គនាយកព្រោះត្រូវចំណាយពី២ម៉ឺនទៅ៣ម៉ឺនដុល្លារទើបអាចទៅរួចបើមិនដូច្នេះទេកុំសង្ឃឹមឲ្យសោះ។
មន្ត្រីគយខ្លះបានបង្ហើបថា កាលជំនាន់លោក ប៉ែន ស៊ីម៉ន ធ្វើជាអគ្គនាយកគយគឺការប្តូរប៉ុស្តិ៍ត្រូវចំណាយត្រឹម៣០០០ទៅ៥០០០ដុល្លារប៉ុណ្ណោះ ប៉ុន្តែឥឡូវត្រូវ គុណនឹង១០ ទៅហើយពិតជាមិនធម្មតាទេ(ស៊ីក) ។ ចំណែកមន្ត្រីគយថ្នាក់ប្រធានស្នាក់ការ ប្រធាន ការិយាល័យ និងប្រធានសាខាគយតាមបណ្តាខេត្តនានាបើចង់ប្តូរប៉ុស្តិ៍ត្រូវចំណាយរាប់សែន ដុល្លារទើបបានសម្រេច ។
ខាងលើនេះជាសេចក្តីរាយការណ៍ធ្លាយចេញពីមន្ត្រីនៃទីចាត់ការគយនិងរដ្ឋាករដែលមាតុភូមិមិនទាន់អាចសុំការពន្យល់ពីលោកគុណញឹមអគ្គនាយកគយនិងរដ្ឋាករបានទេ ។ សង្ឃឹមថា នឹងទទួលបានការប្រតិកម្មបកស្រាយ ។ ទោះជាយ៉ាងណា ព័ត៌មាននេះសង្ឃឹមថាអាចជាប្រភពសម្រាប់ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំ ពើពុករលួយយកធ្វើជាមូលដ្ឋានស៊ើបអង្កេតរកការពិត ដើម្បីទីមួយបញ្ឈប់បទល្មើសពុករលួយនិងអនុវត្តតានអនុសាសន៍សម្តេចតេជោ ស្តីពីការហាមលោកដៃពីប្រពន្ធអ្នកធំក្នុងកិច្ចការរដ្ឋ ដែលពាក្យខ្មែរហៅថាប្តីសក្តិបីប្រពន្ធសក្តិ ៤ នោះផងដែរ ៕
