ក្រចេះ៖ សកលវិទ្យាល័យក្រចេះ ស្ថាបនារួចរាល់ជាស្ថាពរហើយ ដោយចំណាយថវិការប្រមាណជាង ១២លានដុល្លាសហរដ្ឋអាមេរិក និងគ្រោងសម្ភោធដាក់ឲ្យប្រើប្រាស់ជាផ្លូវការនៅចុងឆ្នាំ២០១៧ និងត្រៀមទទួលសិស្សនិស្សិតចុះឈ្មោះចូលរៀននៅដើមឆ្នាំ២០១៨ខាងមុខនេះ ។
សកលវិទ្យាល័យក្រចេះ ត្រូវបានសម្ពោធបើកការរដ្ឋានសាងសងសកលវិទ្យាល័យក្រចេះជាផ្លូវការកាលពីថ្ងៃទី២៦ ខែកញ្ញា ឆ្នាំ២០១៥កន្លមទៅ ក្រោមអធិបតីភាពឯកឧត្តមកិតិ្តសេដ្ឋាបណ្ឌិត គាត ឈន់ ឧបនាយករដ្ឋមន្ត្រីប្រចាំការ និងជាតំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ប៊ូ ជិងយូ (BU JIANGUO) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំនៅកម្ពុជា និងបានស្ថាបនារួចរាល់ជាស្ថាកាលពីថ្ងៃទី១៥ ខែមករា ឆ្នាំ២០១៧ ដោយវិស្វករជំនាញមករបស់ចិន និងបានចំណាយថវិកាសរុបប្រមាណជាង ១២លានដុល្លាសហរដ្ឋអាមេរិក ក្រោមជំនួយពីមិត្តចិនជាង ១០លានដុល្លា និងទុនមូលនិធិឧត្តមសិក្សាខេត្តក្រចេះ ជាង ២លានដុល្លាសហរដ្ឋអាមេរិក ។
ទន្ទឹមនោះ សកលវិទ្យាល័យមាន មហាវិទ្យាល័យចំនួន ៣មហាវិទ្យាល័យ គឺមហាវិទ្យាល័យវិជ្ជាសាស្ត្រសត្វនឹងបសុពេទ្យ មហាវិទ្យាល័យគ្រប់គ្រងអាជីវកម្ម និងមហាវិទ្យាល័យវិជ្ជាសាស្ដ្រកសិកម្ម និងមានវិទ្យាស្ថានចំនួន ២ គឺវិទ្យាស្ថានមជ្ឈវិជ្ជា និងវិទ្យាស្ថានភាសាបរទេសនឹងបច្ចេកវិជ្ជាពត៌មានវិជ្ជា ។
នេះគឺជាសកលវិទ្យាល័យទី៥ហើយ ដែលធំជាងគេបង្អស់ប្រចាំនៅភូមិភាគឦសាន្ដ បន្ទាប់ពីសកលវិទ្យាល័យនៅខេត្តត្បូងឃ្មុំ ។
សកលវិទ្យាល័យនេះ អាចប្រមូលផ្ដុំសិស្សនិស្សិត មកពីតាមបណ្ដាខេត្តដូចជា ខេត្តព្រះវិហារ ស្ទឹងត្រែង មណ្ឌលគិរី រតនៈគិរី ខេត្តក្រចេះ និងក៏អាចមាននិស្សិតមកពីខេត្តត្បូងឃ្មុំ និងកំពង់ចាមផងដែរ ។
ជាងនេះទៀតសោត សកលវិទ្យាល័យក្រចេះ ក៏នៅមានផ្ទៃដីកសិកម្មចំនួន ១០០ហិកតា នៅស្រុកសំបូរសម្រាប់ធ្វើការពិសោធន៍ និងមានផ្ទៃបឹងធម្មជាតិទំហំជាង ៣០ហិកតា នៅក្នុងស្រុកចិត្របុរី សម្រាប់ធ្វើការពិសោធន៍ និងចិញ្ចឹមត្រី ថែមទៀតផង ៕ ដោយកិះខន
