ប្រទេសថៃ ៖ គ្រាប់បែកដៃយ៉ាងតិចចំនួន៣០០គ្រាប់ ត្រូវបានទាហ៊ានថៃបានរកឃើញនៅក្បែរបង្គោលសីមាលេខ៤៣ប្រឈមនិងទឹកដីកម្ពុជាស្រុកអូរជ្រៅខេត្តបន្ទាយមានជ័យនិងខេត្តស្រះកែវរបស់ប្រទេសថៃ ។ គ្រាប់បែកដៃទាំងនោះ ជាប្រភេទគ្រាប់បែកផលិតនៅប្រទេស អាមេរិក (ផ្លែទឹកដោះ )។ភាគីថៃបានអះអាងទៀតថាគ្រាប់បែកខាងលើគឺបានមកពីការប្រមូលនៅតាមខ្សែបន្ទាត់ ព្រំដែនកម្ពុជា ថៃ ក្នុងទឹកដីខេត្តស្រះកែវ ។
យោងតាមការចេញផ្សាយ របស់ស្ថានីយ៍ទូរទស្សន៍ ប៉ុស្តិ៍លេខ៣ថៃបានបញ្ជាក់ ថា កាលពីល្ងាចថ្ងៃទី០៩ ខែមីនា ឆ្នាំ២០១៧ម្សិលមិញនេះ នៅក្នុងទឹកដីខេត្តស្រះកែវ ប្រទេសថៃ មានការរៀបចំពិធីមួយដើម្បី កម្ទេចចោលនូវប្រភេទគ្រាប់បែកដៃM27 ចំនួន ៣០០គ្រាប់ដែលកងទាហានរបស់ខ្លួនបានប្រមូលបានតាមព្រំដែនកម្ពុជាថៃ ។
លោក ស៊ុតហម សារ៉ាវ៉ាត់ បញ្ជាការតម្រួតការពារព្រំដែនលេខ១២ បានបញ្ជាក់ថារយៈពេល ប៉ុន្មានថ្ងៃនេះ បើគិតមកទល់នឹងថ្ងៃទី ៩ ខែមីនា ឆ្នាំ២០១៧ គឺលោកបានដាក់កម្លាំង ជំនាញចុះល្បាតនិងបានប្រមូលយុទ្ធភ័ណ្ឌ មិនទាន់ផ្ទុះដែលនៅសល់តាម ខ្សែបន្ទាត់ព្រំដែនថៃ កម្ពុជា ត្រង់ចំណុចបង្គោលសីមាលេខ៤៣តែម្តង។លោកបញ្ជាក់ទៀតថា បង្គោលសីម៉ានោះនៅជាប់ ក្នុងខេត្តបន្ទាយមានជ័យ និងជាព្រំប្រទល់របស់ខេត្តស្រះកែវថៃ។
មេតម្រួតថៃរូបនេះនិយាយថា គ្រាប់យុទ្ធភណ្ឌ័ខាងលើទាំងនោះ អាចជាយោធាកម្ពុជា ដាក់ពង្រាយការពារខ្សែបន្ទាត់ព្រំដែនកាលពីសម័យសង្គ្រាមកន្លងទៅ ដើម្បីក្តីសុខជូនប្រជាពលរដ្ឋដែលរស់នៅតាមបណ្តោយព្រំដែនកម្ពុជាថៃ លោកសម្រេចកំទេចចោលតែម្តង ។ ជាការពិតណាស់កន្លងមក នៅតាមខ្សែបន្ទាត់ព្រំដែន ធ្លាប់មានគ្រោះថ្នាក់ដោយសារយុទ្ធភ័ណ្ឌមិនទាន់ផ្ទុះទាំងនេះដែរ រហូតធ្វើឲ្យ មានប្រជាពលរដ្ឋទាំងសងខាងរងរបួសនិងគ្រោះថ្នាក់ដល់អាយុជីវិតក៏មាន គឺ ដោយសារតែការលបឆ្លងដែនខុសច្បាប់ដើម្បីចេញចូលទៅរកនុផលព្រៃឈើ ។
ជុំវិញការផ្សាយព័ត៌មានដ៏រសើបខាងលើរបស់ស្ថានីយ៏ទូរទស្សន៏ថៃ អង្គភាពសារព័ត៌មានយើង ទាក់ទង លោកឧត្តមសេនីយ៏ត្រី ឃួន ជឿន មេបញ្ជាការវរថ្មើជើងលេខ៥០៣ ចំណុះឲ្យកងពលតូចថ្មើជើងលេខ៥១ ដែលប្រចាំការនៅចំណុចបង្គោលសីម៉ា លេខ៤៣នោះតែទូរសព្ទ័របស់លោកចំនួន២ខ្សែមិនអាចខលចូលទេ ដោយលោកវរសេនីយ៏ឯក សូ ចាន់ណារី មេបញ្ជាការនគរបាលការពារព្រំដែនគោក វរសេនាតូចលេខ៩១១ ក៏មិនអាចសុំឲ្យលោកប្រតិកម្មជុំវិញភាគីថៃចោទថា ជាគ្រាប់បែកកម្ពុជាបានដាក់បានយ៉ាងណានោះទេ ព្រោះលោកកំពុងជាប់រវល់ ។
ដោយឡែកលោក ពុំ ចាន់ ស្នងការរងទទួលផែនការងារព្រំដែនបានមានប្រសាសន៍កាលពីព្រឹកថ្ងៃទី១០ ខែមីនា ២០១៧ នេះថា កម្ពុជាមិនមានយុទ្ធភណ្ឌ័ប្រភេទគ្រាប់បែកដៃដូចថៃបានចោទនោះទេ ព្រោះគ្រាប់បែកនោះផលិតនៅប្រទេសអាមេរិកហើយកម្ពុជា មិនមានផែនការដាក់គ្រាប់បែកតាមព្រំដែនរបស់ខ្លួនដែរ ។ ដូច្នេះមានន័យថាគ្រាប់បែកដៃខាងលើជាគ្រាប់បែកដៃដែលទាហានថៃប្រើប្រាស់ គេដោះនៅក្នុងទឹកដីរបស់គេ ហើយក៏ ជាគ្រាប់បែកដៃរបស់គេផងដែរ ៕
