កំពង់ឆ្នាំង: ៖ មនុស្សចំនួន០៥នាក់ ដែលសមត្ថកិច្ច ក្រុងកំពង់ឆ្នាំង សហការជាមួយ នគរបាលខេត្តចាប់ឃាត់ខ្លួនកាលពីថ្ងៃទី១១ ខែ៣ ឆ្នាំ២០១៧ នោះត្រូវបានដោះលែងវិញហើយក្រោយមួយថ្ងៃនៃការឃាត់ខ្លួន។ដោយប្រភពបង្ហើបប្រាប់ថា ករណីដោះលែងនេះជាថ្នូរទឹកប្រាក់ ១០០០ដុល្លារក្នុងម្នាក់ ជ្រកក្រោមលេស អាណាព្យាបាលយកទៅអប់រំ ព្យាបាល និង មានម្នាក់ ក្រោមលេសជាផ្ទៃក្នុងរបស់សមត្ថកិច្ច(ស៊ិក)។
សូមរំលឹកថា កាលពីថ្ងៃទី១១ ខែ៣ ឆ្នាំ២០១៧ សមត្ថកិច្ច នគរបាល ក្រុងកំពង់ឆ្នាំងដឹកនាំដោយលោក ម៉ា យុន ជាអធិការរងក្រុងទទួលផ្នែកព្រហ្មទណ្ឌ សហការជាមួយ នគរបាលខេត្តលោក ពៅ ស៊ីផាន់ប្រធានការិយាល័យប្រឆាំងបទល្មើសគ្រឿងញៀន បានដឹកនាំកម្លាំងចុះត្រួតពិនិត្យរដ្ឋបាលតាម ផ្ទះសំណាក់និង ផ្ទះជួល នៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។ ជាលទ្ធផលនៅថ្ងៃនោះបាន ធ្វើតេស្តទឹកនោម រកឃើញអ្នកមានផ្ទុកសារធាតុញៀនចំនួន ០៥នាក់ ដកហូតម៉ូតូ ០៤គ្រឿង កសាងសណុំរឿងតាម និតិវិធី។
ករណីដោះលែងមនុស្សទាំង៥នាក់ខាងលើនេះ លោក ឆាយ ខែមរ័ត្ន អធិការក្រុងបានបញ្ជាក់ថា កម្លាំងរបស់លោកបានប្រគល់មនុស្ស និងកំណត់ហេតុជូនទៅខាងជំនាញនៃស្នងការនគរបាលខេត្តតាំងពីថ្ងៃចាប់ខ្លួន ចំណែកពាក់ព័ន្ធនិងដោះលែងជាថ្នូរទឹកប្រាក់លោក មិនបានដឹងឡើយ។លោក ពៅ ស៊ីផាន់ ប្រធានការិយាល័យប្រឆាំងបទល្មើសព្រហ្មទណ្ឌ ដែលដឹកនាំកម្លាំងបានបញ្ជាក់ថា ពិតជាមានករណីដោះលែងមនុស្សទាំង៥នាក់មែន និងមិនមានថ្នូរទឹកប្រាក់ទេ ដោយបានឆ្លងយោបល់ព្រះរាជអាជ្ញាខេត្ត តាមការស្នើរសុំរបស់អាណព្យាបាល ចំនួន៤នាក់យកកូនរបស់គាត់ទៅព្យាបាល និងអប់រំ ក្នុងនោះមានម្នាក់ ជាផ្ទៃក្នុងរបស់សមត្ថកិច្ច ដោយមិនមានសារធាតុគ្រឿងញៀនឡើយ ។ប៉ុន្តែផ្ទុយគ្នានិង អ្វីដែលអធិការក្រុងបានបញ្ជាក់ថាទាំង៥នាក់ បានធ្វើតេស្តិ ទឹកនោម គឺមានសារធាតុគ្រឿងញៀនទាងអស់គ្នា។
ករណីនេះ ត្រូវបានប្រជាពលរដ្ឋមើលឃើញនិងដាក់ការសង្ស័យព្រមទាំងរិះគន់ថាទង្វើបែបនេះគឺខាងនគរបាលខេត្តកំពង់ឆ្នាំង បានធ្វើជាយូមកហើយ ដោយប្រើលេស ជ្រកក្រោមអាណព្យាបាលយកទៅអប់រំ ព្យាបាល ទៅមណ្ឌលកែប្រែ និងជាផ្ទៃក្នុងរបស់សមត្ថកិច្ច។ ពលរដ្ឋសូមសំណូមពរដល់ដល់ឯកឧត្តមឧត្តមសេនីនេត សាវឿនអគ្គស្នងការនគរបាលជាតិ គួរតែចុះធ្វើអធិការកិច្ចឡើងវិញ តើការដោះលែង មនុស្សមួយចំនួនពាក់ព័ន្ធគ្រឿងញៀន នាពេលកន្លងមក និងបច្ចុប្បន្ន មានភាពប្រក្រតីដែរឬយ៉ាងណា?៕
