ក្រចេះ ៖ ជលផលខេត្តក្រចេះបានបញ្ជូនជនសង្ស័យម្នាក់ ដែលប្រើឧបករណ៍ឆក់ក្នុងតំបន់អភិរក្សសត្វផ្សោតទន្លេមេគង្គ ស្ថិតនៅភូមិស្ថិតនៅចំណុចភូមិកាកុត ឃុំសំបុក ស្រុកចិត្របុរី ខេត្តក្រចេះ ទៅតុលាការនៅថ្ងៃទី២០ ខែមីនា ឆ្នាំ២០១។
ជនសង្ស័យម្នាក់ក្នុងចំណោមបក្សពួក២នាក់ ដែលលួចធ្វើសកម្មភាពឆក់ត្រីនៅតាមដងទន្លេមេគង្គ ត្រូវកម្លាំងមន្ត្រីជំនាញខណ្ឌ រដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ រួមសហការជាមួយគណៈបញ្ជាការឯកភាពស្រុកចិត្របុរី ចូលរួមផ្ទាល់ដោយកម្លាំងអាវុធហត្ថស្រុក ឆ្មាំទន្លេអភិរក្សសត្វផ្សោតប៉ុស្តិ៍ជ្រោយបន្ទាយ និងសហគមន៍នេសាទ បានចុះប្រតិបត្តិការបង្ក្រាបបទល្មើស នេសាទកាលពីយប់ថ្ងៃទី១៨ ខែមីនា ឆ្នាំ២០១៧ ដោយចាប់ឃាត់បាន ។
ជនសង្ស័យដែលសមត្ថកិច្ចចម្រុះឃាត់ចាប់បានគឺមានឈ្មោះ ភួង ណាន ភេទប្រុស អាយុ៤០ឆ្នាំ រស់នៅភូមិកាកុត ឃុំសំបុក ស្រុកចិត្របុរី ។
វត្ថុតាងរួមផ្សំនៃបទល្មើសដែលរឹបអូសបានគឺមានទូកម៉ាស៊ីនម៉ាកកាវ៉ាកម្លាំង៦សេះចំនួន០១គ្រឿង អាំងវែកទ័រឆក់ត្រី០១គ្រឿង អាគុយ៥០អំពែរ០១គ្រឿង ដងឆក់ចំនួន០២ កន្ត្រង់ដងត្រីចំនួន០១ និងត្រីចម្រប្រហែល០៣គក្រ ។
ពេលនេះជនសង្ស័យត្រូវបានសមត្ថកិច្ចនាំយកទៅឃុំខ្លួនជាបណ្តោះអាសន្ននៅទីបញ្ជាការកងរាជអាវុធហត្ថខេត្តក្រចេះដើម្បីកសាងសុំណុំឯកសារ បញ្ជូនទៅសាលាតំបូងខេត្តក្រចេះនៅថ្ងៃទី២០ ខែមីនា ឆ្នាំ២០១៧ ចាត់ការបន្តតាមនីតិវិធីច្បាប់ស្តីពីជលផល ៕