អស់រយៈពេលជិតមួយសតវត្ស ចាប់តាំងពីឆ្នាំ ១៨៦៣ ប្រជាជាតិយើងត្រូវស្ថិតក្រោមអាណានិគមបារាំង។ ក្នុងអំឡុង ពេលនោះ ប្រជាពលរដ្ឋកម្ពុជា បាត់បង់អស់នូវសិទ្ធិសេរីភាព គ្រប់បែបយ៉ាង កិច្ចការក្នុង និងក្រៅប្រទេស រួមទាំង សកម្មភាព សេដ្ឋកិច្ច សង្គមកិច្ច វប្បធម៌ ត្រូវធ្លាក់ក្នុងការត្រួតត្រាទាំងស្រុង រប់អាណានិគមបារាំង និងស្ថិតក្នុងស្ថានភាពយ៉ាប់យ៉ឺនជាទីបំផុត។ នេះជាសន្ទរកថា របស់ឯកឧត្តម ច័ន្ទ សុផល អភិបាលនៃគណអភិបាលខេត្តបាត់ដំបង ថ្លែងក្នុងឱកាសប្រារឰខួបលើកទី៦១ នៃទិវា បុណ្យឯករាជ្យជាតិ និងទិវាកំណើតកងយោធពលខេមរភូមិន្ទ ៩ វិច្ឆិកា ១៩៥៣ ៩ វិច្ឆិកា ២០១៤ កាលពីថ្ងៃទី ១១ ខែវិច្ឆិកា នៅ មហាស្រពស្ទឹងសង្កែ ក្រោមការនិមន្ត និងអញ្ជើញចូលរួមពីព្រះសង្ឃ មន្ត្រីរាជការ កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ។
ឯកឧត្តម ច័ន្ទ សុផល បានបញ្ជាក់ទៀតថា ដើម្បីស្រោចស្រង់ប្រទេសជាតិមាតុភូមិ ឱ្យរួចផុតពីការរំលោភ ឈ្លានពាន ការគាប់សង្កត់ពីអាណានិគមបារាំង និងដណ្តើមយកមកវិញនូវ សិទ្ធិសេរីភាព អធិប្បតេយ្យភាព បូរណភាពទឹកដី កិត្យនុភាព និង វឌ្ឍនៈភាពសង្គម ព្រះបរមរតនៈកោដ្ឋ ព្រះបាទសម្តេចនរោត្តម សីហនុ ដែលជាព្រះមហាក្សត្រដ៏ឆ្នើម មានទឹកព្រះទ័យស្នេហាជាតិ ដ៏ខ្ពង់ខ្ពស់ មានព្រះបញ្ញាញាណដ៏មុនថ្លា បានបំពេញព្រះរាជបេសសកម្មដ៏ថ្លៃថ្លា ពុះពារជំនះរាល់ការលំបាក ប្រកបដោយវីរៈភាព អង់អាចក្លាហាន។ ចាប់ពីថ្ងៃទី ៩ ខែកុម្ភៈ ឆ្នាំ ១៩៥៣ កិច្ចព្រមព្រៀងត្រូវបានចុះហត្ថលេខាជាបន្តបន្ទាប់ ស្តីពីការផ្ទេរអំណាច ខាងសមត្ថកិច្ចតុលា នគរបាល និងយោធា ប្រគល់ឱ្យរាជរដ្ឋាភិបាលកម្ពុជាវិញ។នាថ្ងៃទី៩ វិច្ឆកា ឆ្នាំ ១៩៥៣ គឺជាទិវាដ៏មហាក្ខត្តបក្ស បើកទំព័រ ប្រវិត្តសាស្ត្រចារិក នូវការផ្ទេរអំណាចទាំងអស់ របស់ពួកអាណានិគមបារាំងថ្វាយចំពោះ ព្រះករុណាសម្តេច ព្រះបាទនរោត្តម សីហនុ ហើយប្រទេសកម្ពុជាក៏បានទទួលឯករាជ្យពេញ បរិបូរចាប់ពីពេលនោះតមក។
តែជាអកុសល រដ្ឋប្រហារ ទម្លាក់សម្តេចព្រះនរោត្តម សីហនុ ពីព្រះប្រមុខរដ្ឋស្របច្បាប់បានកើតឡើងនាថ្លៃទី ១៨ ខែមិនា ឆ្នាំ១៩៧០ និងទម្ងន់សែនមហាធ្ងន់ លើសពីនេះទៀតពីរបបប្រល័យពូជសាសន៍ ប៉ុលពល បានបំផ្លាញសង្គមជាតិ រលាយហិនហោចគ្មានសល់អ្វីឡើយ។ ក្រោមការតស៊ូ ប្រយុទ្ធរបស់យុទ្ធជន យុទ្ធនាទី បានវាយផ្តួលរំលំ របបយង់ឃ្នងនេះ រហូតទទួលបានមហាជ័យជំនៈ ៧មករា ១៩៧៩ ដែលជាទិវា ប្រវត្តិសាស្ត្រ កម្ពុជា ធ្វើឱ្យទឹកដី និងប្រជាពលរដ្ឋ រស់និងរីកចំរើនឡើងវិញគ្រប់វិស័យ។ មកដល់ពេលនេះយើងទាំងអស់គ្នាមាន មោទនៈភាពក្រៃលែង ចំពោះសមិទ្ធិផលធំៗ ជាប្រវត្តិសាស្ត្រដែលសម្រេចបាន ក្នុងកំណាត់ផ្លូវដ៏វែងឆ្ងាយ ៕
