ខេត្តរតនគិរី ៖ ឈើប្រណីតប្រភេទធ្នង់សុទ្ធជាង១០០កំណាត់ និងរថយន្តស៊េរីទំនើបមួយគ្រឿង ត្រូវអាវុធហត្ថខេត្តសហការជាមួយអាវុធហត្ថស្រុក ឃាត់ចាប់បញ្ជូនមកបញ្ជាការដ្ឋាន ខណៈរថយន្តនោះដឹកបទល្មើសតាមបណ្តោយផ្លូវពីខេត្តស្ទឹងត្រែងមកខេត្តរតនគិរី។
រថយន្តនិងបទល្មើសឈើប្រណីតនេះ ត្រូវអាវុធហត្ថចាប់កាលពីវេលាម៉ោង៣និង១៥នាទីរសៀលថ្ងៃទី១៣ ខែមិនា ម្សិលមិញ តាមបណ្តោយផ្លូវជាតិលេខ៧៨អា ត្រង់ចំណុចភូមិពីរ ឃុំស្រែអង្គ្រង ស្រុកកូនមុំ ខេត្តរតនគិរី ។
កិច្ចប្រតិបត្តិការនេះដឹកនាំដោយលោកវរៈសេនីយត្រី ឃី សុខា ប្រធានមន្ទីរបច្ចេកទេសនិងសន្តិសុខអាវុធហត្ថខេត្តរតនគិរី សហការជាមួយអាវុធហត្ថស្រុកកូនមុំ។
លោក ឃី សុខា អោយដឹងថា នៅក្រោយពេលទទួលព័ត៌មានតាមទូរស័ព្ទ លោកបាននាំកំលាំងចុះទៅកាន់តំបន់នោះ ទើបប្រទះឃើញរថយន្តម៉ាក រខ ៣០០ពណ៌ស្ក គ្មានផ្លាកលេខ ដឹកឈើប្រណីតប្រភេទធ្នង់ពេញតែម្តង ខណៈនោះកំលាំងបានឃាត់និងរឹបអូសរថយន្តនាំមកកាន់បញ្ជាការដ្ឋានអាវុធហត្ថខេត្ត ដើម្បីវាស់វែងនិងបញ្ជូនទៅស្ថាប័នជំនាញ។
របាយការណ៍របស់វរៈសេនីយត្រី ឃី សុខា ឈើប្រណីតនៅក្នុងរថយន្តនោះ មានចំនួនសរុប១០៩កំណាត់ ជាប្រភេទឈើធ្នង់សុទ្ធ តែមិនទាន់ដឹងបរិមាណម៉ែត្រត្រីគុណនៅឡើយទេ។
នៅព្រឹកថ្ងៃទី១៤ ខែមិនានេះ វត្ថុតាងទាំងឈើនិងរថយន្ត ត្រូវអាវុធហត្ថខេត្ត ធ្វើពិធីប្រគល់ទៅជំនាញរដ្ឋបាលព្រៃឈើ ដើម្បីចាត់ការតាមនីតិវិធីបន្តទៀតហើយ ចំណែកម្ចាស់រថយន្តបានគេចខ្លួនក្នុងពេលដែលចុះបង្ក្រាបនោះ។
សូមជម្រាបថាៈ ការបង្ក្រាបបទល្មើសព្រៃឈើបន្តបន្ទាប់នេះ គឺបន្ទាប់ពីដាក់អោយមានការអនុវត្តនូវផែនការរបស់នាយឧត្តមសេនីយ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ដែលជាប្រធានអាជ្ញាធរជាតិបង្ក្រាបធនធានធម្មជាតិនិងអនុវត្តតាមបទបញ្ជារបស់ឧត្តមសេនីយត្រី គឹម រស្មី មេបញ្ជាការដ្ឋានអាវុធហត្ថខេត្តរតនគិរី ទើបសកម្មភាពបង្ក្រាបបទល្មើសព្រៃឈើ ត្រូវគេឃើញថា បានបង្ក្រាបជាហូរហែរ ប៉ុន្តែទោះបីមានការទប់ស្កាត់បង្ក្រាបក៏ដោយ ក៏អ្នកជំនួញបទល្មើសព្រៃឈើ នៅតែមិនញញើតសមត្ថកិច្ចនោះឡើយ ជាក់ស្តែងដូចជាករណីបង្ក្រាបនេះ ម្ចាស់បទល្មើសសុខចិត្តលះបង់រថយន្តស៊េរិទំនើបនិងបទល្មើសមានតម្លៃ ហើយសុខចិត្តគេចខ្លួនក្នុងបំណងដែលគេសន្និដ្ឋានថា អាចនឹងទៅសំងំដើម្បីបង្កបង្កើតនូវបទល្មើសនេះដដែល៕
ដោយៈ យឹម សារិទ្ធិ
