ខេត្តរតនគិរី ៖ របាយការណ៍បឋមរបស់នគរបាលខេត្តរតនគិរីអោយដឹងថាៈ លំនៅដ្ឋានប្រជាពលរដ្ឋ សាលារៀន និងផ្លាកគណបក្សនយោបាយ បានរងការខូចខាតយ៉ាងដំណំ ក្រោយពីកើតមានខ្យល់កន្ត្រាក់ កាលពីព្រលប់ថ្ងៃទី១៤ ខែមិនាម្សិលមិញនេះ ក្នុងនោះស្ត្រីម្នាក់ក៏រងនូវការចឹកពីសត្វពស់មានពិសផងទៀត។
របាយការណ៍អោយដឹងថាៈ ឃុំចំនួន៣ នៅក្នុងស្រុកវ៉ើនសៃ ត្រូវខ្យល់គួចដំបូលផ្ទះប្រជាពលរដ្ឋចំនួន០៦ខ្នង ក្នុងនោះឃុំប៉ាកាឡាន់ចំនួន០៤ខ្នង ឃុំភ្នំកុកចំនួន១ខ្នង និងឃុំកាចូនចំនួន១ខ្នង ក្រៅពីនោះផ្លាកសាលារៀន១បានធ្លាក់ចុះដី ជាមួយគ្នានោះក៏មានស្ត្រីម្នាក់រងគ្រោះដោយសារសត្វពស់មានពិសចឹកផងដែរ តែមិនបាត់បង់ជីវិតទេ ។ គាត់ត្រូវគេបញ្ជូនទៅព្យាបាលនៅផ្ទះគ្រូពេទ្យបុរាណ។ ដោយឡែកនៅឃុំវ៉ើនសៃ ផ្លាកគណបក្សនយោបាយចំនួន២ ក៏ត្រូវខ្យល់គួចធ្លាក់ដល់ដីផងដែរ។
សូមរំលឹកថា ខ្យល់កន្ត្រាក់បានកើតមានក្នុងស្រុកវ៉ើនសៃ ខេត្តរតនគិរីនេះ គឺបន្ទាប់ពីក្រសួងធនធានទឹកនិងឧតុនិយម បានចេញផ្សាយព័ត៌មានតាមទំព័រហ្វេសប៊ុក កាលពីថ្ងៃទី០៦ ខែមិនាកន្លងទៅ ដោយសូមអោយមានការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ ដែលអាចនឹងកើតមានឡើងនៅពេលមេឃរកកលភ្លៀង ពិសេសនៅតាមតំបន់វាលទំនាប។
សេចក្តីប្រកាសនោះបញ្ជាក់ថាៈ ចាប់ពីថ្ងៃទី១២ឬថ្ងៃទី១៣ ខែមិនា អាចនឹងមានភ្លៀងកក់ខែស្ទើរទូទាំងប្រទេស ហើយភ្លៀងកក់ខែអាចនឹងអូសបន្លាយច្រើនថ្ងៃទៀត។
ដូច្នេះយោងតាមការផ្សាយរបស់ក្រសួងធនធានទឹកនិងឧតុនិយម សូមប្រជាពលរដ្ឋមេត្តាជ្រាបជាព័ត៌មាន និងសូមប្រុងប្រយ័ត្នចំពោះការកើតមានគ្រោះថ្នាក់ជាយថាហេតុ៕
ដោយ ៖ យឹម សារិទ្ធិ
