ក្រចេះ៖ ការប្រកួតកីឡាជ្រើសរើសជើងឯកកីឡាសិស្សបឋមសិក្សា មធ្យមសិក្សាទូទាំងខេត្ត ឆ្នាំនេះ ក្រុមកីឡាករបាល់ទាត់ក្រុងក្រចេះ ជាអ្នកគ្រប់គ្រងពាន់រង្វន់ចំណាត់ថ្នាក់លេខ១ ។
ក្រោយពីបានដំណើរការអស់រយៈពេល១២ថ្ងៃកន្លងមក គេសង្កេតឃើញថា ការប្រគួតប្រជែងដណ្ដើមយកជើងឯកលើគ្រប់វិញ្ញាសារ ពីសំណាក់ក្រុមកីឡាករ កីឡាការនី ដែលមកពីគ្រប់វិទ្យាល័យ អនុវិទ្យាល័យ តាមបណ្ដាស្រុក និងក្រុងទាំង៦ ក្នុងខេត្តក្រចេះ មានទាំងបឋមសិក្សា និងមធ្យមសិក្សា គឺពិតជាមានភាពស្វិតស្វាញជាទីបំផុតរហូតដល់ថ្ងៃបញ្ចប់បិទកម្មវិធីនៃការប្រកួតនោះតែម្ដង ។
ជាលទ្ធផលនៃការប្រកួតលើគ្រប់វិញ្ញាសារ ផ្នែកវិញ្ញាសារបាល់ទាត់ ផ្នែកយុវជន លេខ១ បានទៅលើក្រុមកីឡាករបាល់ទាត់មកពីក្រុងក្រចេះ លេខ២ បានទៅលើក្រុមកីឡាករមកពីស្រុកឆ្លូង និងលេខ៣ បានទៅលើមកពីស្រុកស្នួល ។ ចំណែកផ្នែកយុវនារី លេខ១ បានទៅលើក្រុមមកពីក្រុងក្រចេះ លេខ២ បានទៅលើក្រុមមកពីស្រុកចិត្របុរី និងលេខ៣ បានក្រុមមកពីស្រុកព្រែកប្រសព្វ ។ វិញ្ញាសារបាល់ទះ ផ្នែកយុវនារី លេខ១ ក្រុងក្រចេះ លេខ២ ស្រុកឆ្លូង និងលេខ៣ បានទៅលើស្រុកចិត្របុរី និងផ្នែកយុវជន លេខ១ បានក្រុងក្រចេះ លេខ២ ស្រុកឆ្លូង និងលេខ៣ បានទៅលើស្រុកស្នួល ។
វិញ្ញាសារបាល់បោះ យុវនារី លេខ១ បានទៅលើក្រុងក្រចេះ លេខ២ ស្រុកចិត្របុរី និងលេខ៣ បានទៅលើស្រុកព្រែកប្រសព្វ និងផ្នែកយុវជន លេខ១ បានទៅលើក្រុងក្រចេះ លេខ២ បានស្រុកសំបូរ និងលេខ៣ បានស្រុកព្រែកប្រសព្វ ។ ផ្នែកអត្តពលកម្ម លេខ១ បានទៅលើក្រុងក្រចេះ លេខ២ ស្រុកសំបូរ និងលេខ៣ បានទៅលើស្រុកព្រែកប្រសព្វ ។
ទន្ទឹមនោះ រង្វន់ចំណាត់ថ្នាក់លេខ១ ទទួលបានពាន់១ ទង់ជ័យលាភី១ ទឹកប្រាក់ និងសម្ភារៈកីឡាមួយចំនួន ចំណាត់ថ្នាក់លេខ២ ទទួលបាន ទង់ជ័យលាភី១ ទឹកប្រាក់ និងសម្ភារៈកីឡាមួយចំនួន និងចំណាត់ថ្នាក់លេខ៣ ទទួលបាន ទង់ជ័យលាភី១ ទឹកប្រាក់ និងសម្ភារៈកីឡាមួយចំនួនដូចគ្នា ៕
