ខេត្តរតនគិរី ៖ ដីព្រៃនៅតាមមាត់ទន្លេសាន ស្ថិតក្នុងភូមិភិ ឃុំសេសាន ស្រុកអូរយ៉ាដាវ ខេត្តរតនគិរី ត្រូវបានមន្ត្រីជំនាញរដ្ឋាបាលព្រៃឈើម្នាក់ ឈូសឆាយព្រៃ និងមាត់ច្រាំងទន្លេ ព័ទ្ធរបងធ្វើជាកម្មសិទ្ធ ដោយសំអាងថាទិញពីប្រជាពលរដ្ឋ មិនមានការជូនដំណឹង ឬ សុំអនុញ្ញាតិពីអាជ្ញាធរ និងស្ថាប័ណ្ណពាក់ព័ន្ធឡើយ។
តាមសំដីលោក ទុន វិរៈភាព មន្ត្រីជំនាញរដ្ឋបាលព្រៃផ្នែកស្រុកបរកែវ បានអោយអ្នកសាព័ត៌មានយើងដឹងនៅព្រឹកថ្ងៃទី៨ ខែមីនា ឆ្នាំ២០១៧ នេះថា ដីនេះគាត់ទិញពីប្រជាពលរដ្ឋ ជាដីចំការដំឡូង ហើយមានការទទួលស្គាល់ពីអាជ្ញាធរ ភូមិ ឃុំ ចំណែកការយកគ្រឿងចក្រឈូសឆាយ គឺលោកមិនបានឆាយទេ ពីព្រោះដីនោះជាដីចំការវាលស្រាប់។
លោកមេឃុំសេសាន សេវ ស្វែន ថា ការឈូសឆាយដីរបស់លោក ទុន វិរៈភាព នោះលោកមិនបានដឹងទេ គឺគេឈូសឆាយស្រេចតែចិត្ត មិនបានជូនដំណឹងដល់អាជ្ញាមូលដ្ឋានទេ។ លោកបន្តថា ការឈូសឆាយធ្វើអ្វីមួយគួរតែម្ចាស់ ឬ ក្រុមហ៊ុននោះ ជូនដំណឹងដល់គាត់ដែល។ (សុំស្ដាប់ដីលោកមេឃុំសេសាន)
ចំណែកលោក ម៉ាវិចិត្រ អភិបាលស្រុកអូរយ៉ាដាវ ក៏បានឲ្យដឹងនៅថ្ងៃដដែលនេះដែរថា លោកបានត្រឹមត្រួតពិនិត្យឯកសារពាក់ព័ន្ធតែប៉ុណ្ណោះ ចំណែកការឈូសឆាយយ៉ាងនោះ គឺគេធ្វើតាមតែអំពើចិត្ត គេមិនបានជូនដំណឹង ឬ សុំអនុញ្ញាតិអ្វីទេ។ ពីព្រោះលោក ទុន វិរៈភាព ជាមន្ត្រីនាញរដ្ឋបាលព្រៃឈើស្រាប់ ដូច្នេះការងារនេះ ទាល់តែលោកនាយជំនាញរដ្ឋបាលព្រៃឈើផ្នែក ឬ ខណ្ឌរដ្ឋបាលព្រៃឈើជាមេរបស់គេទើបដឹងច្បាស់។
ទាក់ទិនករណីខាងលើនេះ លោក ឡេង យុគ នាយផ្នែករដ្ឋបាលព្រៃឈើបរកែវ និង លោក កែប កុដ នាយខណ្ឌរដ្ឋបាលព្រៃឈើខេត្តរតនគិរីថា ករណីឈូសឆាយដីព្រៃ ឬ ដីចំការខាងលើនេះ លោកមិនបានដឹងទេ ពីព្រោះលោក ទុន វិរៈភាព នេះធ្វើអីមិនដែលគោរពច្បាប់ ឬគោរពអ្នកណាម្នាក់ទេ។
ដោយឡែក លោក ផុន ខេមរិន ប្រធានបន្ទីរបរិស្ថាន អ្នកសាព័ត៌មានយើងមិនអាចសុំការបំភ្លឺពីផលប៉ះពាល់ច្រាំងទន្លេ ណាមួយបានទេ ព្រោះលេខទូរស័ព្ទលោក (០៨៨៩១៨៥៥៥៥) ខលមិនចូល។
បើទោះជាយ៉ាងណា ដីប្រមាណជា ២ហិតានោះ ត្រូវបានគេសង្កេតឃើញថា ឈូសដល់មាត់ច្រាំងទន្លេ និង កាយមាត់ច្រាំងទន្លេ ដែលបណ្ដាលឲ្យមានផលប៉ះពាល់ការបាក់ដី មិនត្រឹមតែប៉ុណ្ណោះ នៅក្នុងបរិវេណនោះមានគំនរគល់ឈើធំៗ ជាច្រើន ប្រមូលជាគំនរហាក់ដូចជាបំរុងដុតបំផ្លាញចោល។
ដោយ យឹម សារិទ្ធិ