ភ្នំពេញ៖ នាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញកាលពីថ្ងៃទី២មីនាបានឲ្យកម្លាំងការិយាល័យព្រហ្មទណ្ឌកំរិតស្រាលឃាត់ខ្លួនលោកអនុសេនីយ៍ទោ មាស ថន នាយនគរបាលស្តីទីប៉ុស្ដិ៍បាក់ខែង និងមន្ត្រីប៉ុស្ដិ៍លោក ឡុង សៅ ក្នុងខណ្ឌជ្រោយចង្វារ សាកសួរក្រោយទទួលបានបណ្ដឹងពីជនរងគ្រោះថា បានឃុបឃិតគ្នាដោះលែងជនសង្ស័យម្នាក់ ក្នុងករណីហិង្សាដោយចេតនាមួយបានកើតឡើង កាលពីយប់ថ្ងៃទី១០ ខែកុម្ភៈ ឆ្នាំ២០១៧។
បុរសដែលបានប្ដឹងទៅស្នងការនគរបាលរាជធានីភ្នំពេញស្នើសុំឲ្យនាយឧត្តមសេនីយ៍ ជួន សុវណ្ណ ឲ្យជួយរកយុត្តិធម៌មានឈ្មោះ ឡាំង ផា អាយុ៤៩ឆ្នាំ មុខរបរបើកបររថយន្ត ស្នាក់នៅផ្ទះលេខ៣៤Z ផ្លូវលេខ២៤៧ ក្រុម២៦ ភូមិ១០ សង្កាត់បឹងសាឡាង ខណ្ឌទួលគោក ត្រូវជាឪពុករបស់ជនរងគ្រោះ ឈ្មោះ ឡាំង សុផារ៉េត ភេទប្រុស អាយុ២៣ឆ្នាំ និងសុំទាមទារថ្លៃព្យាបាលរបួស និងជំងឺចិត្តចំនួន ៨ពាន់ដុល្លារ។
រីឯជនសង្ស័យដែលត្រូវបានលោកអនុសេនីយ៍ទោ មាស ថន នាយនគរបាលស្តីទីប៉ុស្ដិ៍បាក់ខែងដោះលែងមានឈ្មោះ សុខ ចាន់ ភេទប្រុស អាយុប្រហែលជាង៣០ឆ្នាំ។នៅក្នុងពាក្យបណ្តឹងបានរៀបរាប់ថា កាលពីថ្ងៃទី១០ ខែកុម្ភៈ ឆ្នាំ២០១៧ វេលាម៉ោង៧និង៣០នាទីយប់ កូនប្រុសរបស់គាត់ដែលមានឈ្មោះ ឡាំង សុផារ៉េត អាយុ ២៣ឆ្នាំ កំពុងអង្គុយហូបបាយជុំគ្នានៅខាងក្រោមផ្ទះ ស្រាប់តែឈ្មោះ សុខ ចាន់ ភេទប្រុស អាយុប្រហែល៣២ឆ្នាំ យកកាំបិតផ្គាក់ មកដេញកាប់ពីក្រោយ ហើយកូនប្រុសរបស់គាត់បានរត់គេច តែដួលលើដីក៏ ឈ្មោះ សុខ ចាន់ បានកាប់មួយកាំបិទផ្គាក់បណ្តាលអោយរងរបួសជាទម្ងន់ហូរឈាមរហូតដល់សន្លប់មិនដឹងខ្លួន។
ពាក្យបណ្តឹងបានរៀបរាប់បន្តថា ក្រោយពីកាប់កូនប្រុសរបស់គាត់រួចហើយ ឈ្មោះ សុខ ចាន់ បានរត់ទៅផ្ទះ ដើម្បីគេចខ្លួន បន្ទាប់មក កូនប្រសារគាត់បានទៅប្តឹងប៉ូលិសប៉ុស្តិ៍បាក់ខែង ដើម្បីឃាត់ខ្លួនជនសង្ស័យ ហើយសមត្ថកិច្ចបានឃាត់ខ្លួនជនសង្ស័យយកមកដាក់នៅប៉ុស្តិ៍ មួយយប់ ដោយបានដាក់ខ្នោះដៃត្រឹមត្រូវ ស្រាប់តែព្រឹកឡើង មានមន្ត្រីនគរបាលមួយរូប បានមកប្រាប់គ្រួសារគាត់ថា ជនសង្ស័យឈ្មោះ សុខ ចាន់ បានរត់គេចខ្លួនបាត់ហើយ។បើតាមប្រភពព័ត៌មានបានអោយដឹងថា មន្ត្រីប៉ូលិសទាំង ២នាក់ ត្រូវបានជាប់ឃុំជាបណ្តោះអាសន្ន នៅស្នងការនគរបាលរាជធានី បន្ទាប់ពីហៅទៅសួរនាំដែលបើគិតមកដល់ពេលនេះការឃាត់ខ្លួនគឺហួសអាជ្ញាយុកាលច្បាប់ដេលកំណត់ត្រឹមយ៉ាងយូ៣ថ្ងៃ។
មហាជន ក៏ដូចជាមន្ត្រីប៉ូលិសដែលដឹងរឿងនេះ មានការងឿងឆ្ងល់ថា រឿងធ្វើការប្រហែសបណ្តាលឱ្យជនសង្ស័យរត់រួចតែម្តង សោះត្រូវឃុំខ្លួន និងជាប់វិន័យយ៉ាងធ្ងន់ធ្ងរ ចុះអធិការដ្ឋាននគរបាលខណ្ឌឬស្សីកែវ និងខណ្ឌដ៏ទៃទៀត ធ្លាប់ធ្វើអោយរួចចោរជាច្រើនលើក ហើយមានករណីហែកគុកជាច្រើនដង មិនដែលឃើញស្នងការមានចំណាក់ការនោះឡើយ។
ជាក់ស្តែងនៅពេលថ្មីៗនេះនៅអធិការដ្ឋានខណ្ឌឬស្សីកែវបានធ្វើឱ្យជនសង្ស័យគ្រឿងញៀនម្នាក់រត់រួចហើយនិយាយថាជារឿងកំប៉េកកំប៉ុកទៀតផង ៕