ស្រុកស្នួល គឺជាស្រុកមួយក្នុងចំណោមស្រុក/ក្រុងទាំង៦ ក្នុងខេត្តក្រចេះ ដែលឋិតនៅភាគឦសាន្តនៃប្រទេសកម្ពុជា នឹងមានព្រំប្រទល់ជាប់ស្រុក៥ មាន ស្រុកមេមត់ ឆ្លូង ចិត្របុរី ស្រុកកែវសីម៉ា និងជាប់ព្រំប្រទល់ប្រទេសវៀតណាម និងមានផ្ទៃដីសរុបចំនួន ២៦០,១៩៤ហិកតា ។
លោក គង់ គឹមនី អភិបាលស្រុកស្នួល បានឲ្យដឹងថា ស្រុកស្នួល ជាស្រុកដែលមានសក្ដានុពលសេដ្ឋកិច្ចផ្នែកវិស័យកសិកម្ម មានកៅស៊ូ ស្វាយចន្ទី ម្រេច ដំឡូងមី និងដំណាំរួមផ្សំផ្សេងៗជាច្រើនមុខទៀត និងសក្ដានុពលធនធានក្រោមដី មានដូចជា រ៉ែមាស ធ្យុងថ្ម ថ្មម៉ាបជាដើម ។
លោកអភិបាលស្រុកស្នួល បានបញ្ជាក់ថា ក្រោយបទបញ្ជាលេខ០០១បប របស់រាជរដ្ឋាភិបាលកម្ពុជា បានធ្វើការបែងចែកដីធ្លីជូនប្រជាពលរដ្ឋ បានចំនួន ១២,០៧២គ្រួសារស្មើនឹង ១៩,៧៣៦ប័ណ្ណ ដែលមានទំហំផ្ទៃដីសរុប ៤៧,៥០៩.៥៨ ហិកតា ដោយកាត់ចេញពីដីក្រុមហ៊ុនចំនួន ៩ក្រុមហ៊ុន ។
បច្ចុប្បន្ន មានក្រុមហ៊ុនចំនួន ២០ក្រុមហ៊ុន កំពុងវិនិយោគដាំកៅស៊ូ លើផ្ទៃដីសរុបជាង ៥ម៉ឺនហិកតា ក្រុមហ៊ុនរ៉ែថ្មម៉ាបចំនួន ៩ និងមានដំណាំជាលក្ខណៈគ្រួសារ មានដំណាំស្វាយចន្ទី ជាង ៤ពាន់ហិកតា ដំណាំម្រេច ១ពាន់ហិកតា ដំណាំកៅស៊ូ ជាង ៩ពាន់ហិកតា និងដំណាំដំឡូងមី ជាង ៣ម៉ឺនហិកតា ដំណាំស្រូវ ៧ពាន់ហិកតា និងដំណាំរួមផ្សំផ្សេង ជាង៩ពាន់ហិកតា ។
ក្រៅពីសក្ដានុពលផ្នែកកសិកម្ម លោក គង់ គឹមនី អភិបាលស្រុកស្នួល ក៏បានបញ្ជាក់ថា ក៏នៅមានសក្ដានុពលធនធានធម្មជាតិក្រោមដី មានដូចជា រ៉ែមាស ធ្យុងថ្ម ថ្មម៉ាប និងដីក្រហមដែលមាននៅឃុំស្នួល ឃុំស្រែចារ ឃុំ២ធ្នូ ជាប្រភេទដីដាំដំណាំ កសិ-ឧស្សាហកម្មផងដែរ ៕
