ខេត្តរតនគិរី ៖ ទំនៀមទំលាប់ប្រពៃណីជនជាតិដើមភាគតិចទំពូននៅតែគោរពកេរ្តិ៍ដំណែលដូនតារហូតដល់បច្ចុប្បន្ន ។ ជាក់ស្តែងនៅថ្ងៃទី១៩ ខែមីនា ឆ្នាំ២០១៧ វេលាម៉ោង២រសៀលនៅចំណុចផ្លូវជាតិលេខ៧៨ក្បែរជើងភ្នំយក្សឡោម ស្ថិតនៅភូមិភ្នំ សង្កាត់យក្សឡោម ក្រុងបានលុង មានកម្មវិធីមួយដោយមានជនជាតិដើមភាគតិច ទំពួនប្រមាណ២០-៣០នាក់មកជួបជុំគ្នាកាប់ក្របី១ក្បាលសែនអ្នកជំងឺដោយចោទថាខ្មោចជនជាតិគ្រឹងចងកនៅទីនេះអស់រយៈពេលជាង២០ឆ្នាំមកហើយនោះធ្វើអោយកូនប្រសារ និងតាមផ្តន្ទាធ្វើអោយកូនប្រសារប្រុសរបស់គាត់ឆ្កួត និងឈឺរាំរៃ។
ទាក់ទិននឹងករណីខាងលើ ត្រូវបានស្ត្រីម្នាក់មានឈ្មោះ ថោង យ៉ាង អាយុ៤៩ឆ្នាំ ជនជាតិទំពួន ដែលមានប្តីឈ្មោះទីន ខាំបី អាយុ៦០ឆ្នាំ បច្ចុប្បន្នរស់នៅភូមិឡូន ឃុំទីងចាក់ ស្រុកបរកែវ ស្ត្រីរូបនោះបានអះអាងថាមូលហេតុដែលគាត់ធ្វើដំណើរពីស្រុកបរកែវមកកាប់ក្របី១ក្បាលសែននៅចំណុចខាងលើគឺក្រុមគ្រួសាររបស់គាត់ព្រមទាំងអ្នកភូមិបានទៅរកគ្រូទាយរបស់ជនជាតិទំពួន បានមើលឃើញថាកូនប្រសាររបស់គាត់មានឈ្មោះថោង វណ្ណា អាយុ១៩ឆ្នាំ ដែលយកកូនស្រីគាត់បង្កើតឈ្មោះ ថោង ទាម អាយុ១៨ឆ្នាំ បានរៀបការអស់រយៈពេល៦ខែហើយ ។
អ្នកស្រីបានបន្តទៀតថា គ្រូបានទាយថាកូនប្រសាររបស់គាត់ត្រូវបានខ្មោចស្ត្រីម្នាក់ចងកនៅចំណុចសែនបានទៅធ្វើអោយកូនប្រសាររបស់គាត់ឆ្កួតតាំងពីអាយុ១៣ឆ្នាំរហូតមកដល់បច្ចុប្បន្ន ពេលនេះគាត់ជាម្តាយក្មេក និងអ្នកភូមិបាននាំគ្នាធ្វើតាមប្រពៃណីជនជាតិទំពួន កាប់ក្របីឈ្មោលមួយក្បាលដែលទិញគេតម្លៃ១លាន៦០ម៉ឺនដើម្បីបង្គប់កិច្ចអោយកូនប្រសារគាត់ជា លោកស្រីបានបន្តទៀតថាការសែនព្រេងនេជាលើកទី២ហើយ លើកទី១អស់ជ្រូក២ក្បាល។
បច្ចុប្បន្ននេះ គាត់ជាគ្រួសារក្រីក្រមួយប្រកបមុខរបរស៊ីឈ្នួលដកដំឡូងមី អោយអ្នកភូមិក្នុង១ហិកតា១៥ម៉ឺនរៀល គាត់បានត្អូញត្អែលទៀតថា លុយដែលគាត់យកមកទិញក្រពីសែនពេលនេះបានទៅខ្ចីលុយAMKខេត្តរតនគិរីចំនួន២លានរៀលធ្វើអោយគ្រួសាររបស់គាត់ជីវភាពធ្លាក់ដុនដាបយ៉ាងខ្លាំង ។
ដោយឡែក លោកមេកន្ទ្រៀងខ្មែរហៅថាអាចារ្យដែលមានឈ្មោះទើល ម៉ែល អាយុ៦៨ឆ្នាំ ជនជាតិទំពួនរស់នៅភូមិភ្នំ សង្កាត់យក្សឡោម ក្រុងបានលុង បានអោយដឹងថាកម្មវិធីនេះជាអបីជំនឿរបស់បងប្អូនជនជាតិដើមភាគតិចទំពួនតាំងពីយូរលុងណាស់មកហើយនៅពេលសែនគេហាមមិនអោយអ្នកជំងឺមកជិតកន្លែងសែននោះទេ និងហាមបងប្អូនខ្មែរដែលមិនមែនជាជនជាតិទំពួនមកសួរសុខទុក្ខអ្នកជំងឺនោះឡើយ គាត់បានបន្តទៀតថាអ្នកជំងឺឈឺដូចជាទី១ឆ្កួតរត់ចេញពីផ្ទះ ២-៣ថ្ងៃ ឫមួយប្រកាច់ជាញឹកញាប់ ទី២ ជំងឺដេកមិនឡើងពីកន្ទេល៣-៤ថ្ងៃ ហើយអ្នកជំងឺនេះតាំងពីអាយុ១៣ឆ្នាំរហូតមកដល់បច្ចុប្បន្ន ហើយបងប្អូនជនជាតិនាំគ្នាផឹកស្រាពាង។
ទោះជាយ៉ាងណា នេះគ្រាន់តែជាអបិយជំនឿរបស់បងប្អូនជនជាតិដើមភាគតិចប៉ុណ្ណោះ ដែលនូវរាល់មានអ្នកណាម្នាក់ឈឺថ្កាត់ ពួកគាត់តែងធ្វើកិច្ចសែនព្រេននេះ ដែលពួកគាត់ជឿថា ការសម្លាប់សត្វក្របី និង ផឹកស្រាពាងដើម្បីសែននេះ បានធ្វើអោយអ្នកជម្អឺនៅក្នុងផ្ទះ ឬក្នុងភូមិឋានជាសះស្បើយពីរោគាពាធ៕
ដោយៈ យឹម សារិទ្ធិ