ភ្នំពេញ ៖ ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការនិងជារដ្ឋមន្ត្រីស្តីទី ទីស្តីការគណរដ្ឋមន្ត្រីនឹងគ្រប់គ្រងតែមួយប៉ុណ្ណោះ បន្តពីសម្តេចវិបុលបញ្ញា សុខ អាន ដែលគ្រប់គ្រង់ច្រើនស្ថាបន័មុនពេលទទួលមរណៈភាព ។ ស្ថាបន័ដែលឯកឧត្តម ប៊ិន ឈិនត្រូវទទួលបន្តនោះ រួមមាន ៖ សាលាក្ដីខ្មែរក្រហមតែមួយប៉ុណ្ណោះ បន្ថែមលើការងារចាស់គឺជាប្រធានអាជ្ញធរជាតិដោះស្រាយទំនាស់ដីធ្លី ។ នេះបើតាមការឲ្យដឹងដោយសម្តេចតេជោ ហ៊ុន សែន នាយករដ្ឋមន្ត្រីកាលពីព្រឹកថ្ងៃទី២២ មីនាក្នុងពិធីប្រគល់សញ្ញាបត្រ័ជូននិស្សិត ។ នៅសល់ពីនេះ មានតែស្ថាប័នបីប៉ុណ្ណោះ នឹងត្រូវស្ថិតក្រោមចំណុះរបស់ទីស្ដីគណៈរដ្ឋមន្ត្រីដដែល គឺអាកាសចរស៊ីវិល ក្រុមប្រឹក្សាកំណែទម្រង់រដ្ឋនិងរាជបណ្ឌិតសភា ។ ការប្រកាសរបស់សម្តេចតេជោ គឺបានធ្វើឡើងដើម្បីកែតម្រូវការផ្តល់ពតិមានខុសឲ្យអ្នកកាសែត ដោយឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាល។
សម្តេច ហ៊ុន សែន បញ្ជាក់ថា ការលើកឡើងរបស់ឯក ផៃ ស៊ីផាន ជាការផ្ដល់ព័ត៌មានខុស ដែលថាតួនាទីទាំងប៉ុន្មានរបស់អតីតរដ្ឋមន្ត្រីទីស្ដីការគណៈរដ្ឋមន្ត្រី លោក សុខ អាន នឹងត្រូវផ្ដល់ជូនលោក ប៊ិន ឈិន ដែលទើបទទួលតួនាទីស្ដីទីពីលោក សុខ អាន ក្រោយលោកទទួលមរណភាព។ «ពេលខ្លះមិនមែនអ្នកសារព័ត៌មានខុសទេ ប៉ុន្តែយើង(អ្នកនាំពាក្យ) អ្នកផ្ដល់ព័ត៌មានឲ្យគេខុស។ រួចអ្នកមានចេតនាអាក្រក់ក៏ពង្រីកថែមទៅ! អត់មានដូរអ្វីទាំងអស់ វាទៅជាឆ្កួតអស់ចឹងទៅ! ឥឡូវដើម្បីកែ ចាក់មួយម្ជុលបាត់ឆ្កួត»។
សម្តេចតេជោ ហ៊ុន សែន បញ្ជាក់ថា៖ សម្រាប់លោកឧបនាយករដ្ឋមន្ត្រី ប៊ិន ឈិន ដែលកំពុងទទួលតួនាទីរដ្ឋមន្ត្រីស្ដីទីទីស្ដីការគណៈរដ្ឋមន្ត្រី នឹងមិនគ្រប់ការងាររបស់លោក សុខ អាន ទាំងអស់ឡើយ ដោយគ្រប់គ្រងតែសាលាក្ដីខ្មែរក្រហមតែមួយប៉ុណ្ណោះ។ ចំណែកការងារដទៃទៀតដែលស្ថិតក្រោមស្ថាប័នណា នឹងត្រូវផ្ដល់ទៅស្ថាប័ននោះ។
លោកថា អាជ្ញាធរជាតិអប្សរា និងអាជ្ញាធរជាតិព្រះវិហារ នឹងត្រូវប្រគល់ទៅឲ្យរដ្ឋមន្ត្រីក្រសួងវប្បធម៌ និងវិចិត្រសិល្បៈ ជាអ្នកគ្រប់គ្រង។ ប្រធានកាយរិទ្ធិ ត្រូវផ្ដល់ទៅរដ្ឋមន្ត្រីក្រសួងអប់រំ ហើយរដ្ឋមន្ត្រីក្រសួងសាធារណការ និងដឹកជញ្ជូន នឹងត្រូវគ្រប់គ្រងគណៈកម្មការផ្លូវដែក។ ដោយឡែកក្រុមប្រឹក្សាគណៈវិស្វកម្ម នឹងត្រូវឲ្យរដ្ឋមន្ត្រីក្រសួងការងារជាអ្នកទទួលខុសត្រូវ។ រីឯសាលាភូមិន្ទរដ្ឋបាល នឹងត្រូវស្ថិតក្រោមការគ្រប់គ្រងរបស់ក្រសួងមុខងារសាធារណៈ ខណៈសាលាវិជ្ជាជីវៈតុលាការ និងត្រូវប្រគល់ឲ្យ ក្រសួងយុត្តិធម៌។
សម្តេច ហ៊ុន សែន ក៏ស្នើឲ្យសារព័ត៌មានកែតម្រូវឡើងវិញ នូវអ្វីដែលលោក ផៃ ស៊ីផាន បានថ្លែងនាពេលកន្លងទៅ និងត្រូវរកការបញ្ជាក់ឲ្យបានច្បាស់ជាមុនសិនមុននឹងផ្សាយ។ ទោះជាយ៉ាងណាក៏ដោយ លោក ហ៊ុន សែន សុំទោសឯក ផៃ ស៊ីផាន ចំពោះការស្ដីបន្ទោសនេះ ប៉ុន្តែលោកថា បើលោកមិននិយាយ គេអាចនឹងយល់ច្រឡំចំពោះរដ្ឋាភិបាល រួមនឹងការប្រមាថរដ្ឋាភិបាលផង។
សូមបញ្ជាក់ថា ឯកឧត្តម ប៊ិន ឈិន ជាសមាជិកអចិន្ត្រៃយ៍គណបក្សប្រជាជនកម្ពុជា ដែលធ្លាប់ធ្វើជាប្រធានក្រុមប្រឹក្សាធម្មនុញ្ញចំនួន២អាណត្តិមុននឹងមកធ្វើជាឧបនាយករដ្ឋមន្ត្រីនិងជាប្រធាន អាជ្ញាធរជាតិដោះស្រាយទំនាស់ដីធ្លីជំនួសសម្តេច សុខ អាន ៕
