កំពង់ស្ពឺ ៖ នាយឧត្តមសេនីយ៍ សៅ សុខា មេបញ្ជាការអាវុធហត្ថលើផ្ទៃប្រទេស និងប្រធានគណៈកម្មការជាតិ ទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជាឲ្យតាមចាប់ខ្លួនលោក ស៊ី ស ត្រូវជាកូនប្រសារបស់លោក ឆេង ឡុង នាយរងសេនាធិការអាវុធហត្ថ ខេត្តកំពង់ស្ពឺ ក្រោយរកឃើញថា មានការពាក់ព័ន្ធបទល្មើសព្រៃឈើ ។ប្រការនេះបានធ្វើឲ្យប្រជាពលរដ្ឋនិងមសមត្តកិច្ចមូលដ្ឋានសង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ហួសចិត្តនិងសង្ស័យថាសមត្តកិច្ចអាវុធហត្ថចង់លាងមុខមាត់ឲ្យលោក ឆេង ឡុង ដែលចង់ឬមិនចង់ក្នុងនាមជានគរបាលយុត្តិធមិត្រូវជាប់ពាក់ពន្ធ័ឃុបឃឹតជាមួយបទល្មើសដែលរកឃើញជាក់ស្តែងក្នុងវិឡារបស់ខ្លួន ។ ផ្ទុយទៅវិញលោក ឆេង ឡុង បានត្រឹមតែមន្ត្រីជំនាញហៅមកសួរនាំតែប៉ុណ្ណោះ ។ នេះបើតាមលោកឧត្តមសេនីយ៍ត្រី អេង ហ៊ី អ្នកនាំពាក្យអាវុធហត្ថលើផ្ទៃប្រទេស បានប្រាប់ សារពតិមាន។
សូមបញ្ជាក់ថាកាលពីរសៀលថ្ងៃទី១១ ខែមីនា ឆ្នាំ២០១៧ លោកឧត្តមសេនីយ៍ត្រី ជូ សារុន មេបញ្ជាការអាវុធហត្ថខេត្តកំពង់ស្ពឺ សហការជាមួយកម្លាំងអាវុធហត្ថលើផ្ទៃប្រទេស ក្រោមការសម្របសម្រួលពីលោក កែវ សុធា ព្រះរាជអាជ្ញាអមសាលាដំបូង ខេត្ត បានឃាត់រថយន្ត១គ្រឿងម៉ាក HYUNDRI ពណ៌ស ទម្ងន់៥តោន ពាក់ស្លាកលេខភ្នំពេញ 3C-9511 នៅចំណុចភូមិស្គុះ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ដោយចាប់ខ្លួនអ្នកបើកបរម្នាក់ឈ្មោះ យឹម សុខភារម្យ អាយុ៣២ឆ្នាំ មុខរបរបើកបរមានទីលំនៅភូមិស្វាយរមៀត ឃុំស្វាយរមៀត ស្រុកខ្សាច់កណ្តាល ខេត្តកណ្តាល ។
មន្ត្រីអាវុធហត្ថខេត្តកំពង់ស្ពឺ បានឲ្យដឹងថា រថយន្តមួយគ្រឿងនេះ បានដឹកជញ្ជូនឈើធ្នង់ ម្រេញ ចេញពីផ្ទះលោក ស៊ី ស អាយុ៣០ឆ្នាំ មានទីលំនៅភូមិផ្សារសាមគ្គី សង្កាត់កណ្តោលដុំ ក្រុងច្បារមន ខេត្តកំពង់ស្ពឺ ដែលជាកូនប្រសារបស់លោក ឆេង ឡុង នាយរងសេនាធិការអាវុធហត្ថខេត្ត ។ ក្រោយពីកម្លាំងបានឃាត់រថយន្តខាងលើនោះរួចមក ក៏បន្តឃាត់រថយន្ត១គ្រឿងទៀតម៉ាក HYUNDRI ពណ៌ស ពាក់ស្លាកលេខ ភ្នំពេញ 3A-9126 បានដឹកឈើ ធ្នង់ ម្រេញ១រថយន្តនៅខាងមុខផ្ទះឈ្មោះ ស៊ី ស តែអ្នកបើកបរបានរត់គេចខ្លួនបាត់ ។
បន្ទាប់ពីឃាត់រថយន្តទាំង២គ្រឿង និងមានការសួរនាំរួចមក កម្លាំងអាវុធហត្ថ បានបន្តចុះទៅឆែកឆេរនៅក្នុងឃ្លាំងស្តុកឈើរបស់ឈ្មោះ ស៊ី ស នៅជាប់ផ្ទះវីឡារបស់លោក ឆេង ឡុង តែម្តង ដោយរកឃើញឈើមានកំណាត់ធំៗ យ៉ាងច្រើនដុំ ដែលរហូតមកដល់ថ្ងៃទី១៣ ខែមីនា ឆ្នាំ២០១៧នេះ កម្លាំងអាវុធហត្ថស្ទូចយកចេញមិនទាន់រួចនៅឡើយទេ។
សួរថាហេតុអីបទល្មើសព្រៃឈើកើតមាននៅក្បែរផ្ទះហើយអ្នកប្រព្រឹត្តជាកូនប្រសារខ្លួនទៅទៀតតែលោក ឆេង ឡុងដែលមានតួនាទីជា នាយរងសេនាធិការអាវុធហត្ថ ខេត្តកំពង់ស្ពឺជាអ្នកអ្នកនុវត្តច្បាប់និងបទបញ្ជារនាយករដ្ឋមន្ត្រីមិនដឹង?។បើតាមមន្ត្រីមូលដ្ឋាននិយាយថាជំនួញឈើប្រណិតល្មើសច្បាប់នេះអ្នកណាក៏គេដឹងថាលោកឆេងឡុងនៅពីក្រោយដែរ ៕
