កន្លងទៅថ្មីៗ ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង រួមជាមួយឯកឧត្តម លោកជំទាវលោក លោក ស្រី ជាក្រុមប្រឹក្សាខេត្ត លោកអភិបាលរងខេត្ត លោកអភិបាល អភិបាលរង ក្រុមប្រឹក្សាក្រុងបាត់ដំបង មន្ត្រីរាជការកងកម្លាំង ប្រដាប់អាវុធយុវជននៃសហភាពសហព័ន្ធយុវជនកម្ពុជា ខេត្តបាត់ដំបងជាច្រើនរូប បានចូលរួមដង្ហែរពានរង្វាន់ ដោយចេញដំណើរពី ឃុំជ្រៃ ឆ្ពោះមកទីក្រុងបាត់ដំបង និងចូលសាលាខេត្តតែម្តង។
ថ្លែងនៅក្នុងសាលាខេត្ត ឯកឧត្តម ច័ន្ទ សុផល បានបញ្ជាក់ថា យើងទាំងអស់គ្នាបានប្រារព្វធ្វើពីធីដង្ហែរពានរង្វាន់និរន្តរភាព បរិស្ថាននៃទីក្រុងអាស៊ាន។ នៅក្នុងកិច្ចប្រជុំលើកទី៣ កន្លងទៅហេិយី កាលពីថ្ងៃទី ៣០ ខែតុលា ឆ្នាំ២០១៤ ប្រតិភូរបស់ ខេត្តបាត់ដំបង បានទៅទទួលពានរង្វាន់នេះ នៅក្នុងកិច្ចប្រជុំមួយ នៅឯសាធារណរដ្ឋ ប្រជាធិបតេយ្យ ប្រជាមានិតឡាវ។ ហើយកិច្ច ការងារទាំងនេះ ក៏អាស្រ័យដោយក្រុមប្រឹក្សាខេត្ត គណៈអភិបាលខេត្តមន្ត្រីរាជការ និងប្រជាពលរដ្ឋ បានខិតខំប្រឹងប្រែងលើការងារ នេះ តាំងពីអាណត្តិមុន រហូតមកដល់អាណត្តិទី២ នាពេលនេះ។ ហើយនៅចុងឆ្នាំ ២០១៤ នេះ ទើគណៈកម្មការ បានវាយតម្លៃឱ្យ ទីក្រុងបាត់ដំបងយើង ជាប់ចំណាត់ថ្នាក់ ហើយបានទទួលពានរង្វាន់ និរន្តរភាពបរិស្ថាននៃទីក្រុងអាស៊ាន។
ក្រោមការដឹកនាំរបស់ រាជរដ្ឋាភិបាល បានផ្តោតការយកចិត្តទុកដាក់ខ្ពស់ជាមួយក្រសួងទេសចរណ៍ ក្រសួងបរិស្ថាន ដែលកន្លងមកខេត្តបាត់ដំបង បានទទួល នូវជ័យលាភី ផ្ការំដួល ៣ទង ជាទីក្រុងស្អាក្នុងចលនាប្រឡងប្រណាំងទីក្រុងស្អាត នៅទូទាំងប្រទេស។ មូលដ្ឋាននេះហើយបានធ្វើឱ្យ ខេត្តបាត់ដំបង បានបំពេញនូវភារៈកិច្ចមួយចំនួនថែមទៀត ពីលើចលនា ទីក្រុងស្អាត គឺខេត្តបាត់ដំបងយើង គ្មានដីហុយដោយយើង អភិវឌ្ឍន៍ផ្លូវកៅស៊ូច្រើន យើងមានទឹកស្អាត យើងមានខ្យល់បរិសុទ្ធ បានន័យថា គ្មានការបំពុល ទីក្រុងរបស់យើងជាទីក្រុងមានខ្យល់ ធាតុអាកាសបរិសុទ្ធ និងជាទីក្រុងស្រស់បំព្រង អាស្រ័យរុក្ខជាតិជាច្រើន ដែលយើងបានដាំកន្លងមក។ ដូចនេះក្រសួងទេសចរណ៍ និង ក្រសួងបរិស្ថានបានយកចិត្តទុកដាក់ ពីចលនាប្រឡងប្រណាំងទីក្រុងស្អាតរបស់យើង ហើយក្នុងនាមថ្នាក់ដឹកនាំខេត្ត និងមន្ត្រីរាជការ ពាក់ព័ន្ធទាំងអស់ សូមប្តេជ្ងាចិត្តយ៉ាងឧឡារិកថា និងខិតខំប្រឹងប្រែងបន្តទៀត ធ្វើយ៉ាងណាឱ្យទីក្រុង និងខេត្តបាត់ដំបងយើង ពោរ ពេញទៅដោយសោភ័ណភាព ស្រស់បំព្រងអមទៅដោយរុក្ខជាតិ តូច ធំ ប្រកបដោយបរិស្ថានអនាម័យល្អមិនត្រឹមតែធ្វើឱ្យសុខភាព ប្រជាពលរដ្ឋល្អប៉ុណ្ណោះទេ ថែមទាំងទាក់ទាញភ្ងៀវទេសចរណ៍ជាតិ អន្តរជាតិចូលមកទស្សនា សម្រាកកំសាន្ត ឱ្យបានកាន់តែច្រើន ជាផ្នែកមួយ ក្នុងការចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្រ លើកកំពស់ជីវភាពរបស់ប្រជាពលរដ្ឋឱ្យកាន់តែមាន ភាពល្អប្រសើរ ៕
