មណ្ឌលគិរី ៖ មន្ត្រីសមត្ថកិច្ចប្រដាប់អាវុធជាង ១០ នាក់ត្រូវបានរកឃើញថាជាប់ពាកពន្ធ័ក្នុងការឃុបឃឺត បើកដៃឲ្យឈ្មួញយួនចូលមកកាប់ឈើខុសច្បាប់នៅក្នុងខេត្តំណ្ឌលគីរីជាថ្នូរនឹងទឹកប្រាក់ចំនួន ១៧ ម៉ឺនដុល្លារ ។សូមបញ្ជាក់ថាកាលពីខែកុម្ភៈកម្លាំងចម្រុះចាប់បានយួនចំនួន ៧ នាក់ដែលថ្លើមធំហ៊ានបើកឡានបង្កង់ឆ្លងដែនខុសច្បាប់ចូលមកកាប់ដឹកឈើ ១៤៥ កំណាត់ក្នុងស្រុកអូររាំង។ក្រោយពីចាប់បាន មន្ត្រីនគរបាល និងយោធាព្រំដែនលេខ ១០៣ ជាង ១០ នាក់ដែលមានខ្លួនបានបិតសាប៊ូរត់ចោលអង្គភាព ។
អគ្គស្នងការនគរបាលជាតិបានបើកការស្រាវជ្រាវបន្ទាន់មួយហើយបានធ្វើការសាកសួរមន្ត្រីដែលរត់គេចខ្លួនទាំងនោះចំនួន ១១ នាក់ជាបន្តបន្ទាប់អស់រយៈពេល ៥ ថ្ងៃ។
លទ្ធផលស្រាវជ្រាវដែលចុះហត្ថលេខដោយនាយឧត្តមសេនីយ៍នេតសាវឿនអគ្គស្នងការនគរបាលជាតិផ្ញើជូនសម្តេចក្រឡាហោមសខេងរដ្ឋមន្ត្រីក្រសួងមហាផ្ទៃកាលពីថ្ងៃទី ៩ ខែមីនា បានឲ្យដឹងថាមានថមន្ត្រីចំនួន ៣ នាក់បានឃុបឃិត និងទទួលប្រាក់ពីឈ្មួញឈើជនជាតិវៀតណាមឈ្មោះ អ៊ុក ញ៉ ចំនួន ១៧ ម៉ឺនដុល្លារព្រឹត្តបទល្មើស។
មន្ត្រីទាំង ៣ នាក់រួមមានឈ្មោះ ទា ខៃម៉េង ប្រធាន គ ៣ នៃយោធាក្នុងស្រុកកែវសីមា, ឯម សុងហ៊ួ ជាមន្ត្រីយោធាការពារព្រំដែនប្រចាំប៉ុស្តិ៍ អូរហ៊ុច និង ជុំ រតនា ជានាយប៉ុស្តិ៍នគរបាលការពារព្រំដែនអូរជុំ។ ទឹកប្រាក់ពុករលួយនេះត្រូវបានបែងចែកជា ២ ផ្នែកដែលក្នុងនោះចំនួន ៨៥ ០០០ ដុល្លារឲ្យមន្ត្រីយោធាគឺលោក ឯម សុងហ៊ួ និង ទា ខៃម៉េង។
រីឯទឹកប្រាក់ ៨៥ ០០០ ដុល្លារផ្សេងទៀតត្រូវលោក ជុំ រតនា ចែកទៅឲ្យលោក សាក់ សារុន មេបញ្ជាការអាវុធហត្ថស្រុកកែវសីមា ៥ ពាន់ដុល្លារលោក សាក់ សារ៉ាង មេបញ្ជាការអាវុធហត្ថខេត្ត ១ ម៉ឺនដុល្លារលោក ឌុល មន្ត្រីអាវុធហត្ថចល័តលើផ្ទៃប្រទេស ៧ ពាន់ដុល្លារលោក ណាក់ មន្ត្រីព្រៃឈើ ៦ ពាន់ដុល្លារ និងលោក លាង ភារ័ត្ន នាយប៉ុស្តិ៍នគរបាលការពារព្រំដែនអូរហុច ២២៥០០ ដុល្លារ។ នៅពេលដែលដឹកឈើចេញមេឈ្មួញរូបនោះក៏បង់លុយឲ្យមន្ត្រីទាំង ៣ នាក់នោះទៀតដែរ ។
នាយឧត្តមសេនីយ៍ នេត សាវឿន សន្និដ្ឋានថា៖ «ឈ្មោះ ជុំ រតនា, លាង ភារ័ត្ន, ទា ខៃម៉េង, ឯម សុងហ៊ួ និងមេឈ្មួញវៀតណាម អ៊ុក ញ៉ ជាមេខ្លោងបានប្រព្រឹត្តអំពើឃុបឃិតគ្នាកាប់បំផ្លាញ ប្រមូល និងដឹកជញ្ជូនផលអនុផលព្រៃឈើ ឆ្លងដែនខុសច្បាប់ ទៅប្រទេសវៀតណាមពិតប្រាកដមែន»។
អគ្គស្នងការនគរបាលជាតិបានសំណូមពរ និងស្នើសុំគោលការណ៍ពីលោក ស ខេង រដ្ឋមន្ត្រីក្រសួងមហាផ្ទៃក្នុងការកសាងសំណុំរឿងរបស់លោក ជុំ រតនា និង លាង ភារ័ត្ន ទៅតុលាការដើម្បីចាត់ការតាមផ្លូវច្បាប់។ រីឯមន្ត្រីនគរបាល ៩ នាក់ត្រូវស្នើដាក់វិន័យដូចជាអប់រំ ព្រមាន និងផ្ទេរភារកិច្ចទៅកាន់កន្លែងផ្សេងក្នុងនោះមានឈ្មោះ ព្រំ វណ្ណៈ, យ៉ា សុផា, សា ផល្លា, ស្រេវ ម្នើប (នាយរងប៉ុស្តិ៍អូរជុំ), អន សំអាត, ប៊ុន ភារម្យ, សូត្រ ពន្លៃ, ពិត ជឿន, និង ពៅ ឆឡៃហៀង។
ចំពោះមន្ត្រីយោធា និងអាវុធហត្ថដែលពាក់ព័ន្ធគឺស្ថិតក្រោមចំណាត់ការរបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសថ្លែងថាគណៈកម្មការជាតិនេះកំពុងស្រាវពីករណីនេះហើយនឹងចាត់ការតាមនីតិវិធីច្បាប់។
ឯលោកលោក សាក់ សារ៉ាង មេញ្ជាការកងរាជអាវុធហត្ថខេត្តមណ្ឌលគិរីដែលធ្លាប់ល្បីឈ្មោះខាងជួញឈើនាពេលកន្លងមកបានបដិសេធការចោទប្រកាន់រឿងទទួលប្រាក់ ១ ម៉ឺនដុល្លានោះ។ លោកបានថ្លែងយ៉ាងខ្លីមុនពេលផ្តាច់ខ្សែទូរស័ព្ទថា៖ «ខ្ញុំអត់ដែលឃើញជួបមុខពួកអស់ហ្នឹងទេ។ និយាយឲ្យខ្លីមិនដែលស្គាល់តែម្តង។ អាមុខក៏មិនដែលឃើញ អាស្គាល់ក៏មិនស្គាល់»។
លោក យិន ចន្ធី មេបញ្ជាការវរការពារព្រំដែនលេខ ១០៣ដែលជាកូនចៅលោក ឃិន ម៉េងស្រេង មេយោធាខេត្ត ហើយមិនជាប់ឈ្មោះពាក់ព័ន្ធ ថ្លែងថា លោកកំពុងតែចូលរួមនឹងកម្លាំងចម្រុះ ដើម្បីធ្វើការស្រាវជ្រាវលើបញ្ហានេះ ក្នុងនោះរួមមានការសួរនាំមន្ត្រីដែលពាក់ព័ន្ធផងដែរ ប៉ុន្តែមិនទាន់ដឹងពីលទ្ធផលនៅឡើយនោះទេ ។
លោក មាស ប្រុស អ្នកនាំពាក្យតុលាការខេត្តមណ្ឌលគិរីបានឲ្យដឹងថាជនជាតិវៀតណាមទាំង ៧ នាក់ និងខ្មែរម្នាក់ត្រូវបានឃុំខ្លួនបណ្តោះអាសន្ននៅពន្ធនាគារខេត្តហើយមន្ត្រីតុលាការ ២ រូប និងគណៈកម្មការបាននិងកំពុងតែចុះពិនិត្យកន្លែងកាប់ឈើក្នុងដែនជម្រក។ «តាមគេនិយាយមានពាក់ព័ន្ធច្រើននាក់អ៊ីចឹងមែន។ តែការស៊ើបអង្កេតកំពុងតែបន្ត។ បើកាលណានិយាយវាបែកអស់ហើយ»។
អ្នកស្រុកមណ្ឌលគិរីបាននិយាយថា ភស្តុតាងប៉ុណ្ណឺងហើយបើគ្មានអ្នកទួឡខុសត្រូវជាប់គុកទេស្រុកខ្មែរចប់ហើយ! ៕